ເຈົ້າໜ້າທີ່ຕໍາຫຼວດຈາລະຈອນ ນະຄອນຫຼວງວຽງຈັນ ຈະນໍາໃຊ້ກໍາລັງ ເກືອບ 500 ຄົນ ປະຈໍາຢູ່ຈຸດຕ່າງໆ ທັງວົງໃນ ແລະ ວົງນອກ ຈໍານວນ 124 ຈຸດ ເພື່ອຮັບປະກັນຄວາມສະຫງົບ-ປອດໄພ ແລະ ຄວາມເປັນລະບຽບຮຽບຮ້ອຍ, ຮັບປະກັນຄວາມເບີກບານມ່ວນຊື່ນ ແລະ ຮັບປະກັນໄດ້ທາງດ້ານຮີດຄອງປະເພນີ ອັນດີງາມຂອງຊາດລາວເຮົາ ໃນໄລຍະງານບຸນນະມັດສະການພຣະທາດຫຼວງວຽງຈັນ, ຊຶ່ງຈະເປີດເປັນທາງການໃນວັນທີ 23 ພະຈິກ ປີ 2023 ແລະ ປີດໃນວັນທີ 27 ພະຈິກ ປີ 2023.ສໍາລັບ ການວາງກໍາລັງ 124 ຈຸດ ປະກອບມີ: ຈຸດວົງໃນຢູ່ຕາມທາງຮ່ອມອ້ອມຮອບເດີ່ນທາດຫຼວງ 69 ຈຸດ, ຈຸດວົງນອກ 40ຈຸດ, ຈຸດປະຈໍາການຄອຍເຫດຕະຫຼອດ 24 ຊົ່ວໂມງ 10 ຈຸດ, ປ້ອມປະຕູເຂົ້າ-ອອກເມືອງ ລະຫວ່າງແຂວງຕໍ່ແຂວງ 4 ປ້ອມ, ພ້ອມນັ້ນ ເຈົ້າໜ້າທີ່ ຍັງໄດ້ຕັ້ງບູດໂຄສະນາເຜີຍແຜ່ກົດລະບຽບຈາລະຈອນພາຍໃນງານບຸນ 1 ບູດ ເພື່ອໂຄສະນາເຜີຍແຜ່ກົດລະບຽບການສັນຈອນທາງບົກ ເພື່ອປູກຝັງຈິດສໍານຶກການຂັບຂີ່ທີ່ປອດໄພ ແລະ ຖືກຕ້ອງຕາມລະບຽບການ, ນອກຈາກນັ້ນ ເຈົ້າໜ້າທີ່ ຍັງກຽມພ້ອມທີມລົດລາກແກ່ໄວ້ໃນກໍລະນີມີອຸບັດເຫດ ລົດຕໍາກັນເກີດຂຶ້ນເພື່ອແກ້ໄຂຢ່າງທັນການ.
