Vientiane Times Lao
ແຂວງຜົ້ງສາລີ ແລະ ແຂວງຫົວພັນ ຍັງສັກວັກຊິນໃຫ້ປະຊາຊົນຫຼຸດ 30%

ແຂວງຜົ້ງສາລີ ແລະ ແຂວງຫົວພັນ ຍັງສັກວັກຊິນໃຫ້ປະຊາຊົນຫຼຸດ 30%

ວັກຊິນປ້ອງກັນພະຍາດໂຄວິດ-19 ທີ່ຈະສັກໃຫ້ປະຊາຊົນໃຫ້ໄດ້ 50% ຕາມແຜນນັ້ນແມ່ນມີພຽງພໍ ເພາະໃນທ້າຍເດືອນນີ້ປະເທດລາວຈະໄດ້ຮັບອີກ 2,5 ລ້ານໂດສ ໂດຍຍັງມີພຽງແຕ່ 2 ແຂວງຄື: ຫົວພັນ ແລະ ຜົ້ງສາລີ ທີ່ຍັງສັກວັກຊິນໃຫ້ປະຊາຊົນຊ້າຄືຍັງຫຼຸດ 30% ຫຼື ຍັງບໍ່ໄດ້ຕາມຄາດໝາຍ.

ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຕາງໜ້າໂດຍທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸ​ຂະ​ພາບກະຊວງສາທາລະນະສຸກໄດ້ລາຍງານສະພາບການສັກວັກຊິນປ້ອງກັນພະຍາດໂຄວິດ-19 ເມື່ອມໍ່ໆມານີ້ໃຫ້ຮູ້ວ່າ: ຮອດປັດຈຸບັນປະຊາຊົນລາວໄດ້ຮັບການສັກວັກຊິນເຂັມທີ 1 ແລ້ວຫຼາຍກວ່າ 3,3 ລ້ານຄົນ ກວມ 45,5% ຂອງຈໍານວນປະຊາກອນໃນຂອບເຂດທົ່ວ ປະເທດ ແລະ ເຂັມທີ 2 ແລ້ວຫຼາຍກວ່າ 2,8 ລ້ານຄົນກວມ 39,4%. ວັກຊິນປ້ອງກັນພະຍາດໂຄວິດ-19 ທີ່ຈະສັກໃຫ້ປະຊາຊົນໃນຂອບເຂດທົ່ວປະເທດໃຫ້ໄດ້ 50% ນັ້ນ ໃນປີ 2021 ນີ້ແມ່ນມີພຽງພໍ, ປັດຈຸບັນ ຍັງມີແຕ່ແຂວງຫົວພັນ ແລະ ຜົ້ງສາລີເທົ່ານັ້ນທີ່ຍັງສັກຢາວັກຊິນໃຫ້ປະຊາຊົນຫຼຸດ 30% ຊຶ່ງຕ້ອງສູ້ຊົນສັກໃຫ້ມັນທັນກັບແຂວງອື່ນໆເພາະໃຫ້ໄດ້ຕາມແຜນຄາດໝາຍທີ່ວາງໄວ້ຄືໃຫ້ໄດ້ສັກວັກຊິນໃຫ້ປະຊາຊົນໃຫ້ກວມ 50% ຂອງປະຊາກອນໃນຂອບເຂດທົ່ວປະເທດ ຊຶ່ງໃນທ້າຍເດືອນນີ້ປະເທດລາວຈະໄດ້ຮັບອີກ 2,5 ລ້ານໂດສ.

ທ່ານ ດຣ. ພອນປະເສີດແຈ້ງໃຫ້ຮູ້ຕື່ມວ່າ: ປັດຈຸບັນນີ້ທົ່ວໂລກຕົວເລກຜູ້ຕິດເຊື້ອ ແລະ ເສຍຊີວິດຈາກພະຍາດໂຄວິດ-19 ແມ່ນຫຼຸດລົງກວ່າ 50% ກໍຍ້ອນປະຊາຊົນໄດ້ຮັບການສັກວັກຊິນ, ຫຼາຍປະເທດປະຊາຊົນສາມາດເຂົ້າເຖິງວັກຊິນໄດ້ເຖິງ 90% ໂດຍປະເທດນັ້ນສາມາດເປີດປະເທດໄດ້ແລ້ວ ດັ່ງນັ້ນການສັກວັກຊິນແມ່ນມີຄວາມຈໍາເປັນທີ່ສຸດຖ້າຢາກຢູ່ຮ່ວມກັບພະຍາດດັ່ງກ່າວແບບປົກກະຕິ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ