Vientiane Times Lao
ແຂວງຊຽງຂວາງ ຫວັງສູ້ຊົນໃຫ້ໄດ້ 35 ຫຼຽນຄຳໃນງານມະຫາກຳກິລາແຫ່ງຊາດ ຄັ້ງທີ 11

ແຂວງຊຽງຂວາງ ຫວັງສູ້ຊົນໃຫ້ໄດ້ 35 ຫຼຽນຄຳໃນງານມະຫາກຳກິລາແຫ່ງຊາດ ຄັ້ງທີ 11

ແຂວງຊຽງຂວາງ ເຈົ້າພາບ ກຽມພ້ອມສົ່ງທັບນັກ ກິລາຈຳນວນ 705 ຄົນ, ຍິງ 274 ຄົນ ຈາກ 28 ປະເພດກິລາ ໂດຍສະເພາະກິລາຄວາມຫວັງຂອງ ແຂວງຊຽງຂວາງທີ່ຈະກວດເອົາຫຼຽນຄຳ ສ່ວນໃຫຍ່ເປັນກິລາພື້ນເມືອງເປັນຕົ້ນຕໍ ເຊັ່ນ: ໜ້າເກັກ, ໝາກຂ່າງ ແລະ ຍິງທະນູ ພ້ອມຕັ້ງເປົ້າໝາຍຈະພະຍາຍາມສູ້ຊົນໃຫ້ໄດ້ 35 ຫຼຽນຄຳ ຫຼື ຫຼາຍກວ່ານັ້ນ ເຊິ່ງຫວັງຕິດ 1 ໃນ 5 ອັນດັບທຳອິດຂອງຕາຕະລາງ ໃນງານມະຫາກຳ ກິລາແຫ່ງຊາດ ຄັ້ງທີ 11 ຫຼື ຊຽງຂວາງ ເກມ ໃນລະຫວ່າງວັນທີ 22 ມີນາ ຫາ 1 ເມສາ 2020.

ທ່ານ ທອງຜິວ ສີປັນຍາ ຮອງຫົວໜ້າ ພະແນກ ສຶກສາທິການ ແລະ ກິລາ ແຂວງຊຽງຂວາງ ໄດ້ໃຫ້ສຳພາດກັບສື່ມວນຊົນ ຫ່ວາງບໍ່ດົນມານີ້ ໃນໂອກາດທີ່ທ່ານ ມາເຂົ້າຮ່ວມກອງປະຊຸມ ສະຫຼູບຜົນງານ ປະຈຳປີ 2019 ແລະ ທິດທາງ ແຜນການປະຈຳປີ 2020 ຂອງສະຫະພັນບານ ເຕະແຫ່ງຊາດລາວວ່າ: ງານມະຫາກຳກິລາ ແຫ່ງຊາດ ຄັ້ງນີ້ແມ່ນເປັນຄັ້ງປະຫັວດສາດ ຂອງແຂວງຊຽງຂວາງ ສະນັ້ນ ພວກເຮົາຈະເຮັດ ໃຫ້ດີທີ່ສຸດ ໂດຍສະເພາະທາງດ້ານພື້ນຖານໂຄງ ລ່າງ ມີຄວາມພ້ອມ 90% ແລ້ວ ເປັນຕົ້ນແມ່ນ ບັນດາສະໜາມກິລາປະເພດຕ່າງໆ ກຽມຮອງຮັບ ງານດັ່ງກ່າວ ສ່ວນທີ່ພັກ ກໍ່ໄດ້ກະກຽມບັນ ດາໂຮງແຮມ, ເຮືອນພັກໄວ້ຮອງຮັບແຂກ ທັງພາຍໃນ ແລະ ຕ່າງປະເທດ ທີ່ມາເຂົ້າຊົມ ກິລາຄັ້ງນີ້ ແລະ ທ່ຽວຊົມແຫຼ່ງທ່ອງທ່ຽວຕ່າງໆ ຢູ່ແຂວງຊຽວຂວາງ ໃນນັ້ນ ບ່ອນພັກຂອງຄູຝຶກ ແລະ ນັກກິລາ ກໍ່ມີພ້ອມແລ້ວ 100%.

ງານມະຫາກຳກິລາແຫ່ງຊາດ ຄັ້ງທີ 11 ທີ່ ແຂວງຊຽງຂວາງ 2020 ຈະມີການຊິງໄຊ 28 ປະເພດ ປະກອບມີ: ບານເຕະຊາຍ, ບານເຕະຍິງ, ແລ່ນ-ລານ, ບານບ້ວງ, ເທັນນິດ, ດອກປີກໄກ່, ກະຕໍ້, ປິ່ງປ່ອງ, ເທຄວັນໂດ, ຢູໂດ, ປັນຈັກສີລັດ, ວູຊູ, ໝາກແລ້, ໝາກເສິກ, ເຮືອຊ່ວງ, ໝາກຂ່າງ, ໜ້າເກັກ, ຍິງທະນູ, ລົດຖີບ, ລອຍນໍ້າ, ບານສົ່ງໃນຮົ່ມ, ເປຕັງ, ໂບລິງ, ກ໊ອບ, ຍິງປືນ, ມວຍລາວ, ມວຍສາກົນ ແລະ ສະນຸກເກີ.

ຂ່າວ: ບົວຜັນ

ແຟ້ມພາບ: ສຸກນີລັນດອນ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ