ເຈົ້າໜ້າທີ່ກອງບັນຊາການ ປກສ ເມືອງວັງວຽງ ແຂວງວຽງຈັນໄດ້ກັກຕົວເປົ້າໝາຍ 8 ຄົນ (ສັນຊາດຫວຽດນາມທັງໝົດ) ທີ່ກ່ຽວຂ້ອງເຮັດໃຫ້ນັກທ່ອງທ່ຽວເສຍຊີວິດຢູ່ເມືອງວັງວຽງ ແຂວງວຽງຈັນ ໃນວັນທີ 12 ພະຈິກ 2024 ທີ່ຜ່ານມາ ຍ້ອນດື່ມສານປົນເປື້ອນ Mathanol.
8 ຄົນດັ່ງກ່າວລວມມີ ທ້າວ ເຢືອງວັນຮ່ວນ ອາຍຸ 34 ປີ ອາຊີບ ນັກທຸລະກິດ;
ທ້າວ ຫງຽນແມນຮຸ່ງ ອາຍຸ 38 ປີ ອາຊີບກຳມະກອນ; ທ້າວ ບູຍວັນດັດ ອາຍຸ 35 ປີ ອາຊີບ ກຳມະກອນ; ທ້າວ ຟາມດຶງຈິງ ອາຍຸ 42 ປີ ອາຊີບ ກຳມະກອນ; ທ້າວ ຈິກກັວກຕ່ວນ ອາຍຸ 23 ປີ ອາຊີບ ກໍາມະກອນ;
ທ້າວ ເຢືອງດຶກຕ່ວນ ອາຍຸ 47 ປີ ອາຊີບ ກໍາມະກອນ; ທ້າວ ຫງຽງຊຸຍແອ້ງ ອາຍຸ 28 ປີ ອາຊີບກໍາມະກອນ; ທ້າວ ກວາງຊຸງ ອາຍຸ 44 ປີ ອາຊີບກໍາມະກອນ ຊຶ່ງທັງໝົດແມ່ນ ພັກເຊົາຢູ່ບ້ານ ວຽງແກ້ວ ເມືອງວັງວຽງ ແຂວງວຽງຈັນ.
ສະເພາະຜົນການສືບສວນ-ສອບສວນເບື້ອງຕົ້ນ ກ່ຽວກັບນັກທ່ອງທ່ຽວຕ່າງປະເທດເສຍຊີວິດດັ່ງກ່າວນັ້ນ, ພັທ ບົວທອງ ບໍລິບານ ຫົວໜ້າກອງບັນຊາການ ປກສ ເມືອງວັງວຽງ ແຂວງວຽງຈັນ ໄດ້ໃຫ້ສໍາພາດຕໍ່ສື່ມວນຊົນປ້ອງກັນຄວາມສະຫງົບ ໃນວັນທີ 25 ພະຈິກ 2024 ວ່າ: ການສືບສວນ-ສອບສວນ ສາເຫດໃນເບື້ອງຕົ້ນຂອງການເສຍຊີວິດນັກທ່ອງທ່ຽວ ຄາດວ່າ ຍ້ອນການດື່ມສິ່ງມຶນເມົາຕ່າງໆ. ສ່ວນການສືບສວນ-ສອບສວນຫາສາເຫດທີ່ແທ້ຈິງນັ້ນແມ່ນຍັງຢູ່ໃນຂັ້ນຕອນຂອງການປະສານສົມທົບກັບກະຊວງ, ກົມ, ອົງການ ແລະ ພາກສ່ວນທີ່ກ່ຽວຂ້ອງ ເກັບກໍາຂໍ້ມູນ ແລະ ເກັບຕົວຢ່າງຕ່າງໆ ເພື່ອຊອກຄົ້ນຫາຂໍ້ມູນຕ່າງໆ ທີ່ຍັງບໍ່ທັນຈະແຈ້ງກ່ຽວກັບເຫດການການເສຍຊີວິດໃຫ້ມີຄວາມຊັດເຈນໂດຍໄວ ບົນພື້ນຖານຂອງການກວດກາ, ຢັ້ງຢືນຜົນຂອງການວິໄຈທາງດ້ານວິທະຍາສາດ.
ພັທ ບົວທອງ ບໍລິບານ ໄດ້ກ່າວຕື່ມວ່າ: ເຮືອນພັກທີ່ເກີດເຫດດັ່ງກ່າວ ແມ່ນໄດ້ປິດການໃຫ້ບໍລິການ ແລະ ໄດ້ນໍາຕົວເປົ້າໝາຍຄື ຜູ້ບໍລິຫານພາຍໃນໂຮງແຮມ ແລະ ກຳມະກອນ ຈໍານວນ 8 ຄົນ ເພື່ອດໍາເນີນການສືບສວນ-ສອບສວນຕາມຂັ້ນຕອນ ກົດໝາຍ. ຕໍ່ເຫດການດັ່ງກ່າວ, ມາຮອດວັນທີ 26 ພະຈິກ 2024 ມີຜູ້ເສຍຊີວິດຈາກເຫດການທີ່ກ່ຽວຂ້ອງກັບການດື່ມສານປົນເປື້ອນ Mathanol ແລ້ວ 6 ຄົນ, ໃນນັ້ນມີ: ນັກທ່ອງທ່ຽວສັນຊາດ ເດັນມາກ 2 ຄົນ, ອາເມຣິກາ 1 ຄົນ, ອັງກິດ 1 ຄົນ, ແລະ ອົດສະຕຣາລີ 2 ຄົນ (ທີ່ໄດ້ນຳສົ່ງໄປປົວຢູ່ໄທ ແລະ ໄດ້ເສຍຊີວິດເວລາຕໍ່ມາ)
ແຫຼ່ງຂໍ້ມູນ: ປ້ອງກັນຄວາມສະຫງົບ
