Vientiane Times Lao
ເທັນນິດ ນະຄອນຫຼວງ ຫວັງທວງຄວາມຍິ່ງໃຫຍ່ໃນຊຽງຂວາງເກມ

ເທັນນິດ ນະຄອນຫຼວງ ຫວັງທວງຄວາມຍິ່ງໃຫຍ່ໃນຊຽງຂວາງເກມ

ສະຫະພັນເທັນນິດ ນະຄອນຫຼວງວຽງຈັນ (ນວ) ພ້ອມສົ່ງທັບນັກກິລາເທັນນິດລູກຫຼານຂອງຕົນ ຈຳນວນ 12 ຄົນ, ຍິງ 6 ຄົນ ຫຼັງເກັບຕົວຝຶກຊ້ອມຕັ້ງແຕ່ເດືອນສິງຫາ 2019 ນັບມາຮອດປັດຈຸບັນມີຄວາມພ້ອມເຖິງ 90 ເປີເຊັນ ພ້ອມຕັ້ງເປົ້າໝາຍຈະເອົາ 3 ຫຼຽນຄຳ ເພື່ອທວງຕຳແໜ່ງແຊ໋ມເຈົ້າຫຼຽນຄຳ ໃຫ້ທັບນັກກິລາ ນະຄອນຫຼວງວຽງຈັນ ໃຫ້ກັບມາຍິ່ງໃຫຍ່ອີກຄັ້ງ ໃນງານມະຫາກໍາກິລາແຫ່ງຊາດ ຄັ້ງທີ Xl ຫຼື ຊຽງຂວາງ ເກມ ທີ່ແຂວງຊຽງຂວາງ ໄດ້ເປັນເຈົ້າພາບ ເຊິ່ງ ເລີ່ມແຕ່ວັນທີ 22 ມີນາ ຫາ 1 ເມສາ 2020.

ໃນອາທິດທີ່ຜ່ານມາ ທີ່ສະໂມສອນເທັນນິດ ຄອບຄົວ ບຸນທະລາ ບ້ານປາກທ້າງ ເມືອງສີໂຄດຕະບອງ ນະຄອນຫຼວງວຽງຈັນ ທ່ານ ຕຸ້ຍ ບຸນທະລາ ປະທານສະຫະພັນເທັນນິດ ນວ ໄດ້ໃຫ້ສຳພາດຕໍ່ສື່ມວນຊົນວ່າ: ທັບນັກກິລາເທັນນິດ ນວ ຊຸດນີ້ ເປັນຊຸດລູກຫຼານຂອງຊາວນະຄອນຫຼວງ ຢ່າງແທ້ຈິງ ສາມາດຄັດເລືອກໄດ້ທັງໝົດ 12 ຄົນ, ຍິງ 6 ຄົນ ໄດ້ມີການເກັບຕົວຝຶກຊ້ອມມາແຕ່ເດືອນສິງຫາ 2019 ຜ່ານມາ ທີ່ສະໂມສອນກິລາເທັນນິດເຈົ້າອານຸວົງ ແລະ ຈຳນວນໜຶ່ງແມ່ນໄດ້ເກັບຕົວ ແລະ ເຄື່ອນໄຫວເຂົ້າຮ່ວມແຂ່ງຂັນທີ່ປະເທດເພື່ອນບ້ານ ນັບມາຮອດປັດຈຸບັນມີຄວາມພ້ອມເຖິງ 90 ເປີເຊັນແລ້ວ ແລະ ໃນອີກ 2 ເດືອນຕໍ່ໜ້ານີ້ ເພື່ອເປັນການເສີມຄວາມແຂງແກ່ນໃຫ້ນັກກິລາ ສາມາດຮັບປະກັນທີ່ສະຫະພັນເທັນນິດ ນະຄອນຫຼວງ ຕັ້ງເປົ້າໝາຍໄວ້ສູງ ຈະລ່າ 3 ຫຼຽນຄຳ ໃນ ຊຽງຂວາງ ເກມ ໃຫ້ໄດ້. ສະນັ້ນ,ຈຶ່ງໄດ້ຂຶ້ນແຜນຈະພານັກກິລາທັງໝົດ 12 ຄົນ, ຍິງ 6 ຄົນ ອອກເດີນທາງໄປເຄື່ອນໄຫວເກັບຕົວຝຶກຊ້ອມ ແລະ ແຂ່ງຂັນທີ່ປະເທດໄທຕື່ມອີກ.

ທ່ານ ອາລັນ ຄູຝຶກເທັນນິດ ນະຄອນຫຼວງວຽງຈັນ ຊາວອົດສະຕາລີ ໄດ້ກ່າວວ່າ: ນັກກິລາເທັນນິດລາວ ກໍ່ຄື ຂອງນະຄອນຫຼວງວຽງຈັນ ທຸກຄົນພິເສດຫຼາຍ ມີການພັດທະນາໄປໄກພໍສົມຄວນ ຖ້າຫາກຢາກເຫັນນັກກິລາເທັນນິດລາວ ສາມາດກ້າວໄປເຖິງລະດັບມືອາຊີບ ໄດ້ນັ້ນ ສິ່ງສຳຄັນທຸກຄົນຕ້ອງໄດ້ມີການຝຶກຊ້ອມຢ່າງຕໍ່ເນື່ອງ ຕ້ອງໄດ້ເອົາໃຈໃສ່ຕໍ່ການຮຽນຮູ້ທາງດ້ານທັກສະ, ເທັກນິກ ແລະ ຈິດຕະວິທະຍາໃຫ້ຫຼາຍ ເຊື່ອວ່າອະນາຄົດໄປໄກທີ່ຫວັງ ສ່ວນການກະກຽມຄວາມພ້ອມຂອງທັບນັກກິລາເທັນນິດ ນະຄອນຫຼວງ ຮ່ວມຊຽງຂວາງ ເກມ 2020 ນີ້ ນັກກິລາພວກເຮົາມີໂອກາດເປັນໄປໄດ້ສູງ ທີ່ຈະສາມາດສ້າງຜົນງານຄວ້າ 3 ຫຼຽນຄຳ ມາຄອງ ເຊິ່ງມີເວລາ ອີກ 2 ເດືອນ ສະນັ້ນ ຈະພະຍາຍາມເນັ້ນການຝຶກຊ້ອມໃຫ້ນັກກິລາມີຄວາມທົນ, ມີຄວາມແຂງແກ່ນ ແລະ ປະສິດທິ ພາບໃນການຮ່ວມກັນຫຼິ້ນແບບທີມເວີກ ຮັບປະກັນໂລດວ່າ 3 ຫຼຽນຄຳ ບໍ່ຫຼຸດໄປໃສແນ່ນອນ.

ຊຽງຂວາງ ເກມ 2020 ຈະມີການແຂ່ງຂັນທັງໝົດ 28 ປະເພດກິລາ, ໃນນັ້ນ ກິລາເທັນນິດ ມີການຊີງໄຊເຖິງ 7 ລາຍການ ປະກອບມີ ປະເພດດ່ຽວຍິງ, ດ່ຽວຊາຍ, ທີມຄູ່ຍິງ, ທີມຄູ່ຊາຍ, ທີມຊຸດຍິງ, ທີມຊຸດຊາຍ ແລະ ທີມປະສົມ.

ຂ່າວ-ພາບ: ສົງການ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ