ໝາກຜົນເບື້ອງຕົ້ນຂອງການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃນໄລຍະ 3 ເດືອນຜ່ານມາ, ເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານຢາເສບຕິດໄດ້ສົມທົບກັບພາກສ່ວນທີ່ກ່ຽວຂ້ອງສາມາດມ້າງຄະດີຢາເສບ ຕິດ ໃນຂອບເຂດທົ່ວປະເທດໄດ້ 1.106 ເລື່ອງ, ຢຶດຢາຢ່າໄດ້ 101.586.361 ເມັດ ເທົ່າກັບ 10.158,63 ກິໂລກຣາມ ແລະ ຢາເສບຕິດປະເພດອື່ນໆ ອີກ ຈຳນວນໜຶ່ງ.
ພັອ ປອ ບົວພັນ ພອງມະນີ ຮອງຫົວໜ້າກົມໃຫຍ່ຕຳຫຼວດ ກະຊວງ ປກສ ໃຫ້ສໍາພາດຕໍ່ສື່ມວນຊົນ ເມື່ອບໍ່ດົນມານີ້ ວ່າ: ໃນໄລຍະ 3 ເດືອນຜ່ານມາ (ແຕ່ເດືອນ ສິງຫາ – ເດືອນ ຕຸລາ 2021), ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດໄດ້ສົມທົບກັບພາກສ່ວນທີ່ກ່ຽວຂ້ອງ ສາມາດມ້າງຄະດີຢາເສບຕິດ ໃນຂອບເຂດທົ່ວປະເທດໄດ້ 1.106 ເລື່ອງ, ຈັບຜູ້ຕ້ອງຫາ ໄດ້ 1.562 ຄົນ (ຍິງ 176 ຄົນ), ໃນນີ້ ຕ່າງປະເທດ 42 ຄົນ (ຍິງ 02ຄົນ), ຢຶດຢາບ້າ ໄດ້ 10.158,63 ກິໂລກຣາມ, ຢາໄອສ 1.593,07 ກິໂລກຣາມ, ເຮໂຣອິນ 10,88 ກຣາມ, ກັນຊາ 3.036 ກິໂລກຣາມ, ຢາຝິ່ນ 544,4 ກິໂລກຣາມ, ຢາອີ 44,4 ກິໂລກຣາມ, ແປ້ງຝຸ່ນປະສົມຢາເສບຕິດ 21,1 ກິໂລກຣາມ, ຢຶດລົດໃຫຍ່ໄດ້ 32 ຄັນ, ລົດຈັກ 216 ຄັນ, ອາວຸດປືນ 5 ກະບອກ, ລູກປືນ 117 ລຸກ.
ພັອ ປອ ບົວພັນ ພອງມະນີ ໄດ້ກ່າວອີກວ່າ: ຄະດີເດັ່ນໃນໄລຍະ 3 ເດືອນຜ່ານມາ ມີ 4 ເລື່ອງ ຄື: ໃນວັນທີ 13 ກັນຍາ 2021 ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ແຂວງຄຳມ່ວນ ຢຶດຄັນຊາໄດ້ 32 ເປົາ ນ້ຳໜັກ 1.319 ກິໂລກຣາມ ທີ່ຂົນສົ່ງມາດ້ວຍລົດ ແລະຈັບຜູ້ຕ້ອງຫາ ໄດ້ 2 ຄົນ.
ໃນວັນທີ 20 ຕຸລາ 2021 ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ແຂວງ ບໍ່ແກ້ວ ໄດ້ສະກັດກວດກາລົດເປົ້າໝາຍຂົນສົ່ງຢາເສບຕິດມາແຕ່ເມືອງຕົ້ນເຜິ້ງ ມາຮອດເຂດບ້ານອຸດົມ ເມືອງຫວຍຊາຍ ແຂວງບໍ່ແກ້ວ ຜ່ານການກວດຄົ້ນລົດຄັນດັ່ງກ່າວ ພົບຢາບ້າທີ່ຊຸກເຊື່ອງຢູ່ໃນລົດ ແລະ ທ້າຍກະບະລົດມີຈຳນວນ 50 ເປົາ ນໍ້າໜັກ 1.000 ກິໂລກຣາມ.
ໃນວັນທີ 25 ຕຸລາ 2021 ເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານຢາເສບຕິດ ແຂວງບໍ່ແກ້ວ ໄດ້ສະກັດກວດກາລົດເປົ້າໝາຍຂົນສົ່ງຢາເສບຕິດ ຢູ່ເຂດບ້ານສີເມືອງງາມ ເມືອງຕົ້ນເຜິ້ງ ແຂວງບໍ່ແກ້ວ, ຜ່ານການກວດຄົ້ນລົດຄັນດັ່ງກ່າວ ພົບຢາບ້າທີ່ຊຸກເຊື່ອງຢູ່ໃນລົດ 3.000 ມັດ ນ້ຳໜັກ 720 ກິໂລກຼາມ ແລະ ວັນທີ 27 ຕຸລາ 2021 ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ແຂວງບໍ່ແກ້ວ ສົມ ທົບພາກສ່ວນ ທີ່ກ່ຽວຂ້ອງໄດ້ກວດກາພາຫະນະລົດບັນທຸກ 12 ລໍ້ ຢູ່ເຂດຈຸດກວດກາບ້ານປຸງ ເມືອງຫ້ວຍຊາຍ ແຂວງບໍ່ແກ້ວ, ຜ່ານການກວດຄົ້ນລົດຄັນດັ່ງກ່າວ ພົບຢາບ້າທີ່ຊຸກເຊື່ອງຢູ່ໃນລົດ 262 ເປົາມີ 27.832 ມັດ ເທົ່າກັບ 55.664.000 ເມັດ, ຢາໄອສ 1.537 ຫໍ່ ໜັກ 1.537 ກິໂລກຣາມ ແລະ ກັກຜູ້ຕ້ອງຫາ 2 ຄົນ.
ຂໍ້ມູນຂ່າວ: ປກສ
