ບໍລິສັດຮ່ວມທຶນກະສິກໍາຄົບວົງຈອນ ຈໍາກັດ ໄດ້ເປີດພິທີໂຄງການກໍ່ສ້າງ ຟາມລ້ຽງງົວຕົວແບບທີ່ທັນສະໄໝ ໃນວັນທີ 1 ພະຈິກ 2024 ທີ່ຜ່ານມາ ນີ້, ທີ່ບ້ານຖໍ້າເມືອງນາຊາຍທອງ ນະຄອນຫຼວງວຽງຈັນ,ໂດຍການເປັນ ປະທານຂອງ ທ່ານ ພົນຈັດຕະວາ ວົງສັກ ສີພັນດອນ ຮອງຫົວໜ້າກົມ ໃຫຍ່ ພະລາທິການກອງທັບ ຊຶ່ງ ຟາມດັ່ງກ່າວແມ່ນລ້ຽງສັດໃຫຍ່ປະ ເພດງົວ, ຄວາຍ ເພື່ອສົ່ງອອກໄປ ສປ ຈີນ.
ທ່ານ ນາງ ຄອນສະຫວັນ ແສງວິໄລ ອໍານວຍການບໍລິສັດຮ່ວມທຶນກະສິກໍາຄົບວົງຈອນ ຈໍາກັດໄດ້ກ່າວໃນພິທີວ່າ: ຟາມດັ່ງກ່າວ ມີເນື້ອທີ່ 87 ເຮັກຕາ ຂຶ້ນກັບກົມຜະລິດ -ກະສິກຳ ກົມໃຫຍ່ ພະລາທິການກອງທັບ ຮ່ວມກັບ ບໍລິສັດ ສາງຈ່ຽງ ການລົງທຶນລາວ ຈຳກັດຜູ້ດຽວ ຮ່ວມກັນສ້າງຕັ້ງເປັນ ບໍລິສັດຮ່ວມທຶນກະສິກຳຄົບວົງຈອນ ຈຳກັດ. ບໍລິສັດໄດ້ສຸມໃສ່ການກະກຽມດ້ານສະບຽງອາຫານພື້ນຖານ ເຊັ່ນ:ກຽມພື້ນ ທີ່ປູກຫຍ້າ ໃຫ້ສາມາດຮອງຮັບ ການລ້ຽງງົວໂດຍ ສະເພາະໃນຟາມມີພື້ນທີ່ປູກຫຍ້າ 50 ເຮັກຕາ; ໂດຍກຳນົດເອົາຫຍ້າເນເປຍປາກຊ່ອງ 1 ແລະ ຫຍ້າຈຸນຊາວເປັນພື້ນຖານໃຫ້ແກ່ການຂະຫຍາຍທົ່ງຫຍ້າ; ນໍາງົວທອມເຂົ້າມາທົດລອງກ່ອນໃນຟາມ ນໍາໃຊ້ສວ່ນປະສົມອາຫານປະເພດຕ່າງໆຕາມສູດອາຫານ TMR ແລະ ເກັບກຳຂໍ້ມູນການເກືອ, ການເພີ່ມນໍ້າໜັກຂອງງົວທອມທີ່ເພີ່ມຂຶ້ນໃນແຕ່ລະເດືອນ. ຈໍານວນງົວ ມີຂາຍອອກເປັນງົວຢືນຈໍານວນໜຶ່ງ ແລະ ນໍາໄປຂາຍເປັນຊີ້ນ ຈໍານວນໜຶ່ງ, ປັດຈຸບັນມີງົວ 282 ໂຕ, ເປັນງົວພໍ່ພັນ 4 ໂຕ, ແມ່ພັນ 113 ໂຕ, ງົວ ທອມ 92 ໂຕ ແລະ ງົວນ້ອຍ 50 ໂຕ.
ທີ່ມາ: ວິທະຍຸກອງທັບປະຊາຊົນລາວ
