ອົງການປົກຄອງແຂວງດຽນບຽນ ແຫ່ງ ສສ ຫວຽດນາມ ໄດ້ນໍາເຄື່ອງອຸປະກອນການແພດ ປ້ອງກັນພະຍາດໂຄວິດ-19 ມອບໃຫ້ແກ່ອົງການປົກຄອງແຂວງຜົ້ງສາລີ ແຫ່ງ ສປປ ລາວ, ເນື່ອງໃນໂອກາດ ທີ່ຄະນະຜູ້ແທນ ຫ້ອງວ່າການແຂວງຜົ້ງສາລີ ກັບ ຫ້ອງວ່າການແຂວງດຽນບຽນ ໄດ້ມາພົບປະປືກສາຫາລືດ້ານວິຊາການໃນການກະກຽມໃຫ້ແກ່ການພົບປະການນຳຂັ້ນສູງຂອງສອງແຂວງ, ເມື່ອວັນທີ 15 ທັນວາ 2021 ຜ່ານມານີ້ ຢູ່ທີ່ຫຼັກໝາຍ 113 ຊາຍແດນ ລາວ-ຫວຽດນາມ.
ເຄື່ອງອຸປະກອນການແພດທີ່ນໍາມາຊ່ວຍເຫຼືອຄັ້ງນີ້ ປະກອບມີ ຜ້າອັດປາກການແພດ 4 ຊັ້ນ ຈຳນວນ 4 ແກັດ, ເຈວລ້າງມື 13 ແກັດ, ຊຸດປ້ອງກັນ PPE ຈຳນວນ 6 ແກັດ ແລະ ເຫຼົ້າ 90 ຈຳນວນ 44 ແກັດ ລວມມູນຄ່າທັງໝົດ 99 ລ້ານກ່ວາດົງ.
ສຳລັບ ເຄື່ອງຊ່ວຍເຫຼືອດັ່ງກ່າວ ທາງອົງການປົກຄອງແຂວງ ຜົ້ງສາລີ ຈະນຳໄປມອບຕໍ່ໃຫ້ອົງການປົກຄອງແຕ່ລະເມືອງເພື່ອນຳໃຊ້ເຂົ້າໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ທີ່ພວມແຜ່ລະບາດຢູ່ແຕ່ລະເມືອງພາຍໃນແຂວງ.
ຮອດປັດຈຸບັນນີ້ ແຂວງຜົ້ງສາລີ ມີຜູ້ຕິດເຊື້ອສະສົມຈາກພະຍາດໂຄວິດ-19 ແລ້ວ ຈຳນວນທັງໝົດ 1,938 ຄົນ.
ພາບ-ຂ່າວ: ແສງຄຳ ສາລີ
