Vientiane Times Lao
 ເຈົ້າໜ້າທີ່ວາງກໍາລັງ 61 ຈຸດ ໃນຊຽງຂວາງ ເກມ

 ເຈົ້າໜ້າທີ່ວາງກໍາລັງ 61 ຈຸດ ໃນຊຽງຂວາງ ເກມ

ເຈົ້າໜ້າທີ່ປ້ອງກັນຄວາມສະຫງົບ ແຂວງຊຽງຂວາງ ໄດ້ຈັດວາງກໍາລັງ 61 ຈຸດ ໃນນີ້ ຈຸດແຂ່ງຂັນ 13 ຈຸດ, ບ່ອນພັກເຊົານັກກິລາ ແລະ ຄູຝຶກ 18 ຈຸດ, ຈຸດບັນຊາ ແລະ ວຽກງານວິຊາສະເພາະ 8 ຈຸດ ແລະ ຈຸດພື້ນຖານໂຄງລ່າງຕ່າງໆ 22 ຈຸດ ເພື່ອປ້ອງກັນຄວາມສະຫງົບ ໃຫ້ແກ່ງານມະຫາກໍາກິລາແຫ່ງຊາດ ຄັ້ງທີ11 ຫຼື ຊຽງຂວາງ ເກມ ຈະຈັດຂຶ້ນໃນລະຫວ່າງວັນທີ 13 -22 ທັນວາ 2022 ນີ້.

ທ່ານ ພົຈວ ບຸນລົດ ຄໍາແພງພັນ ຫົວໜ້າກອງບັນຊາການ ປກສ ແຂວງຊຽງຂວາງ ໄດ້ກ່າວວ່າ: ມາຮອດປະຈຸບັນ, ການກະກຽມແຜນບັນຈຸກໍາລັງເຂົ້າປ້ອງກັນແຕ່ລະຈຸດຖືວ່າໄດ້ສຳເລັດ ເພື່ອຮັບປະກັນຄວາມສະຫງົບ-ປອດໄພ 100% ໃຫ້ງານຄັ້ງນີ້ ເປັນຕົ້ນວຽກງານຈະລາຈອນ, ວຽກງານດັບເພີງ ແລະ ວຽກງານກ້ອງວົງຈອນປິດ ແລະ ວຽກງານອື່ນໆ ອີກ ພ້ອມກັນນັ້ນ ຍັງໄດ້ເຮັດວຽກເກັບກໍາສະພາບ ແລະ ແກ້ໄຂສະພາບຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍ ໂດຍສະເພາະຈຸດມົ້ວສຸມສິ່ງເສບຕິດ, ຄົນເລ່ລ່ອນ ເພື່ອຄວາມເປັນລະບຽບຮຽບຮ້ອຍ ແລະ ຮັບປະກັນຄວາມເບີກບານມ່ວນຊື່ນ ໃນງານກິລາຄັ້ງນີິ້.

ສໍາລັບ ການແຂ່ງຂັນກິລາໃນງານຊຽງຂວາງ ເກມ ຄັ້ງນີ້ ມີທັງໝົດ 5 ຈຸດຄື: ສະໜາມທົ່ງໄຫຫີນ (ເປັນສະໜາມເປີດ-ປິດ ການແຂ່ງຂັນ), ສະໜາມໄຊຊະນະ (ບ້ານໂພນມີໄຊ), ສະໜາມວິທະຍາໄລຄູຄັງໄຂ, ສະໜາມຮົ່ມສວນມອນ (ບ້ານໂງຍ) ແລະ ສະໜາມຍິງປືນ ໂຮງຮຽນນາຍສິບ ປກສ ແຂວງ. ແຫຼ່ງຂ່າວ: ຄວາມສະຫງົບ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ