ການແຂ່ງຂັນຊ່ວງເຮືອປະຈຳປີນະຄອນຫຼວງວຽງຈັນທີ່ທ່າວັດຈັນກົງກັບມື້ນີ້ທີ 14 ຕຸລາ 2019 ມີທັງໝົດ 25 ລຳ ເຂົ້າຮ່ວມພິເສດມາຈາກ ແຂວງ ໜອງຄາຍ, ປະເທດໄທ 1 ລຳ. ປະເພດເຮືອປະເພນີຊາຍ 55 ສີພາຍມີ 6 ລຳ ປະກອບມີ ເຮືອລີສອດປາກນ້ຳຄານ ແຊ້ມເກົ່າ, ເຮືອຄອນສະຫວັນ 99 (2), ເຮືອອົງການແມ່ນ້ຳຂອງ, ເຮືອທະນາຄານຮ່ວມພັດທະນາ, ເຮືອເມືອງຈັນທະບູລີ ແລະ ເຮືອຄອນສະຫວັນ 99 (1). ປະເພດເຮືອປະເພນີຍິງ 55 ສີພາຍມີ 6 ລຳປະກອບມີ ບໍລິສັດແສງເພັດກໍ່ສ້າງ ແຊ້ມເກົ່າ, ຄອນສະຫວັນ 99 (1), ເມືອງ ຈັນທະບູລີ, ບ້ານທ່າພະ, ຄອນສະຫວັນ 99 (2) ແລະ ອົງການແມ່ນ້ຳຂອງ. ປະເພດເຮືອສູດຊາຍ 55 ສີພາຍມີ 7 ລຳ ປະກອບມີ ບໍລິສັດເຊື້ອໄຟເອເຊຍ, ບ້ານສີຖານ ແລະ ອຸດສາຫະກຳເຫຼັກ, ບໍລິສັດແສງເພັດກໍ່ສ້າງ, ທະນາຄານຮ່ວມພັດທະນາລາວ, ໂຊກຊາຍ ແລະ ເຮືອ ແຂວງ ໜອງຄາຍ. ສ່ວນປະເພດເຮືອກິລາ 12 ສີພາຍມີ 6 ລຳ ປະກອບມີບ້ານໄຊສະຫວ່າງ, ສາວງາມຈຳພອນ (ບ້ານນາກຸງ), ແລະ ນາວາສັກສິດ, ສົມຈັນ ມິນິມາກ, ບ້ານໄຊສະຖານ ແລະ ບ້ານເກີນ.
ການແຂ່ງຂັນໄດ້ແບ່ງອອກເປັນຈຸດຄື: ຈຸດທີໜຶ່ງຢູ່ທ່າວັດຈັນ ສຳລັບແຂ່ງຂັນເຮືອກິລາ 12 ສີພາຍ ຊຶ່ງໄດ້ຈັດຂື້ນມື້ວັນອາທິດທີ 13/10/2019 ໂດຍແມ່ນເຮືອນາວາສັກສິດໄດ້ແຊ້ມອັນດັບໝຶ່ງ, ອັນດັບສອງແມ່ນເຮືອໄຊສະຫວ່າງ, ອັນດັບສາມແມ່ນເຮືອ ໄຊສະຖານ ແລະ ອັນດັບສີ່ແມ່ນເຮືອສົມຈັນ.
ຈຸດທີສອງແມ່ນຢູ່ທ່ານ້ຳບໍລິເວນໂຮງແຮມແລນ ມາກສຳລັບແຂ່ງຂັນເຮືອຊ່ວງປະເພດ 55 ສີພາຍ ສ່ວນຜົນການແຂ່ງຂັນທາງທິມງານຂ່າວວຽງຈັນທາຍຈະລາຍງານພາຍຫຼັງທີ່ຈົບການແຂ່ງຂັນໃນຕອນແລງຂອງມື້ນີ້.
ການແຂ່ງຂັນຊ່ວງເຮືອເພື່ອສະເຫຼີມສະຫຼອງບຸນອອກພັນສາປະວໍລະນານີ້ແມ່ນຈັດຂື້ນທຸກໆປີຢູ່ ແຕ່ລະແຂວງໃນຂອບເຂດທົ່ວປະເທດ, ບາງແຂວງກໍ່ໄດ້ມີການຈັດການແຂ່ງຂັນກ່ອນບຸນອອກພັນສາ.
ຂ່າວ: ສົມພາວັນ
ພາບ: ຄຳພັນ
