Vientiane Times Lao
ເທດສະການຮູບ​ເງົາ​ເອີ​ຣົບຄັ້ງ​ທຳອິດ​ໃນ​ລາວຈະຖືກ​ຈັດ​ຂຶ້ນທ້າ​ຍ​ເດືອນ​ນີ້

ເທດສະການຮູບ​ເງົາ​ເອີ​ຣົບຄັ້ງ​ທຳອິດ​ໃນ​ລາວຈະຖືກ​ຈັດ​ຂຶ້ນທ້າ​ຍ​ເດືອນ​ນີ້

ອົງການສະຫະ​ພາບ​ເອີຣົບ ປະ​ຈຳ ສປປ ລາວ ຮ່ວມ​ກັບ​ບັນດາ​ປະ​ເທດ​ສະມາຊິກ​ເອີຣົບ ​ໄດ້ຖະ​ແຫຼ​ງການໃນວັນ​ທີ 19 ພະຈິກ 2019 ທີ່ ນະຄອນຫຼວງ​ວຽງ​ຈັນ​ ​ກ່ຽວກັບ​ງານ​ເທດສະການ​ຮູບ​ເງົາ​ເອີ​ຣົບຄັ້ງທຳ​ອິດ​ໃນ ສປປ ລາວ ​ເຊິ່ງຈະ​ຈັດ​ຂຶ້ນ​ໃນ​ລະ​ຫວ່າງ​ວັນ​ທີ 26-30 ພະຈິກ ທີ່​ນະ​ຄອນ​ຫຼວງ​ວຽງ​ຈັນ.

ທ່ານ ລີ​​ໂອ ຟາ​ເບີ ​ເອກ​ອັກຄະ​ລັດຖະທູດ​ສະຫະພາບ​ເອີຣົບ ປະຈຳ​ ສປປ ລາວ​ ​ໄດ້​ກ່າວ​ວ່າ ງານ​ດັ່ງກ່າວ​ຈະເປັນ​ພິທີ ​ແລະ ​ເຫດການ​ສຳ​ຄັນ​ອັນ​ໜຶ່ງ ​ຂອງ​ສະຫະ​ພາບ​ເອີຣົບ ທີ່​ໄດ້​ຈັດ​ຂຶ້ນ​ຢູ່ ສປປ ລາວ​.

ງານ​ຮູບ​ເງົາ​ຄັ້ງປະ​​ຖົມມະ​ລຶກ​ນີ້ ຈະ​ປະກອບ​ດ້ວຍ​ຮູບ​ເງົາ​ເອີ​ຣົບຫຼາຍ​ສິບ​ເລື່ອງ ທີ່​ສະທ້ອນ​ໃຫ້​ເຫັນ​ເຖິງ​ທັດສະນະ​ທີ່​ຫຼາກ​ຫຼາຍ, ປະຫວັດສາດ​ ​ແລະ ​ວັດທະນະທຳ ​ໃນ​ທົ່ວ​ຂົງ​ເຂດ​ເອີຣົບ. ​ໃນ​ອ​າທິດ​ຂອງ​ການ​ສາຍຮູບ​ເງົາ​ນີ້, ອົງການສະຫະພາບ​ເອີ​ຣົບຈະ​ນຳ​ສະ​ເໜີ​ຮູບ​ເງົາ​ ຫຼາຍ​ເລື່ອງ ​ທີ່​ໄດ້​ຮັບ​ລາງວັນ​ຫຼາຍ​ລາຍການ ​ເພື່ອ​ໃຫ້​ຄົນລາວ​ໄດ້​ຮັບ​ຊົມ ​ເຊິ່ງບໍ່​ເຄີຍ​ເຫັນ​ມາ​ກ່ອນ​ໃນ​ນະຄອນຫຼວງ​ວຽງ​ຈັນ ແລະ ທຸ​ກຄົນ​ສາມາດ​ເຂົ້າຮ່ວມ​ງານ​ດັ່ງ​ກ່າວ​ໂດຍ​ບໍ່​​ມີຄ່າໃຊ້ຈ່າຍຫຍັງ.

ງານ​ເທດສະການ​ຮູບ​ເງົາ ຈະ​ເລີ່​ມຈັດ​ຂຶ້ນ​ແຕ່​ວັນ​ທີ 26 ພະຈິກ ​ເປັນຕົ້ນ​ໄປ ຢູ່​ຫ້ອງການ​ສະຖານ​ເອກ​ອັກຄະ​ລັດ​ຖະທູດ​ສະຫະພາບ​​ເອີ​ຣົບ ປະ​ຈຳ ສປປ ລາວ​, ຈາກນັ້ນຈະມີ​ການ​ສາຍຮູບ​ເງົາ​ທີ່​ສະ​ຖາ​ບັນຝຣັ່ງ​​ ​ໃນ​ລະ​ຫວ່າງວັນ​ທີ 27 ພະຈິກ, ຢູ່​ສະ​ຖາ​ນ​ເອກ​ອັກຄະ​ລັດ​ຖະທູດ​ອັງກິດ ​ໃນ​ວັນ​ທີ 28 ພະຈິກ ​ແລະ ຢູ່ເຂດ​ສວນ​ເຈົ້າອານຸວົງ ​ແຕ່​ວັນ​ທີ 29-30 ພະ​ຈິກ​.

ທ່ານ ລີ​​ໂອ​​​​ ​ຟາ​ເບີ ຍັງ​ໃຫ້​ແຈ້ງຮູ້​ອີກ​ວ່າ ຄຽງ​ຄູ່​ກັບ​ງານ​ເທດສະການ​ຮູບ​ເງົາ, ງານ​ເທດສະການ​ອາຫານ​​ເອີ​ຣົບຄັ້ງທີ 8 ກໍ່ຈະ​ໄດ້​ຈັດ​ຂຶ້ນ​ໃນ​ລະ​ຫວ່າງ​ວັນ​ທີ 29-30 ພະຈິກ ທີ່​ແຄມ​ຂອງ​ເຊັ່ນ​ດຽວ​ກັນ. ​ເທດສະການດັ່ງກ່າວຈະເລີ່ມແຕ່​ເວ​ລາ 11:00 ​ໂມງ – 22:00 ​ໂມງ. ງານ​ດັ່ງກ່າວ​ຈະ​ປະກອບ​ດ້ວຍ​ຜູ້​ປະກອບ​ການ​ດ້ານ​ອາຫານ​ທີ່​ມີ​ຊື່​ສຽງ​ຫຼາຍ​ສິບ​ຮ້ານມາ​ມາ​ຈາກ​ປະ​ເທດ​ຝຣັ່ງ, ​ແອັດ​ສະ​ປາຍ, ອີ​ຕາ​ລີ, ​ເຢຍລະ​ມັນ, ​ເບ​ວຢ້ຽມ ​ແລະ ຣັດ​ເຊຍ ​ເຂົ້າຮ່ວມ​ໃນ​ງານ​ດັ່ງກ່າວ​ ​ແລະ ຜູ້​ເຂົ້າທ່ຽວ​ຊົມ​ງານຈາ​ກ ສປປ ລາວ ຈະ​ມີ​​ໂອ​ກາດ​ມ່ວນ​ຊື່ນ​ກັບ​ການ​ຊິມ​ລົດຊາດ​ອາຫານ​ ທີ່​ແຊບ​ ແລະ ​ໜ້າ​ປະ​ທັບ​ໃຈ​ໃນ​ລາຄາ​ທີ່​ສົມເຫດສົມຜົນ.

ຂ່າວ​-​ພາບ: ວິສິດ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ