Vientiane Times Lao
ແຂວງຫຼວງພະບາງ ເນັ້ນໃສ່ 3 ຍຸດທະວິທີ ເພື່ອປ້ອງກັນການແຜ່ລະບາດຂອງພະຍາດໂຄວິດ-19

ແຂວງຫຼວງພະບາງ ເນັ້ນໃສ່ 3 ຍຸດທະວິທີ ເພື່ອປ້ອງກັນການແຜ່ລະບາດຂອງພະຍາດໂຄວິດ-19

ທ່ານ ດຣ ຄຳສອນ ພົງສະຫວັດດີ, ຫົວໜ້າພະແນກສາທາລະນະສຸກ ແຂວງຫຼວງພະບາງ ໄດ້ຕາງໜ້າໃຫ້ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຂັ້ນແຂວງ ລາຍງານສະພາບການປ້ອງກັນການລະບາດ ປະຈໍາວັນ 3 ພຶດສະພາ 2021 ຜ່ານມານີ້  ໂດຍທ່ານ ໄດ້ເນັ້ນໃສ່ໃຫ້ ສືບຕໍ່ຍົກສູງມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ດ້ວຍ 3 ຍຸດທະວິທີ ຄື:
ຍຸດທະວິທີທີ1: ແມ່ນເນັ້ນໃສ່ຈຳກັດບໍ່ໃຫ້ຄົນອອກຈາກບ້ານ, ຈາກເຮືອນ, ປິດການເຂົ້າອອກເມືອງໂດຍບໍ່ຈຳເປັນແທ້ໆ, ອັນນີ້ແມ່ນຍຸດທະວິທີໃນການປ້ອງກັນທີ່ໄດ້ຮັບຜົນດີໃນການຄວບຄຸມການລະບາດພະຍາດ ເພື່ອບໍ່ໃຫ້ຄົນທາງອື່ນນໍາເອົາພະຍາດເຂົ້າມາແຜ່ລະບາດ ເຖີງແມ່ນວ່າມາດຕະການດັ່ງກ່າວຈະມີຜົນກະທົບຕໍ່ການດຳລົງຊີວິດຂອງພໍ່ແມ່ພີ່ນ້ອງຂອງພວກເຮົາກໍ່ຕາມ, ແຕ່ວ່າມັນກໍ່ມີຄວາມຈຳເປັນຕ້ອງໄດ້ເຂັ້ມງວດໃນໄລຍະທີ່ມີການລະບາດໃນຊຸມຊົນ, ສະນັ້ນຈື່ງຮຽກຮ້ອງໃຫ້ໃຫ້ຊາວຫຼວງພະບາງຈົ່ງ ພ້ອມກັນປະຕິ ບັດຢ່າງເຂັ້ມງວດເພື່ອພ້ອມກັນຜ່ານຜ່າສະພາບການລະບາດພະຍາດດັ່ງກ່າວໃນທົ່ວແຂວງ.
ຍຸດທະວິທີທີ2: ແມ່ນໃຫ້ເອົາໃຈໃສ່ສຶບຕໍ່ເລັ່ງຊອກຫາຜູ້ທີ່ມີຄວາມສ່ຽງ ທີ່ໄດ້ມີການສຳຜັດໃກ້ຊິດກັບຜູ້ຕິດເຊື້ອໃຫ້ໝົດ ເພື່ອຈະໄດ້ເກັບຕົວຢ່າງມາຊອກຫາເຊື້ອພະຍາດໂດຍໄວ ແລະ ປີ່ນປົວໄວ, ພ້ອມທັງຈໍາກັດບໍລິເວນໃນສູນທີ່ຄະນະສະເພາະກິດແຕ່ລະຂັ້ນຈັດຫາໃຫ້ຕະຫຼອດໄລຍະທີ່ລໍຖ້າຜົນກວດຕາມຫຼັກວິຊາການຈົນຄົບ 14 ມື້ ຖ້າຜົນອອກມາລົບ ຈື່ງກັບໄປສຶບຕໍ່ຈໍາກັດບໍລິເວນຢູ່ເຮືອນຂອງຕົນເອງ, ພ້ອມກັນນັ້ນ ຮຽກຮ້ອງໃຫ້ຄະນະສະ ເພາະກິດຂັ້ນເມືອງ ເກັບກຳຂໍ້ມູນຂອງຜູ້ສຳຜັດໃກ້ຊິດກັບຜູ້ຕິດເຊື້ອໃນເມືອງຕົນເອງໃຫ້ລະອຽດ, ແລ້ວນໍາມາຈໍາກັດບໍລິເວນຢູ່ໃນສູນຈຳກັດບໍລິເວນຂອງເມືອງ, ພ້ອມທັງລາຍງານໃຫ້ທີມງານຂັ້ນແຂວງລົງເກັບຕົວຢ່າງມາກວດຫາເຊື້ອຕາມຫຼັກວິຊາການ ເພາະວ່າໂຮງໝໍແຂວງຫຼວງພະບາງຂອງພວກເຮົາສາມາດກວດຫາເຊື້ອດ້ວຍເຄື່ອງ CPR ໄດ້ປະມານ 150 ຄົນຕໍ່ມື້.
ຍຸດທະວິທີທີ3: ແມ່ນສຸມໃສ່ວຽກສັກຢາວັກຊີນປ້ອງກັນແມ່ນມາດຕະການໜຶ່ງເພື່ອຍົກສູງພູມຄຸ້ມກັນໝູ່ໃຫ້ສູງແມ່ນມາດຕະການປ້ອງກັນການລະບາດ ພະຍາດຢ່າງມີປະສິດທິພາບ ຊຶ່ງ ປະຈຸບັນນີ້ທາງພະແນກສາທາລະນະສຸກພວກເຮົາໄດ້ສຶບຕໍ່ດຳເນີນການສັກຢາວັກຊີນຮອບ II ຢູ່ 11 ເມືອງ ແລະ ນະຄອນຫຼວງພະບາງມີ 3ຈຸດ ຄື: ຈຸດໂຮງໝໍ 107, ຈຸດໂຮງຮຽນວິທະຍາໄລສຸຂະພາບ (ພູໝອກ) ແລະ ຈຸດໂຮງຮຽນສ້າງແພດ (ໜ້າເດີ່ນທາດຫຼວງ) ສາມາດສັກໄດ້ປະມານ 750 ຄົນຕໍ່ວັນ.

ຂໍ້ມູນ: ຂ່າວສານຫຼວງພະບາງ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ