ອົງການອາຫານໂລກ (WFP) ປະຈໍາ ສປປ ລາວ ໄດ້ເລີ່ມ ການແຈກຢາຍເຂົ້າສຸກເສີນເພື່ອຊ່ວຍເຫຼືອຊຸມຊົນທີ່ໄດ້ ຮັບຜົນກະທົບໄພນຳ້ຖ້ວມທີ່ຮ້າຍແຮງຈາກພາຍຸໄຕ້ຝຸ່ນຢາກິ; ນັບຕັ້ງແຕ່ເດືອນມິຖຸນາເປັນຕົ້ນມາ, ໄພນ້ຳຖ້ວມ, ດິນເຈື່ອນ ແລະ ພາຍຸ ໄດ້ສ້າງຄວາມເສຍຫາຍໃຫ້ປະຊາຊົນ ປະມານ 145,000 ຄົນໃນທົ່ວປະເທດ. ພາຍຸໄຕ້ຝຸ່ນ ຢາກິ ເຮັດໃຫ້ເກີດມີຝົນຕົກໜັກ, ນໍ້າຖ້ວມໜັກ ແລະ ດິນເຈື່ອນ ເພີ່ມຂຶ້ນອີກ ນັບແຕ່ວັນທີ 9 ກັນຍາ 2024 ເປັນຕົ້ນມາ, ເຮັດໃຫ້ປະຊາຊົນ 33,000 ຄົນ ຢູ່ 2 ເມືອງຂອງ ແຂວງ ຫຼວງນໍ້າທາ ບໍ່ມີບ່ອນຢູ່ອາໄສເປັນການຊົ່ວຄາວ. ຜົນພວງ ຈາກພາຍຸດັ່ງກ່າວໄດ້ສ້າງຄວາມເສຍຫາຍໃນທົ່ວ ປະເທດ ແລະ ເຮັດໃຫ້ເກີດໄພນ້ຳຖ້ວມຢູ່ບໍລິເວນລຸ່ມ ແມ່ນ້ຳຂອງ ແລະ ແມ່ນ້ຳສາຂາຕ່າງໆຕື່ມອີກ, ເຮັດໃຫ້ ປະຊາຊົນ 40,000 ຄົນ ຢູ່ແຂວງຫຼວງນ້ຳທາ ຍັງຢູ່ໃນ ສະພາວະ ຕ້ອງການຄວາມຊ່ວຍເຫຼືອຢ່າງຮີບດ່ວນ.
ພາຍຫຼັງການຮ້ອງຂໍການຊ່ວຍເຫຼືອຢ່າງເປັນທາງການຈາກກະຊວງແຮງງານ ແລະ ສະຫວັດດີການສັງຄົມໄປຍັງ ອົງການອາຫານໂລກ, ການແຈກຢາຍເຂົ້າໄດ້ເລີ່ມຂຶ້ນຢູ່ ແຂວງຫຼວງນ້ຳທາ ຊຶ່ງເປັນບ່ອນທີ່ກຳລັງຂາດແຄນອາຫານ ທີ່ເປັນຜົນພວງມາຈາກການສູນເສຍຜົນລະປູກ ແລະ ເນື້ອ ທີ່ໃນການເຮັດກະສິກຳ. ດ້ວຍການປະສານສົມທົບກັບ ລັດຖະບານແຫ່ງ ສປປ ລາວ ແລະ ອົງການກາແດງແຫ່ງ ຊາດລາວ, ອົງການອາຫານໂລກໄດ້ແຈກຢາຍເຂົ້າສານ ຈຳນວນ 100 ໂຕນ ໃຫ້ແກ່ປະຊາຊົນທີ່ໄດ້ຮັບຜົນກະທົບ ຮ້າຍແຮງ 14,000 ຄົນ.
ທ່ານ ມາກ-ອັນເດຣ ໂປຣສ ຜູ້ຕາງໜ້າອົງການອາຫານ ໂລກ ແລະ ຜູ້ອໍານວຍການປະຈໍາ ສປປ ລາວ ກ່າວວ່າ: “ພວກເຮົາກຳລັງປະສານສົມທົບກັບຄະນະກຳມະການຄຸ້ມຄອງໄພພິບັດແຫ່ງຊາດ ແລະ ບັນດາອົງການມະນຸດສະທຳ ອື່ນໆ ເພື່ອສ້າງການເຄື່ອນໄຫວຕອບໂຕ້ ແລະ ຟື້ນຟູໄພ ພິບັດທີ່ມີປະສິດທິພາບ ແລະ ປະສິດທິຜົນ. ຂ້າພະເຈົ້າ ຫວັງຢ່າງຍິ່ງວ່າການແຈກຢາຍເຂົ້າໃນຄັ້ງນີ້ ຈະຊ່ວຍບັນເທົາ ຄວາມທຸກຍາກຂາດເຂີນຂອງປະຊາຊົນທີ່ກຳລັງປະເຊີນ ກັບຄວາມສູນເສຍຢ່າງໜັກໜ່ວງຢູ່ແຂວງຫຼວງນ້ຳທາໄດ້ ແລະ ພວກເຮົາຈະໃຊ້ຄວາມຊໍານິຊຳນານ ແລະ ຄວາມອາດ ສາມາດຂອງພວກເຮົາເຂົ້າໃນການຟື້ນຟູຄືນໃຫ້ດີກວ່າເກົ່າ, “ພວກເຮົາຈະສືບຕໍ່ເຮັດວຽກຮ່ວມກັບຊຸມຊົນທ້ອງຖິ່ນເພື່ອຟື້ນຟູຊີວິດການເປັນຢູ່, ປັບປຸງຄວາມໝັ້ນຄົງດ້ານ ສະບຽງອາຫານ ແລະ ເສີມສ້າງການກຽມພ້ອມໄພພິບັດ ໃນການປະເຊີນໜ້າກັບໄພພິບັດດ້ານສະພາບອາກາດໃນອະນາຄົດ.
(ຂ່າວ: ອົງການອາຫານໂລກ)
