Vientiane Times Lao
ເຈົ້າໝ້າທີ່ລາວ ແລະ ອາຊຽນ ປຶກສາຫາລື ເພື່ອສະກັດກັ້ນການລັກລອບຂົນສົ່ງຢາເສບຕິດຢູ່ສະໝາມບິນ

ເຈົ້າໝ້າທີ່ລາວ ແລະ ອາຊຽນ ປຶກສາຫາລື ເພື່ອສະກັດກັ້ນການລັກລອບຂົນສົ່ງຢາເສບຕິດຢູ່ສະໝາມບິນ

ກອງປະຊຸມໜ່ວຍງານສະເພາະກິດ ເພື່ອສະກັດກັ້ນລັກລອບ ຂົນສົ່ງຢາເສບຕິດ ຢູ່ສະໜາມບິນ ຂອງປະເທດສະມາຊິກ ອາຊຽນຄັ້ງທີ 9 (The 9th ASEAN Airport interdiction Task Force) ໄດ້ຈັດຂຶ້ນໃນວັນທີ 28 ພະຈິກ 2019 ທີ່ນະຄອນຫຼວງ ວຽງຈັນ ໂດຍພາຍໃຕ້ການເປັນປະທານຮ່ວມ ຂອງທ່ານ ພັທ ພຸດສະຫວາດ ສູນທະລາ, ຮອງຫົວໜ້າຫ້ອງການກວດກາ ແລະ ຄອບຄຸມຢາເສບຕິດກະຊວງປ້ອງກັນຄວາມສະຫົງບ ແລະ ທ່ານ ມອດຊາອີມ ໄຊນີ, ເຈົ້າໜ້າທີອາວຸໂສ ກອງເລຂາອາຊຽນ ແລະ ມີຄະນະຜູ້ແທນຈາກ 10 ປະເທດສະມາຊິກອາຊຽນ. ກອງປະ ຊຸມດັ່ງກ່າວມີຜູ້ເຂົ້າຮວ່ມທັງໝົດ 30 ກວ່າທ່ານ ແລະ ກອງປະ ຊຸມນີ້ໄດ້ມີການໜູນວຽນກັນເປັນເຈົ້າພາບຈັດ, ເຊິ່ງປີນີ້ ສປປ ລາວ ເຮົາໄດ້ຮັບກຽດເປັນເຈົ້າພາບ.

ຜູ້ແທນກອງປະຊູມຍັງໄດ້ຮັບຟັງການລາຍງານໝາກຜົນຂອງກອງປະ ຊຸມ ຄັ້ງທີ 8 ທີ່ຜ່ານມາ ເຊິ່ງປະເທດກຳປູເຈຍໄດ້ເປັນເຈົ້າ ພາບ ແລະ ໄດ້ຮັບຟັງການນຳສະເໜີສະຖານະການຢາເສບຕິດ ແລະ ການປະຕິບັດໜ້າທີ່ໃນການສະກັດກັ້ນລັກລອບຂົນສົ່ງຢາ ເສບຕິດຢູ່ສະໜາມບິນ ຂອງບັນດາປະເທດສະມາຊິກອາຊຽນ ດ້ວຍກັນ ແລະ ຕາງໜ້າສະຫະພັນຕຳຫຼວດອົດສະຕາລີກໍ່ໄດ້ນຳ ສະເໜີສະພາບບັນຫາຢາເສບຕິດຢູ່ປະເທດອົດສະຕາລີ ໂດຍ ສະເພາະ ໃນວຽກງານສະກັດກັ້ນການລັກລອບຂົນສົ່ງຢາເສບຕິດຢູ່ສະໜາມບິນ.

ນອກນີ້, ກອງປະຊຸມຍັງໄດ້ມີການແລກປ່ຽນຄວາມຮູ້, ປະສົບການ, ຂໍ້ມູນຂ່າວສານ ແລະ ການປະຕິບັດວຽກງານທີ່ໄດ້ຮັບຜົນດີໃນການກວດກາ ແລະ ຄວບຄຸມຢາເສບຕິດ ໃນເຂດພື້ນທີ່ສະໜາມບິນກໍ່ຄືການແລກປ່ຽນບົດຮຽນ, ປະສົບການລະຫວ່າງຜູ້ທີ່ປະຕິບັດໜ້າທີ່ວຽກງານຕົວຈິງໃນການສະກັດກັ້ນ ແລະ ຄອບຄຸມຢາເສບຕິດ ໃນເຂດພື້ນທີ່ສະໜາມບິນຂອງບັນດາປະເທດສະມາຊິກອາຊຽນ.

ຜູ້ແທນກອງປະຊຸມດັ່ງກ່າວກໍ່ໄດ້ປຶກສາຫາລື ກ່ຽວກັບການຮ່ວມມືໃນອະນາຄົດ ໃນການສະກັດກັ້ນການລັກລອບຂົນສົ່ງຢາເສບຕິດໃນພື້ນທີ່ສະໜາມບິນ ເພື່ອບໍ່ໃຫ້ກຸ່ມຄົນບໍ່ດີໃຊ້ພື້ນທີ່ສະໜາມບິນເປັນເສັ້ນທາງລັກລອບຂົນສົ່ງ ແລະ ຄ້າຂາຍຢາເສບຕິດຜິດກົດໝາຍ ໄປຫາບັນດາປະເທດອາຊຽນ ແລະ ທົ່ວໂລກ.

ຂ່າວ: ບົວຜັນ

ພາບ: ພ້ອມພົງ

Related Articles

Leave a Reply