ອົງການ UNDP ແລະ ສະຖານທູດຈີນ ປະຈຳ ສປປ ລາວ ໄດ້ເປີດຕົວໂຄງການ ການບໍລິຫານຄຸ້ມຄອງຂີ້ເຫຍື້ອທາງການແພດ ຢ່າງເປັນທາງການ ຕອນເຊົ້າມື້ນີ້ວັນທີ 11 ມີນາ 2021 ທີ່ນະຄອນຫຼວງວຽງຈັນ ໂດຍເຂົ້າຮ່ວມໃນພິທີດັ່ງກ່າວ ມີບັນດາຄູ່ຮ່ວມໂຄງການຈາກກະຊວງສາທາລະນະສຸກ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ອົງການອະນາໄມໂລກ (WHO), ຕາງໜ້າ ຈາກສະຖານທູດຈີນ ແລະ ພາກສ່ວນທີ່ກ່ຽວຂ້ອງ.
ໂຄງການດັ່ງກ່າວ ແມ່ນໃຫ້ການສະໜັບສະໜູນ ທາງດ້ານເຕັກນິກ ແລະ ວິຊາການ ກ່ຽວກັບການປັບປຸງລະບົບການຄຸ້ມຄອງກ່ຽວກັບຂີ້ເຫຍື້ອທາງການແພດ ດ້ານສຸຂະພາບປອດໄພ ໃນສະຖານທີ່ໃຫ້ບໍລິການດ້ານສຸຂະພາບ ທີ່ຖືກຄັດເລືອກ ແລະ ການພັດທະນາຄວາມສາມາດໃຫ້ແກ່ຜູ້ຊ່ຽວຊານ ດ້ານການຮັກສາສຸຂະພາບ, ພະນັກງານໃນຂັ້ນທ້ອງຖິ່ນ ພ້ອມທັງການຮັກສາສຸຂະພາບ ເພື່ອຄວບຄຸມການລະບາດຂອງພະຍາດໂຄວິດ -19 ດ້ວຍການປົກປ້ອງຄົນ ແລະ ສິ່ງແວດລ້ອມ.
ນອກຈາກນັ້ນ, ຍັງຈະໃຫ້ການສະໜັບສະໜູນ ການແລກປ່ຽນຂໍ້ມູນຂ່າວສານ ແລະ ການສື່ສານກ່ຽວກັບການປ້ອງກັນ ພະຍາດໂຄວິດ -19 ແລະ ການໂຕ້ຕອບ ສຳລັບປະຊາຊົນໃນກຸ່ມທີ່ີຢູ່ເຂດຫ່າງໄກສອກຫຼີກ ແລະ ກຸ່ມທີ່ມີຄວາມສ່ຽງ – ເພື່ອຮັບປະກັນວ່າ ພວກເຂົາຈະສາມາດກ້າວໄປທາງໜ້າຮ່ວມກັນຢ່າງມີສ່ວນຮ່ວມ ແລະ ສາມາດໄດ້ຮັບຜົນປະໂຫຍດຈາກການສະໜັບສະໜູນ ຢ່າງເທົ່າທຽມກັນເພື່ອຮັກສາຄວາມປອດໄພ ແລະ ສຸຂະພາບ.
ສໍາລັບໂຄງການນີ້ ແມ່ນໄດ້ຮັບການສະໜັບສະໜູນ ຈາກກອງທຶນຊ່ວຍເຫຼືອການຮ່ວມມື South South Cooperation Assistance Funds (SSCAF) ເພື່ອສ້າງຄວາມເຂັ້ມແຂງ ແລະ ຄວາມອາດສາມາດໃຫ້ແກ່ການກຽມພ້ອມ ແລະ ໂຕ້ຕອບໃນລະດັບພາກພື້ນ ອາຊີ-ປາຊີຟິກ ຕໍ່ພະຍາດໂຄວິດ -19 ເຊີ່ງໂຄງການດັ່ງກ່າວໄດ້ມີຈຸດສຸມພິເສດໃນ 5 ປະເທດ ລວມທັງ ສປປ ລາວ.
ຂ່າວ: ວຽງຈັນທາຍ
