Visit BigblueAgency
ເຈົ້າໜ້າທີ່ແຂວງຫຼວງນໍ້າທາ ກຽມພ້ອມໃນການປ້ອງກັນຄວາມສະຫງົບ ໃນໄລຍະປີໃໝ່ລາວ

ເຈົ້າໜ້າທີ່ແຂວງຫຼວງນໍ້າທາ ກຽມພ້ອມໃນການປ້ອງກັນຄວາມສະຫງົບ ໃນໄລຍະປີໃໝ່ລາວ

ພະແນກຕຳຫຼວດຈະລາຈອນ ປ້ອງກັນຄວາມສະຫງົບ ແຂວງຫຼວງນໍ້າທາ ໄດ້ສ້າງແຜນວຽກ ບັນຈຸກຳລັງປະຈຳປ້ອມບ່ອນທີ່ມີການສັນຈອນແອອັດຢູ່ 6 ຈຸດ ເປັນຕົ້ນ ປະຈຳຢູ່ຫ້ອງການເພື່ອລໍຖ້າແກ້ໄຂວຽກງານຕ່າງໆ, ປ້ອມຕະຫຼາດກະສິກຳແຂວງ, ປ້ອມຂົວວັງເງິນ, ຈຸດບ້ານທົ່ງດີ, ຈຸດຈັບຄວາມໄວຢູ່ບ້ານວຽງເໜືອ ແລະ ຈຸດບ້ານໂພນໄຊສະຫວ່າງ, ເຊິ່ງແຕ່ລະຈຸດມີພະນັກງານຈະລາຈອນ ປະຈໍາຢູ່ 5 ທ່ານ ພ້ອມກັບຊາວໜຸ່ມອາສານັກຮຽນໂຮງຮຽນເທສະບານແຂວງ 2 ຄົນ, ໃນມື້ໜຶ່ງມີພະນັກງານປະຕິບັດງານ ແລະ ປະຈຳການຕົວຈິງ 45 ທ່ານ ໂດຍໄດ້ເລີ່ມປະຕິບັດງານແຕ່ 8:30 ໂມງ ຫາ 22:30 ໂມງ ປັດຈຸບັນແມ່ນກຽມພ້ອມ 100%.

ທ່ານ ພັນຕີ ອິນຫົງ ຂຽນທະວົງ ຮອງຫົວໜ້າພະແນກຕຳຫຼວດຈະລາຈອນ ປກສ ແຂວງຫຼວງນໍ້າທາໄດ້ສຳພາດ ຕໍ່ສື່ມວນຊົນເມື່ອມໍ່ໆມານີ້ ວ່າ: ເພື່ອເຮັດໃຫ້ການສົ່ງທ້າຍປີເກົ່າ ພສ 2566 ແລະ ຕ້ອນຮັບປີໃໝ່ລາວ ພສ 2567 ໃຫ້ມີຄວາມສະຫງົບ ແລະ ປອດໄພ ໃນການສັນຈອນຕາມເສັ້ນທາງຫຼວງ ພະແນກຕຳຫຼວດຈະລາຈອນ ປກສ ແຂວງຫຼວງນໍ້າທາ ໄດ້ກຳນົດແຜນລະອຽດຄົບຖ້ວນ ຖ້າຫາກກວດກາພົບເຫັນຜູ້ລະເມີດກົດລະບຽບການສັນຈອນ ເປັນຕົ້ນ ການດັດແປງສະພາບເຕັກນິກລົດ, ສຽງດັງເກີນຂອບເຂດ ຈະໄດ້ກັກໄວ້ແລ້ວບຸນປີໃໝ່ຈຶ່ງແກ້ໄຂ ພ້ອມທັງ ຮຽກຮ້ອງໃຫ້ຜູ້ໃຊ້ລົດໃຊ້ຖະໜົນຈົ່ງພ້ອມກັນປະຕິບັດກົດລະບຽບການສັນຈອນໃຫ້ຖືກຕ້ອງ, ຫຼິ້ນບຸນຢ່າງມີຄວາມສຸກ ແລະ ຕະຫຼອດປອດໄພໃນການສັນຈອນ.

ຂ່າວ: ສົມພອນ ຂຸນດາວົງ

 

Related Articles

Leave a Reply