Vientiane Times Lao
ເກີດແຜ່ນດິນໄຫວ 3.2 ຣິກເຕີ ອີກແລ້ວ ຢູ່ແຂວງ ໄຊຍະບູລີ

ເກີດແຜ່ນດິນໄຫວ 3.2 ຣິກເຕີ ອີກແລ້ວ ຢູ່ແຂວງ ໄຊຍະບູລີ

ກົມອຸຕຸນິຍົມ ແລະ ອຸທົກກະສາດ ໄດ້ລາຍງານໃຫ້ຊາບວ່າ, ຢູ່ແຂວງ ໄຊຍະບູລີ ໄດ້ເກີດແຜ່ນດິນໄຫວ ອີກແລ້ວ ໂດຍມີຄວາມແຮງສັ່ນສະເທືອນວັດແທກໄດ້ 3.2 ຣິກເຕີ, ມີຄວາມເລິກຈາກໜ້າດິນ 4 ກິໂລແມັດ, ໃນເວລາ 13 ໂມງ 01 ນາທີ ຂອງວັນທີ 8 ກໍລະກົດ 2020.

ແຜ່ນດິນໄຫວດັ່ງກ່າວ ໄດ້ພົບສັນຍານການເກີດແຜ່ນດິນໄຫວ ຈໍານວນ 1 ຄັ້ງ ບໍລິເວນເຂດບ້ານ ສະລາ, ເມືອງ ໄຊສະຖານ, ແຂວງ ໄຊຍະບູລີ ເຊິ່ງຈຸດເກີດແຜ່ນດິນໄຫວ ແມ່ນໄກຈາກຕົວເມືອງ ໄຊສະຖານ ປະມານ 10 km ແລະ ແຜ່ນດິນໄຫວໃນຄັ້ງນີ້ ຍັງເປັນແຜ່ນດິນໄຫວຂະໜາດນ້ອຍ ບໍ່ມີຜົນເສຍຫາຍ.

ໃນເດືອນມີຖຸນາ ຜ່ານມານີ້, ເກີດແຜ່ນດິນໄຫວ ສອງຄັ້ງ ຢູ່ແຂວງ ໄຊຍະບູລີ ຄື ວັນທີ 23 ມີຖຸນາ 2020 ເຂດບ້ານ ສະແມດນ້ອຍ, ເມືອງ ໄຊສະຖານ, ເຊິ່ງ ຄວາມແຮງສັ່ນສະເທືອນວັດແທກໄດ້ 2.4 ຣິກເຕີ ແລະ ວັນທີ 30 ມີຖຸນາ 2020 ເຂດບ້ານປາກທຽວ, ເມືອງ ໄຊຍະບູລີ, ເຊິ່ງ ຄວາມແຮງສັ່ນສະເທືອນວັດແທກໄດ້ 2.4 ຣິກເຕີ.

ສະເພາະເດືອນກໍລະກົດນີ້, ເກີດແຜ່ນດິນໄຫວ ສາມຄັ້ງແລ້ວ ເຊັ່ນ: ວັນທີ 2 ກໍລະກົດ 2020 ຢູ່ເຂດບ້ານ ປາກລອງ, ເມືອງ ໄຊສະຖານ, ແຂວງ ໄຊຍະບູລີ, ຊຶ່ງຄວາມແຮງສັ່ນສະເທື່ອນວັດແທກໄດ້ 3.1 ຣິກເຕີ ແລະ ໃນມື້ດຽວກັນ ຢູ່ເຂດບ້ານ ແກ້ງນ້ອຍ,ເມືອງ ລ້ອງຊານ, ແຂວງ ໄຊສົມບູນ, ຊຶ່ງ ຄວາມແຮງສັ່ນສະເທືອນວັດແທກໄດ້ 2.6 ຣິກເຕີ ແລະ ມື້ວານນີ້ ຢູ່ເຂດບ້ານ ສະລາ, ເມືອງ ໄຊສະຖານ, ແຂວງ ໄຊຍະບູລີ, ຊຶ່ງຄວາມແຮງສັ່ນສະເທືອນວັດແທກໄດ້ 3.2 ຣິກເຕີ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ