Vientiane Times Lao
ເມືອງນາຊາຍທອງ ເປີດຂະບວນການຕ້ານພະຍາດໄຂ້ຍຸງລາຍ

ເມືອງນາຊາຍທອງ ເປີດຂະບວນການຕ້ານພະຍາດໄຂ້ຍຸງລາຍ

ຫ້ອງການ ສາທາລະນະສຸກ ເມືອງນາຊາຍທອງ​ ນະຄອນຫຼວງວຽງຈັນ ໄດ້ເປີດຂະບວນ ຫຼື ກິດຈະກໍາ ຕ້ານໄຂ້ຍຸງລາຍແບບຊຸມຊົນເປັນເຈົ້າການ​ ເມື່ອບໍ່ດົນມານີ້, ເພື່ອເປັນການກະຕຸນໃຫ້ປະຊາຊົນ ເປັນເຈົ້າການ ປ້ອງກັນພະຍາດໄຂ້ຍຸງລາຍ ໂດຍສະເພາະທໍາລາຍແຫຼ່ງເພາະ ພັນຂອງ ຍຸງລາຍຕາມນອກ ແລະ ໃນສະຖານທີ່ຢູ່ອາໃສຂອງທຸກໆຄົວເຮືອນ.

ທ່ານ ດຣ. ຄຳພັນ ຂັນຕິລາດ ຫົວໜ້າຫ້ອງການສາທາລະນະສຸກເມືອງນາຊາຍທອງ ໃຫ້ຮູ້ວ່າ: ນັບແຕ່ເດືອນມັງກອນປີ 2020 ມາຮອດປະຈຸບັນນີ້, ເມືອງນາຊາຍທອງມີຜູ້ເປັນໄຂ້ຍຸງລາຍແລ້ວ 40 ຄົນ, ຈໍານວນຜູ້ເປັນໄຂ້ຍຸງລາຍແມ່ນກວມເອົາ18 ບ້ານ, ໃນທົ່ວເມືອງມີ 54 ບ້ານ.​ ໄລຍະຜ່ານມາ, ສາທາລະນະສຸກເມືອງໄດ້ສົມທົບກັບອົງການປົກຄອງບັນດາບ້ານທີ່ມີກໍລະນີໄຂ້ຍຸງລາຍລົງພົ່ນຢາຂ້າຍຸງ ໃນບໍລິເວນເຮືອນຂອງຜູ້ທີ່ເປັນໄຂ້ຍຸງລາຍໃນລັດສະໝີ 200 ແມັດ ພ້ອມທັງມີການສ້າງຂະບວນການທໍາລາຍແຫຼ່ງເພາະພັນຂອງຍຸງລາຍທຸກໆວັນເສົາ.

ການເປີດຂະບວນການຕ້ານພະຍາດໄຂ້ຍຸງລາຍໃນຄັ້ງນີ້, ພຣະອາຈານ ເກດ ສີບຸນເຮືອງ (ຄູບາ) ໄດ້ມອບ ເສື້ອຈຳນວນ 427 ຜືນ ທີ່ໄດ້ລະດົມຈາກສັງຄົມ ທັງພາຍໃນ ແລະ ຕ່າງປະເທດ ເພື່ອມອບໃຫ້ແກ່ ອາສາສະໝັກ ຕ້ານໄຂ້ຍຸງລາຍ ຢູ່ເມືອງນາຊາຍທອງ ໃນການສືບຕໍ່ສ້າງຂະບວນການຢູ່ແຕ່ລະບ້ານ ທຸກໆວັນເສົາ.​

ຮອດປັດຈຸບັນ, ມີຄົນລາວເສຍຊີວິດແລ້ວ 7 ຄົນ ຍ້ອນໄຂ້ຍຸງລາຍ ໃນຂອບເຂດທົ່ວປະເທດ, ສະເພາະປີ 2019 ທີ່ຜ່ານມາ ມີຜູ້ເສຍຊີວິດເຖິງ 76 ຄົນຈາກໄຂ້ຍຸງລາຍ.

ຂ່າວ: ວຽງຈັນທາຍ

ພາບ: ອ.​ພ.ສ​ ເມືອງນາຊາຍທອງ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ