Visit BigblueAgency
ເປີດບຸນນະມັດສະການພະທາດໂຜ່ນຕິດພັນກັບການເປີດປີທ່ອງທ່ຽວລາວ 2024

ເປີດບຸນນະມັດສະການພະທາດໂຜ່ນຕິດພັນກັບການເປີດປີທ່ອງທ່ຽວລາວ 2024

ອົງການປົກຄອງ ເມືອງໄຊພູທອງ ເຈົ້າແຂວງສະຫວັນນະເຂດ ຈັດພິທີເປີດບຸນນະມັດສະການພະທາດໂຜ່ນ ຕິດພັນກັບກັບການເປີດປີທ່ອງທ່ຽວລາວ 2024 ໃນວັນທີ 21 ກຸມພາ 2024 ໂດຍການເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ.

 ທ່ານ ພົມມາ ສົງວິໄລ ຮອງເຈົ້າເມືອງໄຊພູທອງ, ຮອງປະທານຈັດງານໄດ້ກ່າວໃນພິທີວ່າ: ເປີດບຸນນະມັດສະ ການພະທາດໂຜ່ນ ຕິດພັນກັບກັບການເປີດປີທ່ອງທ່ຽວລາວ 2024 ໃນຄັ້ງນີ້, ໄດ້ມີຫຼາຍກິດຈະກໍາ ເຊັ່ນ: ກິດຈະກໍາສົ່ງເສີມກິລາ-ສິລະປະ-ວັນນະຄະດີ, ປະກວດນັກຮ້ອງສຽງດີ-ໝໍລໍາສຽງໃສ ຈາກບັນດາເມືອງອ້ອມຂ້າງ, ພິເສດໃນງານຄັ້ງນີ້, ຍັງຈັດໃຫ້ມີການປະກວດ ນາງສາວນໍ້າຕານຫວານຫອມ ຈາກ 8 ກຸ່ມບ້ານຂອງເມືອງໄຊພູທອງ. ນອກນັ້ນ, ຍັງໄດ້ນໍາເອົາຜະລິດຕະພັນ ແລະ ສິນຄ້າໂອດັອບຈາກກຸ່ມການຜະລິດພາຍໃນເມືອງ ແລະ ເມືອງອ້ອມຂ້າງແຂວງ ຈໍານວນ 20 ກຸ່ມ, ມີຮ້ານວາງສະແດງສິນຄ້າຈາກພາກສ່ວນທຸລະກິດ, ຜູ້ປະກອບການເຂົ້າຮ່ວມທັງໝົດ 230 ຫົວໜ່ວຍ. ທັງນີ້, ກໍເພື່ອເປັນການສົ່ງເສີມ, ສ້າງໂອກາດໃຫ້ພໍ່ແມ່ປະຊາຊົນໄດ້ມາແລກປ່ຽນຊື້-ຂາຍ ສິນຄ້າຜະລິດຕະພັນດ້ານກະສິກໍາ, ຫັດຖະກໍາ, ສິນຄ້າໂອດັອບ ແລະ ບໍລິການອື່ນໆ.

ພິທີເປີດງານຄັ້ງນີ້, ທ່ານເຈົ້າແຂວງສະຫວັນນະເຂດ ພ້ອມຄະນະນຳຂອງແຂວງ ແລະ ຂັ້ນເມືອງ, ໄດ້ຮ່ວມກັນລັ່ນຄ້ອງ 9 ບາດ ເພື່ອເປັນສັນຍາລັກ ກໍຄື ເປັນສີລິມຸງຄຸນໃຫ້ແກ່ການເປີດ ບຸນນະມັດສະການພະທາດໂຜ່ນ ຕິດພັນກັບການເປີດປີທ່ອງທ່ຽວລາວ 2024 ຂອງເມືອງໄຊພູທອງຢ່າງເປັນທາງການ. ຈາກນັ້ນ, ກໍໄດ້ຮ່ວມແຫ່ຜາສາດເຜິ້ງ ແລະ ຂັນໝາກເບັງໃຫຍ່ ເຂົ້າສູ່ວັດພະທາດໂຜ່ນ ແຫ່ອ້ອມກົມມະລຽນພະທາດ 3 ຮອບ ແລະ ຄາລະວະຖວາຍຜາສາດເຜິ້ງ ແລະ ຢ້ຽມຊົມຫ້ອງວາງສະແດງສິນຄ້າຜະລິດຕະພັນສິນຄ້າໂອດັອບຂອງກຸ່ມຜະລິດກະສິກໍາ ພາຍໃນເມືອງ ແລະ ເມືອງອ້ອມຂ້າງ ຕື່ມອີກ.

ຂ່າວ-ພາບ: ພັນທະມິດ ວົງສຸທິ

Related Articles

Leave a Reply