ອໍານາດການປົກຄອງແຂວງບໍ່ແກ້ວໄດ້ເປີດເສັ້ນທາງທ່ອງທ່ຽວສີຂຽວ ເມື່ອວັນທີ 8 ພຶດສະພາ ທີ່ຜ່ານມານີ້ ເພື່ອຕ້ອນຮັບນັກທ່ອງທ່ຽວພາຍຫຼັງທີ່ລັດຖະບານໄດ້ມີການເປີດດ່ານສາກົນທຸກດ່ານໃນຂອບເຂດທົ່ວປະເທດນັບແຕ່ມື້ວັນທີ 9 ພຶດສະພາ 2022 ນີ້ເປັນຕົ້ນໄປໂດຍສະເພາະຕ້ອນຮັບນັກທ່ອງທ່ຽວຈາກປະເທດໄທທີ່ຈະຂ້າມຂົວມິດຕະພາບລາວ-ໄທແຫ່ງທີ 4 ມາທ່ຽວແຂວງບໍ່ແກ້ວ.
ການເປີດເສັ້ນທາງດັ່ງກ່າວ ເຂົ້າຮ່ວມໂດຍທ່ານ ປອ ບົວຄົງ ນາມມະວົງ ກຳມະການສູນກາງພັກ, ເລຂາພັກແຂວງ, ເຈົ້າແຂວງ ບໍ່ແກ້ວ ພ້ອມດ້ວຍຄະນະນຳຂັ້ນແຂວງ, ມີສະມາຄົມ ຖີບລົດຖີບແຫ່ງຊາດລາວ,ຈາກແຂວງຫຼວງນໍ້າທາ,ແຂວງອຸດົມໄຊ ແຂວງຫຼວງພະບາງ, ຕະຫຼອດຮອດນັກທຸລະກິດ, ຜູ້ປະກອບການເຂົ້າຮ່ວມ.
ການເປີດເສັ້ນທາງທ່ອງທ່ຽວສີຂຽວນີ້ແມ່ນໄດ້ເປີດທົດລອງຢູ່ເມືອງຫ້ວຍຊາຍເປັນແຫ່ງທໍາອິດ,
ເປັນການປະຕິບັດຕາມແຜນການຟື້ນຟູການທ່ອງທ່ຽວຂອງ ສ ປປ ລາວ, ແຜນການເປີດປະເທດເພື່ອຮອງຮັບນັກທ່ອງທ່ຽວຕ່າງປະເທດ ຕິດພັນກັບແຜນການຕ່າງໆ ຂອງໂຄງການລາວເຊບ, ເພື່ອຮອງຮັບນັກທ່ອງທ່ຽວຕ່າງປະເທດທີ່ຈະເຂົ້າມາທ່ອງທ່ຽວຢູ່ ສ ປປ ລາວ ບົນພື້ນຖານຮູບແບບການທ່ອງທ່ຽວເຂດຂຽວ (Green Travel Zone) ເສັ້ນທາງການທ່ອງທ່ຽວສີຂຽວ (Green travel Trail) ຊຶ່ງ ມີ 4 ບໍລິສັດທ່ອງທ່ຽວທີ່ມີຄວາມພ້ອມ ແລະ ຜ່ານການປະເມີນຕາມມາດຕະຖານ, ເງື່ອນ ໄຂທີ່ໄດ້ກໍານົດໄວ້, ສະຖານທີ່ພັກແຮມທີ່ມີຄວາມພ້ອມ ແລະ ຜ່ານການປະເມີນຕາມມາດຕະຖານ, ເງື່ອນໄຂທີ່ໄດ້ກຳນົດໄວ້ມີໂຮງແຮມ 8 ແຫ່ງ, ເຮືອນພັກ 11 ແຫ່ງລວມທັງໝົດ 19 ແຫ່ງ, ຮ້ານອາຫານທີ່ມີຄວາມພ້ອມ ແລະ ຜ່ານການປະເມີນຕາມມາດຕະຖານ, ເງື່ອນໄຂທີ່ໄດ້ກຳນົດໄວ້ມີ 8 ຮ້ານ, ສະຖານທີ່ແຫຼ່ງທ່ອງທ່ຽວ ທີ່ສາມາດກຳນົດເປັນສະຖານທີ່ເປີດໃຫ້ບໍລິການນັກທ່ອງທ່ຽວຢູ່ເມືອງຫ້ວຍຊາຍປະກອບມີ 2 ແຫ່ງຄື: ປ່າສະຫງວນແຫ່ງຊາດນ້ຳກ່ານ ຂອງບໍລິສັດອະນຸລັກຊີວະນາໆພັນ, ຕັ້ງຢູ່ບ້ານຕູບ ເມືອງຫ້ວຍຊາຍ ບໍລິການນຳທ່ຽວພື້ນທີ່ສະເພາະ ແລະ ທ່ອງທ່ຽວ ( City Tour ) ພາຍໃນເມືອງຫ້ວຍຊາຍປະກອບມີຫໍຫຼັກເມືອງ, ວັດທາດຜາດ່າ, ວັດຈອມເຂົາມະນີຣັດ, ຄ້າຍເກົ່າທະຫານຝຣັ່ງ, ຜ້າຜະ, ຮ້ານເຈຍລະໄນບໍ່ແກ້ວ.
ການກະກຽມຄວາມພ້ອມທາງດ້ານຂໍ້ມູນຂ່າວສານການທ່ອງທ່ຽວຂອງແຂວງ ເພື່ອຕອບສະໜອງໃຫ້ກັບນັກທ່ອງທ່ຽວທັງພາຍໃນ ແລະ ຕ່າງປະເທດ ແມ່ນໄດ້ສໍາເລັດການສ້າງປຶ້ມຄູ່ມືການທ່ອງທ່ຽວຂອງແຂວງບໍ່ແກ້ວ (ຂໍ້ມູນແຫຼ່ງທ່ອງທ່ຽວ) ສະບັບພາສາລາວ ແລະ ຈະສືບຕໍ່ສ້າງເປັນພາສາຕ່າງປະເທດ, ໄດ້ອັບໂຫຼດຂໍ້ມູນຂ່າວສານການທ່ອງທ່ຽວຂອງແຂວງລົງຕູ້ຄີອອດ (ຜູ້ສະໜອງຂໍ້ມູນດ້ວຍລະບົບອີເລັກໂຕຼນິກ) ແລະ ກະກຽມຈັດພິມ (ບົວຊົວ) ແຜ່ນພັບ. ສໍາເລັດການລົງປະເມີນການຮັບວັກຊິນກັນພະຍາດໂຄວິດ-19, ພະນັກງານທີ່ເຮັດວຽກຢູ່ຫົວໜ່ວຍທຸລະກິດທ່ອງທ່ຽວ, ໂຮງແຮມ, ຣີສອດ ແລະ ຮ້ານອາຫານ, ສະຖານທີ່ແຫຼ່ງທ່ອງທ່ຽວໃນເທດສະບານ ເພື່ອກະກຽມຄວາມພ້ອມບໍລິການ ແລະ ຮອງຮັບນັກທ່ອງທ່ຽວໄດ້ຈຳນວນ 21 ແຫ່ງ.
ຂ່າວ-ພາບ: ຄຳພັນ ແກ້ວມະນີ
