ອໍານາດການປົກຄອງ ເມືອງລະມາມ ແຂວງເຊກອງ ຈະຈັດງານບຸນປະເພນີຊ່ວງເຮືອ ປະຈຳປີ 2024 ໃນວັນທີ 3 ທັນວາ 2024 ນີ້ ຢູ່ທີ່ຜາມໄຊ ທ່າບັກເກົ່າ (ຮ້ານອາຫານໂຮງແຮມວັງຊ້າງສະຫວັນ) ບ້ານເພຍໃໝ່ ເມືອງລະມາມ, ຊຶ່ງງານບູນ ຄັ້ງນີ້ ຈະມີເຮືອປະເພດເຮືອສູດ ແລະ ເຮືອປະເພນີ ທັງໝົດ 19 ລໍາ ເຂົ້າຮ່ວມ.
ທ່ານ ຕຸລາວັນ ວົງໄຊ ເຈົ້າເມືອງລະມາມ ແຂວງເຊກອງ ປະທານຈັດງານບຸນປະເພນີຊ່ວງເຮືອ ປະຈຳປີ 2024 ໄດ້ໃຫ້ສຳພາດຕໍ່ສື່ມວນຊົນແຂວງເຊກອງ ໃນວັນທີ 28 ພະຈິກ 2024 ວ່າ: ງານບຸນປະເພນີຊ່ວງເຮືອ ທີ່ເມືອງລະມາມ ຈັດຂຶ້ນໃນວັນທີ 3 ທັນວາ ຂອງທຸກໆປີ ໄດ້ກາຍເປັນການສະເຫຼີມສະຫຼອງວັນສຳຄັນຂອງຊາດ-ຂອງພັກ ເປັນຕົ້ນ: ວັນຊາດ ທີ 2 ທັນວາ 1975, ວັນເກີດປະທານ ໄກສອນ ພົມວິຫານ 13 ທັນວາ 1920 ທັງເປັນການອະນຸລັກຮັກສາວັດທະນະທໍາ, ຮີດຄອງປະເພນີ, ມູນເຊື້ອອັນດີງາມທີ່ເປັນເອກະລັກສະເພາະຂອງບັນພະບູລຸດສ້າງໄວ້ໃຫ້ຮຸ່ນລູກ-ຮຸ່ນຫຼານ ໄດ້ຮຽນຮູ້ ແລະ ສືບຕໍ່ຮັກສາ ໃຫ້ຢູ່ຄູ່ກັບປະຊາຊົນບັນດາເຜົ່າຊາວແຂວງເຊກອງ ຕະຫຼອດໄປ.
ງານບຸນປະເພນີຊ່ວງເຮືອ ຢູ່ເມືອງລະມາມ ແຂວງເຊກອງ ໄດ້ຈັດຂຶ້ນໃນຕົ້ນເດືອນທັນວາຂອງທຸກໆປີ ເນື່ອງຈາກໄລຍະນີ້ ລະດັບນ້ຳເຊກອງ ໄຫຼບໍ່ແຮງ ເໝາະສົມແກ່ການຈັດງານແຂ່ງຂັນ ທັງເປັນໜຶ່ງໃນກິດຈະກຳໂຄສະນາປະຊາສຳພັນປີທ່ອງທ່ຽວລາວ 2024 ທີ່ເມືອງລະມາມ ເຊິ່ງນອກຈາກການແຂ່ງຂັນຊ່ວງເຮືອແລ້ວ ຍັງມີການປະກວດສຽງແຄນເຊື້ອຊາດລາວ,ງານຕະຫຼາດນັດ, ງານວາງສະແດງສິນຄ້າໂອດ໋ອບ ແລະອື່ນໆ.
ທີ່ມາ: ສື່ມວນຊົນ ແຂວງເຊກອງ
