Lonely Planet ເວັບໄຊນໍາທ່ຽວ ຊື່ດັງອັນດັບຕົ້ນໆ ຈາກປະເທດ ອັງກິດ ຍົກໃຫ້ແຂວງຫຼວງພະບາງ ເປັນໜຶ່ງໃນ 7 ສະຖານທີ່ທ່ອງທ່ຽວທີ່ດີທີ່ສຸດໃນອາຊີຕາເວັນອອກສຽງໃຕ້.
ຄູ່ມືການທ່ອງທ່ຽວທີ່ມີຊື່ສຽງໃນທົ່ວໂລກກ່າວວ່າ : ແຂວງຫຼວງພະບາງເປັນສະຖານທີ່ທີ່ດີທີ່ສຸດທີ່ຈະສໍາຜັດກັບວັດທະນະທໍາພຸດທະສາສະໜາ, ມີວັດວາອາຮາມທີ່ຖືກຮັກສາໄວ້ຢ່າງມະຫັດສະຈັນ.
Lonely Planet ລະບຸວ່າ ຫຼວງພະບາງເປັນແຂວງໜຶ່ງທີ່ມີຊື່ສຽງໂດ່ງດັງຂອງປະເທດລາວ ແລະ ເປັນເມືອງທີ່ດຶງດູດນັກທ່ອງທ່ຽວເປັນອັນດັບໜຶ່ງ ເນື່ອງຈາກສະຖານທີ່ຕັ້ງແຄມແມ່ນ້ຳຂອງ, ວັດວາອາຮາມເກົ່າແກ່, ຖະໜົນຫົນທາງທີ່ສວຍງາມ, ມີສີສັນຈາກງານບຸນປະເພນີຕ່າງໆ ແລະ ຄວາມສວຍງາມຂອງທິວທັດ.
ໃນເດືອນ ມີນາ ປີ 2023 ທີ່ຜ່ານມາ, ຫຼວງພະບາງໄດ້ຖືກແນະນຳໂດຍວາລະສານ Time ຂອງອາເມລິກາ ເປັນໜຶ່ງໃນ 50 ສະຖານທີ່ທ່ອງທ່ຽວທີ່ຍິ່ງໃຫຍ່ທີ່ສຸດໃນປີ 2023. ວາລະສານດັ່ງກ່າວໄດ້ເອີ້ນຫຼວງພະບາງວ່າ “ອຸທິຍານທີ່ຖືກເຊື່ອງໄວ້”, ໂດຍໄດ້ ກ່າວເຖິງ ນໍ້າຕົກຕາດ ທີ່ທີ່ອຸດົມສົມບູນ, ວັດວາອາຮາມ, ແລະ ການຂີ່ເຮືອຊົມຕາເວັນຕົກຢູ່ແມ່ນ້ຳຂອງ ເປັນຈຸດເດັ່ນຂອງແຂວງ.
ເດືອນມັງກອນປີນີ້, ແຂວງດັ່ງກ່າວໄດ້ຮັບລາງວັນມາດຕະຖານການທ່ອງທ່ຽວອາຊຽນ 12 ລາງວັນ ໂດຍໄດ້ຮັບຮູ້ວ່າຕົນໄດ້ປະຕິບັດຕາມມາດຕະຖານການທ່ອງທ່ຽວອາຊຽນ.
ຕຶກເກົ່າຂອງເມືອງຫຼວງພະບາງໄດ້ຖືກບັນຈຸເຂົ້າເປັນມໍລະດົກໂລກໃນປີ 1995 ໂດຍອົງການການສຶກສາ, ວິທະຍາສາດ ແລະ ວັດທະນະທຳຂອງສະຫະປະຊາຊາດ (UNESCO), ເຊິ່ງໄດ້ກຳນົດວ່າ ເປັນສະຖາປັດຕະຍະກຳ ທີ່ມີຄວາມໝາຍທາງດ້ານວັດທະນະທຳ ແລະ ສົມຄວນໄດ້ຮັບການປົກປ້ອງຈາກອົງການສະຫະປະຊາຊາດ.
ໃນໄລຍະ 2 ປີ 5 ເດືອນທີ່ຜ່ານມາ ມີນັກທ່ອງທ່ຽວເກືອບ 1,1 ລ້ານເທື່ອຄົນໄດ້ມາຢ້ຽມຢາມແຂວງ, ເຖິງວ່າຈະບັນລຸພຽງ 26,4% ຂອງຈຳນວນທີ່ໄດ້ວາງອອກຕາມແຜນການ. ອີງຕາມຂໍ້ມູນຂອງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຫຼວງພະບາງ.
ແຂວງດັ່ງກ່າວຫວັງວ່າຈະເພີ່ມນັກທ່ອງທ່ຽວເຂົ້າໃນບັນຊີລາຍຊື່ນັກທ່ອງທ່ຽວໃຫ້ໄດ້ 3 ລ້ານເທື່ອຄົນໃນປີ 2025, ຄາດວ່າຈະສ້າງລາຍຮັບໄດ້ຢ່າງໜ້ອຍ 566 ລ້ານໂດລາສະຫະລັດ.
