Vientiane Times Lao
ເກີດເຫດເສົ້າ! ລະເບີດແຕກໃສ່ປະຊາຊົນເສຍຊີວິດ 1 ຄົນ

ເກີດເຫດເສົ້າ! ລະເບີດແຕກໃສ່ປະຊາຊົນເສຍຊີວິດ 1 ຄົນ

ລະເບີດແຕກໃສ່ປະຊາຊົນເສຍຊີວິດ 1 ຄົນ ຢູ່ບ້ານສົ້ມໂຮງ, ເມືອງອາດສະພອນ ແຂວງ ສະຫວັນນະເຂດ.

ທ່ານ ພັນໂທ ມອນຄໍາ ອິນທະວົງສັກ, ຫົວໜ້າຫ້ອງການ ປກສ  ແຂວງ ສະຫວັນນະເຂດ ໄດ້ລາຍງານໃຫ້ຮູ້ວ່າ: ເວລາ 13:00 ໂມງ ຂອງວັນທີ 22 ມີນາ 2020, ເກີດລະເບີດແຕກໃສ່ປະຊາຊົນ ເສຍຊີວິດ 1 ຄົນ ຊື່ ທ້າວ ໄລ ອາຍຸ 15 ປີ, ອາຊີບ ນັກຮຽນ, ເຊິ່ງຜູ້ກ່ຽວໄດ້ໄປບຸກເບີກພື້ນທີ່ ເພື່ອກຽມເຮັດໄຮ່, ເຮັດສວນກັບ ພໍ່ (ຊື່ ທ້າວ ອ້ອມ). ໃນຂະນະທີ່ກໍາລັງບຸກເບີກພື້ນທີ່ດັ່ງກ່າວ, ໄດ້ເກີດເຫດລະເບີດທີ່ຕົກຄ້າງແຕ່ປາງສົງຄາມ ແຕກໃສ່ ທ້າວ ໄລ, ຜູ້ເປັນລູກ, ເສຍຊິວິດຄາທີ່.

ອີງຕາມຂໍ້ມູນຈາກ ກະຊວງແຮງງານ ແລະ ສະຫວັດດີການສັງຄົມ ສປປ ລາວ ມີເນື້ອທີ່ລະເບີດ ທີ່ບໍ່ທັນແຕກ ທັງໝົດ 87.000 ກິໂລຕາ ແມັດ ຫຼື ຫຼາຍກວ່າ 8 ລ້ານເຮັກຕາ ຊຶ່ງຕະຫຼອດ 24 ປີ ນັບແຕ່ປີ 1996 ທີ່ມີການເລີ່ມ ເກັບກູ້ ຮອດປະຈຸບັນສາມາດເກັບກູ້ໄດ້ພຽງແຕ່ 60,910 ເຮັກຕາເທົ່າ ນັ້ນ, ມີປະຊາຊົນໄດ້ຮັບບາດເຈັບ 962 ຄົນ ແລະ ເສຍຊີວິດ 251 ຄົນ.

ດັ່ງນັ້ນ, ຝາກເຖິງພໍ່ແມ່ປະຊາຊົນ ໄລຍະນີ້ແມ່ນລະດູການ ເຮັດໄຮ່ ເຮັດສວນ ໃຫ້ມີຄວາມລະມັດລະວັງຕື່ມ ລູກລະເບີດລູກນີ້ອາດບໍ່ແມ່ນລູກສຸດທ້າຍທີ່ຫຼົງເຫຼືອແຕ່ປາງສົງຄາມ.

ຂ່າວ: ວຽງຈັນທາຍ

ພາບ: Bouneta Xaipaneya

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ