ສະຫະພັນບານເຕະແຫ່ງຊາດລາວ ຮວ່ມກັບສະຫະພັນບານເຕະແຂວງບໍລິຄຳໄຊ ໄດ້ຈັດພິທີເປີດສູນຝຶກບານເຕະ ຈຳປີ-ຈໍາປາ ແຂວງບໍລິຄໍາໄຊ, ເມື່ອບໍ່ດົນມານີ້ ທີ່ສະໜາມກິລາບານເຕະເມືອງປາກຊັນ ຊຶ່ງສູນຝຶກດັ່ງກ່າວ ຈະເປີດການຮຽນ-ການສອນເຕະບານ ທຸກໆວັນເສົາ ແລະ ອາທິດ.
ຈຸດປະສົງຂອງການເປີດສູນຝຶກແຫ່ງນີ້ ກໍເພື່ອເນັ້ນໃສ່ການຝຶກສອນພື້ນຖານກິລາບານເຕະໃຫ້ແກ່ລູກຫຼານເຍົາວະຊົນແຕ່ລະຮຸ່ນ ພາຍໃນແຂວງຈໍາປາສັກ, ເປີດໂອກາດໃຫ້ນັກກິລາເຍົາວະຊົນ ໄດ້ສະແດງຄວາມ ສາມາດທາງດ້ານພອນສະຫວັນກິລາບານເຕະ ເພື່ອສືບທອດເປັນນັກກິລາບານເຕະຂອງແຂວງ, ກ້າວສູ່ການເປັນນັກກິລາທີມຊາດ ແລະ ພັດທະນາກ້າວໄປສູ່ການເປັນນັກເຕະອາຊີບໃນອະນາຄົດ.
ສູນຝຶກກິລາບານເຕະ ຈໍາປີ-ຈໍາປາ ແມ່ນຢູ່ພາຍໃຕ້ໂຄງການ ຂອງສະຫະພັນບານເຕະສາກົນ ຫຼື FIFA ( FIFA Talent Development Scheme) ຮ່ວມກັບ ສະຫະພັນບານເຕະແຫ່ງຊາດລາວ ເປັນໂຄງການເພື່ອພັດທະນາກິລາບານເຕະນ້ອງໆເຍົາວະຊົນລາວໃຫ້ຮັກມັກກິລາບານເຕະ ແລະ ພັດທະນາກິລາລາວໃນລະດັບຂັ້ນພື້ນຖານກ້າວສູ່ມືອາຊີບ, ຊຶ່ງປະຈຸບັນ ມີສູນຝຶກກິລາບານເຕະ ຈໍາປີ-ຈໍາປາ ຢູ່ນະຄອນຫຼວງວຽງຈັນ, ແຂວງຫຼວງພະບາງ, ແຂວງຈຳປາສັກ, ແຂວງຫຼວງນໍ້າທາ, ແຂວງຄຳມ່ວນ ແລະ ແຂວງບໍລິຄໍາໄຊ.
