Vientiane Times Lao
ເຈົ້າແຂວງສະຫວັນນະເຂດເນັ້ນໃຫ້ ເຂັ້ມງວດໃນການກວດຄົນເຂົ້າ-ອອກຢູ່ດ່ານ ຊາຍແດນ ລາວ-ຫວຽດ

ເຈົ້າແຂວງສະຫວັນນະເຂດເນັ້ນໃຫ້ ເຂັ້ມງວດໃນການກວດຄົນເຂົ້າ-ອອກຢູ່ດ່ານ ຊາຍແດນ ລາວ-ຫວຽດ

ເຈົ້າແຂວງສະຫວັນນະເຂດ ທ່ານສັນຕິພາບ ພົມວິຫານ ໄດ້ລົງເຄື່ອນໄຫວຢຽ້ມຢາມ ດ່ານສາກົນແດນສະຫວັນ- ລາວບາວ ເມື່ອບໍ່ດົນມານີ້ ໂດຍທ່ານໄດ້ເນັ້ນໃຫ້ເຈົ້າໜ້າທີ່ທຸກພາກສ່ວນຢູ່ດ່ານ ສາກົນແດນສະຫວັນ -ລາວບາວ ໃຫ້ເພີ່ມທະວີໃຫ້ເຂັ້ມງວດຂຶ້ນກວ່າເກົ່າໃນການກວດຄົນເຂົ້າ- ອອກດ່ານ, ໃນການປ້ອງກັນ, ຄວບຄຸມ ແລະ ແກ້ໄຂການແຜ່ການລະບາດຂອງພະຍາດ ໂຄວິດ-19 ຍ້ອນວ່າດ່ານດັ່ງກ່າວເປັນດ່ານທີ່ເຊື່ອມຕໍ່ກັບປະເທດຫວຽດນາມ, ຍ້ອນວ່າປະຈຸບັນນີ້ໄດ້ມີການແຜ່ລະບາດເປັນຮອບທີ 2 ຂອງພະຍາດໂຄວິດ-19 ຢູ່ຫວຽດນາມ, ນອກນັ້ນ ຢູ່ໃນຫຼາຍປະເທດກໍຍັງມີການລະບາດຂອງພະຍາດນີ້ເປັນວົງກວ້າງ.

ທ່ານສັນຕິພາບ ພົມວິຫານ ໄດ້ກ່າວວ່າ: ສປປ ລາວ ເຊິ່ງມີຫຼາຍແຂວງທີ່ມີຊາຍແດນຕິດກັບ ສສ ຫວຽດນາມແຕ່ເໜືອຮອດໃຕ້, ດັ່ງນັ້ນ, ໃຫ້ທຸກພາກສ່ວນຈົ່ງເອົາໃຈໃສ່ໃນການປະຕິບັດຕາມແຈ້ງການ ແລະ ມາດຕະການຕ່າງໆ ທີ່ທາງສູນກາງກໍ່ ຄືແຂວງວາງອອກຢ່າງເຄັ່ງຄັດ, ເຖິງແມ່ນວ່າຈະພົບຄວາມ ຫຍຸ້ງຍາກ ເນື່ອງຈາກວ່າຈຳນວນເຈົ້າໜ້າທີ່ຍັງມີໜ້ອຍ, ບໍ່ສາມາດກວດກາລາດຕະເວນໄດ້ຢ່າງທົ່ວເຖິງ ໄດ້ເຮັດໃຫ້ມີຜູ້ລັກລອບເຂົ້າມາຕາມເຂດຊາຍແດນໂດຍບໍ່ຖືກຕ້ອງຕາມລະບຽບກົດໝາຍ ເຊິ່ງກໍ່ມີຄວາມສ່ຽງທີ່ຈະນຳເຊື້ອພະຍາດດັ່ງກ່າວເຂົ້າມາໄດ້, ດັ່ງນັ້ນ, ຮຽກຮ້ອງໃຫ້ເຈົ້າໜ້າທີ່ປະຈຳດ່ານ ແລະ ເມືອງວິລະບູລີ, ເມືອງເຊໂປນ, ເມືອງນອງ ຕ້ອງໄດ້ກວດກາຄືນບັນຫາຄົນຕ່າງດ້າວ ທີ່ເຂົ້າມາອາໄສຢູ່ ຫຼື ປະກອບອາຊີບ ໂດຍໃຫ້ຮູ້ລະອຽດວ່າຢູ່ແຂວງສະຫວັນນະເຂດຍັງມີຫຼາຍປານໃດ, ມີໜັງສືຖືກຕ້ອງບໍ່, ໝົດກຳນົດ ຫຼື ຍັງ, ກວດຄືນຄົນຂັບລົດຂົນສົ່ງສິນຄ້າ, ລົດບໍລິສັດຕ່າງປະເທດມີເທົ່າໃດ ເພື່ອໃຫ້ມີຄວາມສະດວກ ໃນການຄຸ້ມຄອງ, ການຕິດຕາມ ກວດກາຕ່າງໆ, ຖ້າຫາກພົບເຫັນກໍລະນີທີ່ເຂົ້າມາໂດຍບໍ່ຖືກຕ້ອງ ກໍ່ຕ້ອງປະສານຫາ ເຈົ້າໜ້າທີ່ທາງຝ່າຍຫວຽດນາມ ເພື່ອນຳສົ່ງ ແລະ ມອບຄືນ ຢ່າງເປັນທາງການ.

ຂ່າວ-ພາບ: ສພຂ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ