Vientiane Times Lao
ເຈົ້າໜ້າທີ່ມອບເຄື່່ອງທີ່ຖືກລັກຄືນໃຫ້ເຈົ້າຂອງ

ເຈົ້າໜ້າທີ່ມອບເຄື່່ອງທີ່ຖືກລັກຄືນໃຫ້ເຈົ້າຂອງ

ເຈົ້າໜ້າທີ່ແກ້ໄຂປະກົດການຫຍໍ້ທໍ້ ແຂວງບໍລິຄໍາໄຊ ໄດ້ມອບເຄື່່ອງທີ່ຖືກລັກ ລວມມູນຄ່າ 500 ລ້ານກ່ວາກີບຄືນໃຫ້ເຈົ້າຂອງຊັບທີ່ເມືອງຄໍາເກີດ ແຂວງ ບໍລິຄໍາໄຊ ເມື່ອບໍ່ດົນມານີ້.

ເຄື່ອງຂອງກາງທີ່ນໍາມາມອບຄືນໃຫ້ເຈົ້າຂອງໃນຄັ້ງນີ້ລວມມີ ໂທລະພາບ 12 ໜ່ວຍ, ສາຍໄຟຟ້າ, ອຸປະກອນໄຟຟ້າ, ສາຍທອງແດງ, ແຜ່ນທອງເຫຼືອງ ນໍ້າໜັກ 2.062 ກິໂລກຣາມ, ໜ້າຈໍາຄອມພິເຕີ 1 ໜ່ວຍ, ແຮ່ຄໍາຈໍານວນ 92 ກິໂລ, ຈັກປັ່ນໄຟຂະໜາດນ້ອຍ 7 ເຄື່ອງ, ເຫຼັກແຜ່ນຈໍານວນ 11 ແຜ່ນ ແລະ ອື່ນໆ ລວມມູນຄ່າເສຍຫາຍທັງໝົດປະມານ 500 ກວ່າລ້ານກີບ.

ເຈົ້າໜ້າທີ່ແກ້ໄຂປະກົດການຫຍໍ້ທໍ້ ແຂວງບໍລິຄໍາໄຊ ແຈ້ງໃຫ້ຮູ້ວ່າ ໃນເດືອນເມສາ ທີ່ຜ່ານມາ ໄດ້ສືບສວນ ແລະ ເກັບກຳຂໍ້ມູນທີ່ກ່ຽວຂ້ອງກັບຄະດີລັກຊັບ, ມາຮອດວັນທີ່ 1 ພືດສະພາ 2020 ເຈົ້າໜ້າທີ່ສາມາດກັກຕົວກຸ່ມຄົນຂີ້ລັກມາດໍາເນີນຄະດີ, ສ່ວນເຄື່ອງເສຍຫາຍຜ່ານ ການສືບສວນ-ສອບສວນ ພວກກ່ຽວຮັບສາລະພາບວ່າໄດ້ຮ່ວມກັນລັກຊັບຂອງບໍລິສັດບໍ່ຄຳ, ຄໍາເກີດ-ແສນອຸດົມ. ຄະດີກັ່ງກ່າວເຈົ້າໜ້າທີ່ສາມາດກັກຕົວຜູ້ຕ້ອງສົງໄສລັກຊັບພົນລະເມືອງ ໄດ້ທັງທັງໝົດ 8 ຄົນ ແລະ ປະຈຸບັນກໍາລັງດໍາເນີນການສືບສວນ-ສອບສວນ ເພື່ອ ລົງໂທດຕາມລະບຽບກົດໝາຍ.

ຂ່າວ: ເພັດໂພໄຊ

Related Articles

Leave a Reply