ອໍານາດການປົກຄອງເມືອງຄົງເຊໂດນ ແຂວງສາລະວັນ ໄດ້ກຳນົດເອົາງານເທດສະການປີ້ງໄກ່ນາປົ່ງ ແລະ ເຫຼົ້າຂາວເມືອງຄົງ ຕິດພັນກັບການເປີດປີທ່ອງທ່ຽວລາວ 2024 ຂອງເມືອງຄົງເຊໂດນ, ໂດຍຈະຈັດຂຶ້ນໃນລະຫວ່າງວັນທີ 3-5 ເມສາ 2024 ນີ້.
ທ່ານ ສະໄໝ ໂພທິສານ, ເຈົ້າເມືອງຄົງເຊໂດນ ແຂວງສາລະວັນ ແຈ້ງໃຫ້ຮູ້ວ່າ: ງານເທດສະການ ໃນຄັ້ງນີ້ ຈະມີຫຼາຍກິດຈະກຳ ເປັນຕົ້ນ: ວາງສະແດງຂາຍສິນຄ້າ ເຄຶ່ອງບໍລິໂພກ ທີ່ໜ້າສົນໃຈມາທ່ຽວຊົມ ແລະ ຊື້ກັບບ້ານ ເຊັ່ນ: ຂາຍປີ້ງໄກ່ນາປົ່ງ, ເຫຼົ້າຂາວເມືອງຄົງ, ສິນຄ້າໜຶ່ງເມືອງ ໜຶ່ງຜະລິດຕະພັນ (ໂອດອບ) ທີ່ຫຼາກຫຼາຍຊະນິດ, ນອກຈາກນັ້ນ ຍັງມີກິດຈະກໍາການປະກວດນາງສາວອາພອນເພດ, ການແຫ່ຂະບວນສະແດງຕ່າງໆ ໃນມື້ເປີດງານຢ່າງເປັນທາງການໃນວັນທີ 5 ເມສາ 2024 ນີ້.
ປີ້ງໄກ່ນາປົ່ງ ແມ່ນສິນຄ້າໜຶ່ງເມືອງ ໜຶ່ງຜະລິດຕະພັນ ຂອງເມືອງຄົງເຊໂດນ ທີ່ໄດ້ຖືກຮັບຮອງຢ່າງເປັນທາງ ການໃນເດືອນກັນຍາປີ 2020 ໂດຍມີ 3 ຜະລິດຕະພັນຂອງປີ້ງໄກ່ນາປົ່ງ ຄື: ປີ້ງໄກ່ເປັນໂຕ, ປີ້ງປີກໄກ່-ຂາໄກ່ ແລະ ປີ້ງເຄື່ອງໃນໄກ່.
ແຫຼ່ງຂ່າວ: ວສລ
