ອົງການປົກຄອງເມືອງອາດສະພອນ ຮ່ວມກັບອົງການພຸດທະສາສະໜາສຳພັນລາວ ພ້ອມດ້ວຍພວກດ້ວຍພາກສ່ວນກ່ຽວຂ້ອງ ຈະໄດ້ຈັດງານປະເພນີສືບສານຕຳນານບຸນກະບອງໃຫຍ່ເຜົ່າບຣູ ແລະ ຜ້າປ່າສາມັກຄີ ທີ່ບ້ານໂພນງາມ ເມືອງອາດສະພອນ ແຂວງສະຫວັນນະເຂດ ຂຶ້ນໃນລະຫວ່າງວັນທີ 30-31 ມັງກອນ 2025 ນີ້.
ພາຍໃນງານຄັ້ງນີ້ ຈະມີສູດປະລິຕະມຸງຄຸນ, ຮັບວັດຖຸປັດໃຈຈາກສັດທາທັງຫຼາຍ, ຄົບງັນຕາມຮີດຄອງປະເພນີ, ຮ່ວມຕັກບາດຖວາຍສັງຄະທານ ແລະ ພັດຕາຫານ, ເຂົ້າບິນທະບາດແດ່ພຣະສົງສາມະເນນ ແລະ ອື່ນໆ.
ການຈັດງານປະເພນີສືບສານຕຳນານບຸນກະບອງໃຫຍ່ເຜົ່າບຣູ ແລະ ຜ້າປ່າສາມັກຄີ ຂຶ້ນຄັ້ງນີ້ ເພື່ອເປັນການອະນຸລັກປົກປັກຮັກສາຮັກສາ ແລະ ສືບສານວັດທະນະທໍາອັນດີງາມຂອງຊາດ ກໍຄືຂອງທ້ອງຖິ່ນໃຫ້ເຫຼື້ອມໃສ ໃຫ້ຄົນຮຸ່ນຫຼັງໄດ້ສືບທອດຕໍ່ໆກັນ ທັງເປັນການຮັກສາປະເພນີທີ່ດີງາມໄວ້ ບໍ່ໃຫ້ເສື່ອມສູນໄປ, ເປັນການປະຕິບັດຕາມພຸດໂທວາດຂອງພຣະບໍຣົມມະສາດສະດາ, ເປັນການສ້າງຄວາມສາມັກຄີໃນພຸດທະສາສະນິກະຊົນ ທັງເປັນການສະສົມທຶນຮອນຄືສ້າງບຸນກຸສົນໄວ້ໃນພາຍພາກໜ້າ ແລະ ເພື່ອສົມທົບທຶນກໍ່ສ້າງພັດທະນາ ໂຮງກະບອງໃຫຍ່ ທີ່ສວນວັດທະນະທຳເຜົ່າບຣູ ເມືອງອາດສະພອນ ແຂວງສະຫວັນນະເຂດ ທີ່ໄດ້ສ້າງຂຶ້ນແຕ່ບໍ່ທັນສໍາເລັດ ເທື່ອ.
ຂ່າວຈາກ: ແຂວງສະຫວັນນະເຂດ
