Vientiane Times Lao
ອໍານາດການປົກຄອງເມືອງສາລະວັນ ເລັ່ງຊ່ວຍເຫຼືອຜູ້ປະສົບໄພທໍາມະຊາດ

ອໍານາດການປົກຄອງເມືອງສາລະວັນ ເລັ່ງຊ່ວຍເຫຼືອຜູ້ປະສົບໄພທໍາມະຊາດ

ອໍານາດການປົກຄອງເມືອງສາລະວັນ ແຂວງສາລະວັນ ເລັ່ງຊ່ວຍເຫຼືອເບື້ອງຕົ້ນປະເພດເຂົ້າສານ ອາຫານແຫ້ງ, ຢາປົວພະຍາດ ແລະ ອື່ນໆ ໃຫ້ຜູ້ປະສົບໄພທໍາມະຊາດຈາກພາຍຸໂກນເຊີນພັດຜ່ານເມື່ອມໍ່ໆມານີ້ ໂດຍມີ ເຮືອນປະຊາຊົນ 141 ຫຼັງ ຈາກ 4 ບ້ານ ໄດ້ຖືກລົມພັດເປ່ເພ ແລະ ປັດຈຸບັນນີ້ຍັງມີປະຊາຊົນຜູ້ໄດ້ຮັບຜົນກະທົບຈໍານວນໜຶ່ງ ທີ່ຍັງອາໄສວັດຢູ່.

ທ່ານ ຈັນສີລອນ ສີສົມບູນ ເຈົ້າເມືອງສາລະວັນ ໃຫ້ສຳພາດເມື່ຶອມໍ່ໆມານີ້ວ່າ: ພາຍຫຼັງທີ່ພາຍຸໂກນເຊີນພັດຜ່ານ ແລະ ໄດ້ສ້າງຄວາມເສຍຫາຍຕໍ່ທີ່ຢູ່ອາໄສ, ອຳນາດການປົກເມືອງໄດ້ລົງຊ່ວຍເຫຼືອເບື້ອງຕົ້ນກ່ຽວກັບການຊອກທີ່ຢູ່ອາໄສຊົ່ວຄາວ, ອາຫານການກິນ, ຢາປົວພະຍາດ ແລະ ດ້ານສຸຂະອະນາໄມ. ນອກຈາກນັ້ນ, ໄດ້ປະສານສົບທົບ ແລະແຕ່ງຕັ້ງ ກຳລັງປ້ອງກັນຊາດ-ປ້ອງກັນ​ຄວາມສະຫງົບ ເຂົ້າຊ່ວຍເຫຼືອເກັບມ້ຽນສິ່ງຂອງຕ່າງໆ​ ແລະ ສ້ອມແປງເຮືອນຊານ​ຂອງປະຊາຊົນ ທີ່ເປ່ເພເລັກນ້ອຍ  ແລະ ໄດ້ສ້າງທີ່ພັກຊົ່ວຄາວໃຫ້ເຂົາເຈົ້າ,  ສໍາລັບເຮືອນ ທີ່ເປ່ເພ ເສຍຫາຍໜັກ ແມ່ນຈະສ້າງທີ່ພັກພາອາໄສ, ສ້ອມແປງຄືນໃຫ້ເຂົາເຈົ້າໄດ້ກັບມາຢູ່ຢ່າງຖາວອນ ແລະ ສືບຕໍ່ສະໜອງເຄື່ອງບໍລິໂພກ ແລະ ອຸປະໂພກຈໍານວນໜື່ງເພື່ອເຮັດໃຫ້ເຂົ້າເຈົ້າດຳລົງຊີວີດໄດ້ຢ່າງເປັນປົກກະຕິ.​

ເມືອງສາລະວັນ ໄດ້ຮັບຜົນກະທົບຈາກພາຍຸດັ່ງກ່າວທັງໜົດ 4 ບ້ານ, ມີເຮືອນ 141 ຫຼັງ ໃນນີ້ ຢູ່ບ້ານໂພນໄຜ່ 90 ຫຼັງ, ເສຍຫາຍໜັກ 25 ຫຼັງ, ບ້ານກ້ວຍ 43 ຫຼັງ, ເສຍຫາຍໜັກ 5 ຫຼັງ, ບ້ານ ແບ່ງອຸດົມ 6 ຫຼັງ, ເສຍຫາຍໜັກ 1 ຫຼັງ ແລະ ບ້ານທາດຫ້ວຍ 2 ຫຼັງ. ສຳລັບ​ການຊ່ວຍເຫຼືອມາຮອດປະຈຸບັນ​ ໄດ້ມີຜູ້ປະກອບສວ່ນຊ່ວຍເຫຼືອທັງໝົດ 24 ພາກສ່ວນ, ມີປະເພດເຄື່ອງບໍລິໂພກ ແລະ ອຸປະໂພກ ມູນຄ່າຫຼາຍກວ່າ 100 ລ້ານກີບ ແລະ ເງີນສົດເກືອບ 30 ລ້ານກີບ.

ແຫຼ່ງຂ່າວ-ຮູບ: ແຂວງສາລະວັນ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ