Vientiane Times Lao
ເທສະການອາຫານລາວ 2023 ມີ 180 ຮ້ານ

ເທສະການອາຫານລາວ 2023 ມີ 180 ຮ້ານ

 ເທສະການອາຫານລາວ 2023 ພາຍໃຕ້ຄຳຂວັນ “ອາຫານລາວກ້າວສູ່ສາກົນ” ມີ ອາຫານທີ່ຫຼາກຫຼາຍໄວ້ໃຫ້ເລືອກຊື້ ໂດຍມີຈຳນວນ 180 ຮ້ານເຂົ້າຮ່ວມ, ໃນນັ້ນ, ມີຮ້ານອາຫານລາວ, ອາຫານປະຍຸກ, ອາຫານສາກົນ ແລະ ສິນຄ້າກະສິກຳຈຳນວນ 162 ຮ້ານ ແລະ ຮ້ານເຄື່ອງຫັດຖະກຳຈຳນວນ 18 ຮ້ານ.

ເທສະການດັ່ງກ່າວຈັດໂດຍສະມາຄົມນັກທຸລະກິດແມ່ຍິງ  ແລະ ສູນກາງສະຫະພັນແມ່ຍິງລາວໂດຍໄດ້ມີພິທີເປີດ ຢ່າງເປັນທາງການ ເມື່ອວັນທີ 24 ມັງກອນ 2023 ທີ່ຜ່ານມາ ຢູ່ສວນເຈົ້າອານຸວົງ ນະຄອນຫຼວງວຽງຈັນ ແລະ ຈະດຳເນີນໄປຈົນຮອດວັນທີ 28 ມັງກອນ 2023 ເລີ່ມເປີດ 9:00-22:00 ໂມງ.

ທ່ານນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ ປະທານຄະນະກຳມະການຈັດງານດັ່ງກ່າວໄດ້ກ່າວໃນພິທີວ່າ: ເທສະການອາຫານລາວ ຈັດຂຶ້ນເພື່ອສົ່ງເສີມວັດທະນະທຳ, ຮີດຄອງປະເພນີກ່ຽວກັບອາຫານການກິນ, ການດຳລົງຊີວິດແບບລາວໆໃຫ້ເຊື່ອມໂຍງກັບຍຸກສະໄໝກ້າວສູ່ສາກົນຢ່າງລົງໂຕ ທັງເປັນການສືບຕໍ່ຊຸກຍູ້, ສົ່ງເສີມແມ່ຍິງຜູ້ຜະລິດ, ຜູ້ປູກຝັງ-ລ້ຽງສັດ, ຜູ້ມີພອນສະຫວັນປຸງແຕ່ງອາຫານ, ຮ້ານຂາຍຍ່ອຍຈາກຕ່າງແຂວງ ແລະ ນະຄອນຫຼວງວຽງຈັນມາວາງສະແດງ, ຂາຍ ແລະພັດທະນາຄຸນນະພາບອາຫານໃຫ້ໄດ້ມາດຕະຖານ, ສາມາດຂະຫຍາຍການຄ້າຂາຍກ້າວສູ່ການສັ່ງຈອງ, ການຈັດສົ່ງສິນຄ້າໃຫ້ທົ່ວເຖິງສັງຄົມ.

 ພິເສດໃນປີນີ້ຈະມີການແຂ່ງຂັນເຮັດເຂົ້າສັງຂະຫຍາເຂົ້າກ່ຳເພື່ອກຽມຜະລິດເປັນສິນຄ້າ ຫຼື ຂອງຝາກທີ່ສາມາດສົ່ງຈຳໜ່າຍທັງຮ້ານຄ້າພາຍໃນ ແລະ ຕ່າງປະເທດ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ