ອົງການປະກັນສັງຄົມແຫ່ງຊາດ ຮ່ວມມືກັບ ບໍລິສັດ ລາວໂມບາຍມັນນີ ຈຳກັດຜູ້ດຽວເຊັນສັນຍາວ່າດ້ວຍການເປັນຄູ່ຮ່ວມທຸລະກິດ ເພື່ອສະໜອງບໍລິການປະກັນສັງຄົມ ເຊື່ອມຕໍ່ລະບົບການຊຳລະຜ່ານບໍລິການ ການເງິນດີຈີຕອນ (M Money) ໄດ້ຈັດຂື້ນໃນວັນທີ 31 ມີນາ 2021 ຜ່ານມານີ້ ທີ່ນະຄອນຫຼວງວຽງຈັນ ຊຶ່ງຮ່ວມລົງນາມໂດຍ ທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດ ແລະ ທ່ານ ທັນສະໄໝ ຊາມຸນຕີ ຜູ້ອຳນວຍການ ບໍລິສັດ ລາວໂມບາຍມັນນີ ຈຳກັດຜູ້ດຽວ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ການເຊັນສັນຍາດັ່ງກ່າວ ແມ່ນເພື່ອເປັນການເປີດໂຕຄູ່ຮ່ວມທຸລະກິດກັບ ອົງການປະກັນສັງຄົມແຫ່ງຊາດຢ່າງເປັນທາງການ ໃນການສະໜອງບໍລິການເງິນອຸດໜູນປະກັນສັງຄົມ ຜ່ານບໍລິການ ການເງິນດີຈີຕອນ (M Money) ເພື່ອແນໃສ່ຕອບສະໜອງຄວາມຕ້ອງການຂອງລູກຄ້າ ແລະ ເຮັດໃຫ້ ການບໍລິການມີຄວາມສະດວກສະບາຍ, ປອດໄພ, ວ່ອງໄວໄດ້ມາດຕະຖານສາກົນ ພາຍໃຕ້ຄຳຂວັນ “ໃຫ້ຊີວິດງ່າຍຂຶ້ນຕາມຍຸກດີຈີຕອນ”.
ການຮ່ວມມືທາງທຸລະກິດຄັ້ງນີ້ຍັງເປັນບາດກ້າວໜຶ່ງທີ່ສຳຄັນ ແລະ ເປັນບາດກ້າວທຳອິດໃນການຫັນການຊຳລະເງິນຮູບແບບໃໝ່ຜ່ານ M Money ເຂົ້າໃນຫົວໜ່ວຍທຸລະກິດທີ່ທັນສະໄໝ ແລະ ມີຄວາມຈຳເປັນໃນການດຳລົງຊີວິດປະຈຳວັນຂອງຜູ້ຄົນໃນທົ່ວປະເທດ ເປັນສ່ວນໜຶ່ງໃນການສ້າງທ່າແຮງ, ຊຸກຍູ້, ເສີມສ້າງ ແລະ ຜັນຂະຫຍາຍ ເສດຖະກິດດີຈີຕອນ, ຫຼຸດຜ່ອນການນຳໃຊ້ເງິນສົດຕາມແຜນພັດທະນາເສດຖະກິດດີຈີຕອນ ຂອງພັກ-ລັດ ໃຫ້ປະກົດຜົນເປັນຈິງຕາມວິໄສທັດຂອງ ບໍລິສັດ ລາວໂມບາຍມັນນີ ຈຳກັດຜູ້ດຽວ ເປັນຜູ້ນຳດ້ານການ ບໍລິການການເງິນດີຈີຕອນ ໃນ ສປປ ລາວ.
ຂໍ້ມູນ: ຮສສ
