Visit BigblueAgency
ອາດສະພັງທອງ ເປີດປີທ່ອງທ່ຽວລາວ 2024 ຕິດພັນກັບງານບຸນນະມັດສະການ ປ່ອນບີພຣະພຸດທະຮູບ

ອາດສະພັງທອງ ເປີດປີທ່ອງທ່ຽວລາວ 2024 ຕິດພັນກັບງານບຸນນະມັດສະການ ປ່ອນບີພຣະພຸດທະຮູບ

ພິທີເປີດປີທ່ອງທ່ຽວລາວ 2024 ຕິດພັນກັບງານບຸນນະມັດສະການ ປ່ອນບີພຣະພຸດທະຮູບ ວັດປ່າມະຫາໂຊກ ໄຊຍະລາມ ຂອງເມືອງອາດສະພັງທອງ ແຂວງສະຫວັນນະເຂດ ໄດ້ຈັດຂຶ້ນເມື່ອມໍ່ໆມານີ້ໂດຍການເຂົ້າຮ່ວມຂອງ ທ່ານ ພູວັງ ເກດແກ້ວພົມພອນ ຮອງເລຂາພັກແຂວງສະຫວັນນະເຂດ, ທ່ານ ຄໍາວິໃສ ຜຸຍຍະວົງ ກໍາມະການພັກແຂວງ ຫົວໜ້າຄະນະໂຄສະນາອົບຮົມແຂວງ, ທ່ານ ບຸນຖັນ ແສງດາລາ ເຈົ້າເມືອງອາດສະພັງທອງ, ທ່ານ ມົງກຸດເພັດ ວົງພະຈັນ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ມີບັນດາທ່ານການນຳຂອງແຂວງ, ຂອງເມືອງ, ເມືອງອ້ອມຂ້າງ 14 ເມືອງ 1 ນະຄອນ, ພ້ອມດ້ວຍນັກທຸລະກິດ-ຜູ້ປະກອບການເຂົ້າຮ່ວມ.

ກ່ອນເຂົ້າສູ່ພິທີເປີດປີທ່ອງທ່ຽວຢ່າງເປັນທາງການ ບັນດາການນໍາ, ແຂກທີ່ເຂົ້າຮ່ວມ ແລະ ຊາວພຸດທະບໍລິສັດທີ່ມີຈິດເຫຼື້ອມໃສສັດທາ ກໍ່ຍັງໄດ້ຮ່ວມພິທີວາງສີລາເລີກການກໍ່ສ້າງພຣະສີວະລີ ແລະ ພຣະສັງກະຈາຍ ທີ່ວັດປ່າມະຫາໂຊກ ໄຊຍະລາມ ເຊິ່ງນໍາພາໂດຍ ພຣະອາຈານ ປທ. ໂງ່ນຄໍາ ພວງສະຫວັນ ເຈົ້າອະທິການວັດປ່າມະຫາໂຊກ ໄຊຍະລາມ.

ທ່ານ ອຸ່ນຫຼ້າ ພູວົງລິນທາ ຮອງເຈົ້າເມືອງອາດສະພັງທອງ ໄດ້ລາຍງານໃຫ້ຮູ້ວ່າ: ເພື່ອປະຕິບັດແຜນກິດຈະກໍາທ່ອງທ່ຽວຂອງເມືອງໃຫ້ບັນລຸຕາມຈຸດປະສົງທີ່ວາງໄວ້ ຄະນະພັກ-ອົງການປົກຄອງເມືອງ ໄດ້ຊຸກຍູ້ຫ້ອງການທີ່ກ່ຽວຂ້ອງຂັ້ນເມືອງ ແລະ ບ້ານ ສຸມໃສ່ວຽກງານໂຄສະນາແຫຼ່ງທ່ອງທ່ຽວຂອງເມືອງ, ຊຸກຍູ້ຜູ້ປະກອບການເອົາໃຈໃສ່ປັບປຸງພື້ນຖານໂຄງລ່າງບ່ອນພັກເຊົາ ແລະ ສ້າງສິ່ງອໍານວຍຄວາມສະດວກດ້ານການທ່ອງທ່ຽວ ຈັດກິດຈະກໍາສົ່ງເສີມການທ່ອງທ່ຽວພາຍໃນເມືອງເຊັ່ນ: ໃນຕົ້ນເດືອນມັງກອນ ໄດ້ຈັດງານບຸນກອງເຂົ້າໃຫຍ່ຢູ່ເມືອງ, ເດືອນ 2 ເພັງຈັດງານບຸນນະມັດສະການ ພຣະທາດ ຍາທ່ານ ສີກາ ບ້ານນາຈານ, ເດືອນ 3 ເພັງ ຈັດງານບຸນນະມັດສະການ ພຣະທາດ ຍາຄູ ຂີ້ຫອມ ຢູ່ບ້ານດົງກຶມ, ເດືອນ 3 ແຮມ 2 ຄໍ່າ ຈັດງານບຸນນະມັດສະການ ພຣະທາດ ຍາທ່ານ ພົນ ບ້ານນາແຜກ ແລະ ຍັງມີກິດຈະກໍາອື່ນໆ, ນອກນັ້ນ ກໍຍັງໄດ້ພັດທະນາແຫຼ່ງທ່ອງທ່ຽວຕ່າງໆ ເຊິ່ງສະຖານທີ່ໆເປັນມົນສະເໜ່ດຶງດູດຜູ້ຄົນມາທ່ຽວຊົມ-ກາບໄຫວ້-ຂໍພອນ ທີ່ກໍາລັງລືຊື່ອີກແຫ່ງໜຶ່ງກໍຄື ວັດປ່າມະຫາໂຊກ ໄຊຍະລາມ ບ້ານໂຊກໄຊ ໂດຍມີອົງປູ່ອະນັນຕະໂຄມຄຳ, ອົງຍ່າພອນປະເສີດ, ປູ່ເວດສຸວັນ, ພຣະອຸປະຄຸດ, ນໍ້າຕົກຕາດ ແລະ ສິ່ງອື່ນໆ ເຊິ່ງກໍາລັງເປັນທີ່ນິຍົມ ແລະ ເຫຼື້ອມໃສສັດທາທັງພາຍໃນ ແລະ ຕ່າງແຂວງຢ່າງໜາແໜ້ນ, ທັງນີ້ກໍເພື່ອແນໃສ່ ສົ່ງເສີມການທ່ອງທ່ຽວພາຍໃນໃຫ້ມີບັນຍາກາດຄຶກຄື້ນ, ກະຕຸ້ນໃຫ້ເສດຖະກິດຂະຫຍາຍຕົວ, ສ້າງລາຍຮັບໃຫ້ປະຊາຊົນ ທັງເປັນການອະນຸລັກຮັກສາຮີດຄອງປະເພນີ ມູນເຊື້ອວັດທະນະທໍາອັນດີງາມຂອງຊາດ ແລະ ທ້ອງຖິ່ນໄວ້ໃຫ້ຍືນຍົງ.

ຂ່າວ – ພາບ: ອັກສອນສິນ ພົມມະຈັນ

Bottom of Form

Related Articles

Leave a Reply