Visit BigblueAgency
ຮອງນາຍົກລັດຖະມົນຕີ ເຄື່ອນໄຫວຊີ້ນຳ ວຽກງານຟື້ນຟູພາຍຫຼັງນໍ້າຖ້ວມຢູ່ແຂວງຄຳມ່ວນ

ຮອງນາຍົກລັດຖະມົນຕີ ເຄື່ອນໄຫວຊີ້ນຳ ວຽກງານຟື້ນຟູພາຍຫຼັງນໍ້າຖ້ວມຢູ່ແຂວງຄຳມ່ວນ

ວັນທີ 2 ຕຸລາ 2019 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະໄດ້ ລົງໄປເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງຄຳມ່ວນ ໂດຍໄດ້ຮັບການຕ້ອນຮັບ ແລະ ຟັງການລາຍງານກ່ຽວກັບແຜນການພັດທະນາ ເສດຖະກິດ-ສັງຄົມ ຂອງແຂວງ ໂດຍສະເພາະ ໄດ້ຮັບຟັງການລາຍງານ ກ່ຽວກັບຜົນເສຍຫາຍ ຈາກໄພນໍ້າຖ້ວມ ແລະ ການແກ້ໄຂຜົນກະທົບ ພາຍຫຼັງນໍ້າຖ້ວມ ຈາກທ່ານ ສົມໃຈ ເພັດສີນວນ ຮອງເຈົ້າແຂວງຄຳມ່ວນ ໂດຍມີ ຄະນະນຳຂອງ ແຂວງ ແລະ ຂະແໜງການທີ່ກ່ຽວຂ້ອງເຂົ້າ ຮ່ວມ.
ທ່ານ ສົມໃຈ ເພັດສີນວນ ໄດ້ລາຍງານໃຫ້ຮູ້ວ່າ: ໃນປີ 2018 ຜ່ານມາ ເສດຖະກິດຂອງແຂວງ ຄຳມ່ວນ ມີການເຕີບໂຕໃນລະດັບ 6,56%, ລວມຍອດຜະລິດຕະພັນພາຍໃນ ບັນລຸໄດ້ 7,4 ຕື້ກີບ, ສະເລ່ຍລາຍຮັບຕໍ່ຫົວຄົນ 17,8 ລ້ານ ກີບ ຫລື ເທົ່າກັບ 2.121 ໂດລາສະຫະລັດຕໍ່ຄົນຕໍ່ປີ. ໃນປີ 2019 ນີ້, ໄດ້ອະນຸມັດໂຄງການລົງທຶນຂອງ ລັດ ຈຳນວນ 341 ໂຄງການ, ມູນຄ່າ 113 ຕື້ກວ່າ ກີບ ເຊິ່ງໃນ 9 ເດືອນຜ່ານມາ ສາມາດປະຕິ ບັດໄດ້ 265 ໂຄງການ, ມູນຄ່າ 79 ຕື້ກີບ, ເທົ່າກັບ 70%. ສ່ວນການລົງທຶນຂອງພາກ ເອກະຊົນ ໄດ້ເນັ້ນໃສ່ປຸກລະດົມນັກລົງທຶນທັງ ພາຍໃນ ແລະ ຕ່າງປະເທດ ເຂົ້າມາລົງທຶນໃນ ກິດຈະການຕ່າງໆ ໃນໄລຍະ 9 ເດືອນ ໄດ້ 20 ໂຄງການ, ມີທຶນທັງໝົດ 27 ຕື້ໂດລາສະຫະລັດ, ທຶນຈົດທະບຽນເກືອບ 19 ຕື້ໂດລາສະຫະລັດ; ສ່ວນຂົງເຂດວຽກງານອື່ນໆ ກໍ່ໄດ້ຮັບການພັດ ທະນາ ແລະ ປະສົບຜົນສຳເລັດ ໃນຫຼາຍດ້ານ. ສຳລັບ ສະພາບຜົນເສຍຫາຍຈາກໄພນ້ຳຖ້ວມ ໃນໄລຍະຕົ້ນເດືອນສິງຫາ ຫາ ຕົ້ນເດືອນກັນຍາ ຜ່ານມາ ໄດ້ສ້າງຜົນເສຍຫາຍໃຫ້ແກ່ປະຊາຊົນ ເປັນຈຳນວນຫຼາຍ ເຊິ່ງກວມເອົາ 6 ເມືອງຂອງ ແຂວງ ຄື: ເມືອງບົວລະພາ, ເມືອງຍົມມະລາດ, ເມືອງໄຊບົວທອງ, ເມືອງມະຫາໄຊ ແລະ ເມືອງໜອງບົກ, ໃນນີ້ມີ 231 ບ້ານ, ມີ 16.600 ກວ່າຄອບຄົວ, ມີ 68.800 ກວ່າຄົນ ໄດ້ຮັບຜົນ ກະທົບ.

ເນື້ອທີ່ນາປີປັກດຳ ຖືກນໍ້າຖ້ວມ 19.500 ກວ່າເຮັກຕາ, ເນື້ອທີ່ປູກພືດລະດູຝົນ 900 ກວ່າເຮັກຕາ, ສັດລ້ຽງຕາຍເປັນຈຳນວນຫຼາຍ, ໜອງປາ 326 ໜອງ, ໂຄງການຊົນລະປະທານ ຖືກນ້ຳຖ້ວມ 52 ຫົວງານ, ຄອງເໝືອງຍຸບ 12 ຈຸດ, ເສັ້ນທາງຖືກນ້ຳຖ້ວມ 31 ເສັ້ນ, ຍາວ 77.600 ກວ່າແມັດ, ໂຮງຮຽນຖືກນໍ້າຖ້ວມ 26 ແຫ່ງ, ໂຮງຮຽນອານຸບານ 3 ແຫ່ງ, ປະຖົມ 20 ແຫ່ງ, ມັດທະຍົມຕອນຕົ້ນ 3 ແຫ່ງ, ນໍ້າຖ້ວມໂຮງໝໍນ້ອຍ 11 ແຫ່ງ, ນຳປະປາຊົນນະບົດ 9 ແຫ່ງ, ນ້ຳບາດານ 723 ບໍ່, ນໍ້າສ້າງ 119 ບໍ່, ວິດຖ່າຍ 4.900 ກວ່າໜ່ວຍ, ລວມມູນຄ່າຜົນເສຍຫາຍທັງໝົດ ທາງພາກລັດ 155 ຕື້ກີບ, ພາກເອກະຊົນ 11,6 ລ້ານໂດລາ ສະຫະລັດ.

ໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ມີຄຳເຫັນໂອ້ລົມ ໂດຍທ່ານໄດ້ໃຫ້ທິດຊີ້ນຳ ແກ່ຄະນະນຳຂອງແຂວງຄຳມ່ວນ ບາງບັນ ຫາສຳຄັນຄື: ໃຫ້ສືບຕໍ່ຊີ້ນຳ-ນຳພາຈັດຕັ້ງປະ ຕິບັດ ບັນດາວຽກງານຕ່າງໆ ໃນທຸກຂະແໜງ ການ ທີ່ເຫັນວ່າຍັງບໍ່ທັນສອດຄ່ອງ ໂດຍສະເພາະ ວຽກງານປ້ອງກັນຊາດ-ປ້ອງກັນຄວາມສະຫງົບ, ເອົາໃຈໃສ່ແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນ ເປັນຕົ້ນ ບັນຫາຢາເສບຕິດ, ຂີ້ລັກງັດແງະ ລວມທັງ ອຸປະຕິເຫດ ແລະ ອື່ນໆ. ຄຽງຄູ່ກັນນັ້ນ, ວຽກງານເສດຖະກິດ ໃຫ້ສຸມໃສ່ປະຕິບັດບັນດາຄຳສັ່ງ-ຄຳເນາະນຳ ຂອງລັດຖະບານ ເປັນຕົ້ນຄຳສັ່ງວ່າດ້ວຍ ການປະຕິບັດ 8 ມາດຕະການຊຸກຍູ້ເສດຖະກິດ, ການລົງທຶນຂອງພາກລັດ ແລະ ພາກເອກະຊົນ ທັງພາຍໃນ ແລະ ຕ່າງປະເທດ ໃຫ້ເຂັ້ມງວດ, ຈັດຕັ້ງປະຕິບັດບັນດາໂຄງການຕາມທີ່ສະພາອະນຸມັດ, ບໍ່ໃຫ້ມີໂຄງການນອກແຜນ ແລະ ປະຕິ ບັດຕາມທິດຂອງລັດຖະບານ ໃນການກວດກາ ຄືນບັນດາໂຄງການລົງທຶນຂອງລັດ ໂດຍສະເພາະ ໂຄງການນອກແຜນທີ່ໄດ້ຈັດຕັ້ງປະຕິບັດຜ່ານມາ ໃຫ້ສຳເລັດ ແລະ ໃຫ້ເປັນຮູບປະທຳ.
ພ້ອມນັ້ນ ທ່ານຮອງນາຍົກລັດຖະມົນຕີ ຍັງໄດ້ເນັ້ນໃຫ້ຄະນະນຳຂອງແຂວງ, ເມືອງ ສຸມໃສ່ແກ້ໄຂຜົນກະທົບຈາກໄພນ້ຳຖ້ວມ ກໍ່ຄື ຊ່ວຍເຫຼືອ ບັນດາເມືອງ ທີ່ໄດ້ຮັບຜົນກະທົບ ໃນການປັບປຸງຟື້ນຟູພື້ນຖານໂຄງລ່າງ ແລະ ເນື້ອທີ່ການຜະລິດ ທີ່ໄດ້ຮັບຜົນເສຍຫາຍ ໂດຍສະເພາະດ້ານກະສິກຳເປັນຫຼັກ. ພ້ອມນັ້ນໃຫ້ສຸມໃສ່ຕິດຕາມເຝົ້າລະວັງ ພະຍາດ ລະບາດ, ໂຮງຮຽນ, ສຸກສາລາ, ຊົນລະປະທານ ຕ້ອງມີແຜນການແກ້ໄຂ ຢ່າງຮີບດ່ວນ ແລະ ກັບຄືນສູ່ສະພາບປົກກະຕິໂດຍໄວ ແນໃສ່ເຮັດ ໃຫ້ຊີວິດການເປັນຢູ່ຂອງປະຊາຊົນ ດີຂຶ້ນເທື່ອ ລະກ້າວ. ໃນໂອກາດດຽວກັນ ທ່ານ ສອນໄຊ ສີພັນດອນ ຍັງໄດ້ມອບເງິນຈຳນວນ 100 ລ້ານກີບ ໃຫ້ແຂວງຄຳມ່ວນ ເພື່ອນຳໄປ ຊ່ວຍເຫຼືອບັນດາເມືອງ ກໍ່ຄື ປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ ຢ່າງທັນການ ແລະ ມີປະສິດທິຜົນ.

Related Articles

Leave a Reply