ອີງຕາມແຫຼ່ງຂ່າວຈາກແຂວງຫຼວງນ້ຳທາ ເມື່ອບໍ່ດົນມານີ້, ທ່ານ ວຽງສະຫວັດ ສີພັນດອນ ເຈົ້າແຂວງໆຫຼວງນໍ້າທາ ພ້ອມດ້ວຍຄະນະຮັບຜິດຊອບໄພພິບັດ ຂັ້ນແຂວງ, ຂັ້ນເມືອງ ໄດ້ລົງມອບເຄື່ອງຊ່ວຍເຫຼືອໃຫ້ຜູ້ປະສົບໄພ ນໍ້າຖ້ວມ ຢູ່ເມືອງນາແລ ແຂວງຫຼວງນໍ້າທາ.
ໃນໂອກາດດັ່ງກ່າວ, ທ່ານ ບຸນຈັນ ສຸດທິປັນຍາ ເຈົ້າເມືອງ ນາແລ ໄດ້ລາຍງານສະພາບລວມຜົນເສຍຫາຍຈາກໄພພິບັດນໍ້າຖ້ວມ, ການແກ້ໄຂເບື້ອງຕົ້ນ, ການຕິດຕາມ ສະຖານະການຫຼັງຈາກນໍ້າບົກແຫ້ງ. ຄະນະຮັບຜິດຊອບ ໄພພິບັດຂັ້ນເມືອງໄດ້ລົງສົມທົບກັບອໍານາດການປົກຄອງບ້ານ, ເກັບກໍາຂໍ້ມູນໃນເບື້ອງຕົ້ນ. ເມືອງນາແລ ໄດ້ຮັບຜົນ ກະທົບຈາກໄພພິບັດນໍ້າຖ້ວມ ໃນລະຫ່ວາງ ວັນທີ 9 -11 ກັນຍາ 2024 ມີທັງໝົດ 14 ບ້ານ, ມີ 199 ຄອບຄົວ ທີ່ຢູ່ລຽບສາຍນໍ້າທາ, ບ້ານທີ່ໄດ້ຮັບຜົນກະທົບຫຼາຍກ່ວາໝູ່ມີ 3 ບ້ານ ຄື: ບ້ານ ທົ່ງຖອນ, 96 ຄອບຄົວ, ບ້ານ ພູລາ 42 ຄອບຄົວ , ບ້ານ ສາງອາກ 34 ຄອບຄົວ, ມີໂຮງຮຽນ 2 ແຫ່ງຄື: ໂຮງຮຽນ ມສ ເມືອງ, ໂຮງຮຽນ ມຕ ພູລາ.
ເຄື່ອງທີ່ນໍາມາມອບໃນຄັ້ງນີ້ ປະກອບມີ ເຂົ້າສານ, ອາຫານແຫ້ງ, ເຄື່ອງນຸ່ງຫົ່ມ ແລະ ນໍ້າດື່ມ ມອບໂດຍ ທ່ານ ວຽງສະຫວັດ ສີພັນດອນ ແລະ ຕາງໜ້າຮັບ ໂດຍອໍານາດການປົກຄອງບ້ານທີ່ຖືກໄພພິບັດ.
ທ່ານ ວຽງສະຫວັດ ສີພັນດອນ ໄດ້ມອບໃຫ້ອໍານາດການ ປົກຄອງບ້ານ, ອົງການຈັດຕັ້ງຂັ້ນບ້ານທຸກຂັ້ນນໍາເອົາ ເຄື່ອງທີ່ນໍາມາມອບໃນຄັ້ງນີ້ ໄປແຈກຢາຍໃຫ້ພໍ່ແມ່ ປະຊາຊົນໃຫ້ທົ່ວເຖິງ, ຊີ້ນໍາໃຫ້ອໍານາດການປົກຄອງບ້ານ ລະດົມພໍ່ແມ່ປະຊາຊົນອອກແຮງງານລວມ, ອະນາໄມເຮືອນ ຊານບ້ານຊ່ອງ, ມ້ຽນມັດສິ່ງເສດເຫຼືອຕ່າງໆໃຫ້ສະອາດ ງາມຕາ ເພື່ອຮັກສາສິ່ງແວດລ້ອມ ແລະ ຟື້ນຟູຊິວິດການເປັນຢູ່ໃຫ້ດີຂຶ້ນ.
