ເຂດຊາຍແດນສາມຫຼ່ຽມເສດຖະກິດ ກຳປູເຈຍ-ລາວ-ຫວຽດນາມ (CLV) ທີ່ດ່ານສາກົນພູເກືອ ເມືອງພູວົງ ແຂວງອັດຕະປືອາດຈະກາຍເປັນຕົວເມືອງທັນສະໄໝໃນອະນາຄົດເພາະກະຊວງ ແຜນການ ແລະ ການລົງທຶນໄດ້ອະນຸຍາດໃຫ້ບໍລິສັດພັດທະນາອັດຕະປື ຄົບວົງຈອນ ຈໍາກັດເລີ່ມສໍາຫຼວດສຶກສາຄວາມເປັນໄປໄດ້ໃນການກໍ່ສ້າງພັດທະນາເຂດດັ່ງກ່າວແລ້ວ ໂດຍໄດ້ມີການເຊັນສັນຍາກັນເມື່ອມໍ່ໆມານີ້ ທີ່ນະຄອນຫຼວງວຽງຈັນ ລະຫວ່າງ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ສີພອນ ທອງຊະນິດ ປະທານບໍລິສັດພັດທະນາອັດຕະປື ຄົບວົງຈອນ ຈໍາກັດ.
ພາຍຫຼັງທີ່ມີການເຊັນສັນຍາ, ບໍລິສັດພັດທະນາຈະເລີ່ມດໍາເນີນການສຶກສາ, ສໍາຫຼວດອອກແບບ ກໍ່ສ້າງພັດທະນາເຂດດັ່ງກ່າວ ຊຶ່ງການພັດທະນາຈະເນັ້ນໃສ່ດ້ານການທ່ອງທ່ຽວ ແລະ ລະບົບການບໍລິການດ່ານ ເພື່ອສ້າງບົດວິພາກເສດຖະກິດ-ເຕັກນິກ (FS), ບົດປະເມີນຜົນກະທົບທາງດ້ານສິ່ງແວດລ້ອມ (ESIA) ແລະ ແຜນຄຸ້ມຄອງ ແລະ ຕິດຕາມກວດກາ ສິ່ງແວດລ້ອມ (EMMP) ເພື່ອສະເໜີໃຫ້ຂະແໜງການກ່ຽວຂ້ອງຂອງລັດຖະບານ ພິຈາລະນາຮັບຮອງຕາມກົດໝາຍ ແລະ ລະບຽບການ.
ຖ້າໂຄງການດັ່ງກ່າວ ໄດ້ຮັບການພັດທະນາໃນອະນາຄົດ ເມືອງພູວົງ ຈະກາຍເປັນຈຸດຍຸດທະສາດອັນສໍາຄັນ ໃນການຂັບເຄື່ອນການຂະຫຍາຍຕົວຂອງເສດຖະກິດ ຂອງແຂວງອັດຕະປື, ເປັນເມືອງເສດຖະກິດໃໝ່ ມີດ່ານການຄ້າສາກົນທີ່ທັນສະໄໝໃຫ້ເປັນປະຕູການຄ້າ ແລະ ທ່ອງທ່ຽວ ແບບປະສົມປະສານກັບວັດທະນະທໍາທ້ອງຖິ່ນ, ທໍາມະຊາດ ແລະ ກະສິກໍາ, ທັງເປັນການກໍານົດນະໂຍບາຍການພັດທະນາຂອງແຂວງ ກໍຄື ພັກ-ລັດຖະບານ ຕາມແນວທາງນະໂຍບາຍ ຂອງພັກ ແລະ ລັດຖະບານ.
ຂ່າວ-ພາບ: ສຸກສະຫວັນ
