Vientiane Times Lao
ແຂວງອັດຕະປື ຈະສະຫຼອງບຸນປີໃໝ່ລາວ ໄປພ້ອມກັບມາດຕະການປ້ອງກັນພະຍາດ ໂຄວິດ- 19

ແຂວງອັດຕະປື ຈະສະຫຼອງບຸນປີໃໝ່ລາວ ໄປພ້ອມກັບມາດຕະການປ້ອງກັນພະຍາດ ໂຄວິດ- 19

ຫ້ອງວ່າການແຂວງອັດຕະປື ໄດ້ອອກແຈ້ງການເມື່ອບໍ່ດົນມານີ້ ວ່າ: ການສະເຫຼີມສະຫຼອງບຸນປີໃໝ່ລາວ ພສ 2564 ຫຼື ຄສ 2021 ໃນວັນທີ 14,15 ແລະ 16 ເມສາ 2021 ນີ້ ໃຫ້ຄະນະສະເພາະກິດສະກັດກັ້ນ ແລະ ປ້ອງກັນໂຄວິດ-19 ຂັ້ນແຂວງ, ຂັ້ນເມືອງ ສືບຕໍ່ປະ ຕິບັດໜ້າທີ່ຂອງຕົນດ້ວຍມາດຕະການຕ່າງໆ ເພື່ອແນໃສ່ຮັບປະກັນບໍ່ໃຫ້ມີການແຜ່ລະບາດພະຍາດໂຄວິດ-19 ໃນໄລຍະສະຫຼອງປີໃໝ່ນີ້ຢ່າງເດັດຂາດ ພ້ອມທັງໃຫ້ອົງການປົກຄອງທຸກຂັ້ນ ສົມທົບກັບກໍາລັງປະກອບອາວຸດຂັ້ນຕົ້ນ ເພີ່ມທະວີລາດຕະເວນຢູ່ຕາມບໍລິເວນຊາຍແດນ, ເຄື່ອນໄຫວເວນຍາມສໍານັກງານ-ອົງການ ແລະ ຕາມບ້ານຊ່ອງຕ່າງໆ,ຕິດຕາມຄົນເຂົ້າອອກຕາມດ່ານຕ່າງໆ ຢ່າງເຄັ່ງຄັດ ເພື່ອຮັກສາຄວາມສະຫງົບ,ຄວາມເປັນລະບຽບຮຽບຮ້ອຍໃຫ້ໄດ້ເປັນປົກກະຕິດີ.

ຫ້ອງວ່າການແຂວງອັດຕະປື ໄດ້ແຈ້ງຕື່ມອີກວ່າ: ການສະເຫຼີມສະຫຼອງບຸນປີໃໝ່ລາວ ປີນີ້ ແມ່ນໃຫ້ປະຕິບັດໃນຂອບເຂດຂອງຮີດຄອງປະເພນີ ແລະ ຂະນົບທໍານຽມອັນດີງາມ ຊຶ່ງໃຫ້ຈັດຂຶ້ນຢູ່ພາຍໃນຄອບຄົວ, ສໍານັກງານອົງການ, ວັດວາອາຮາມແລະ ສະຖານທີ່ສັກກະລະບູຊາຕ່າງໆ (ການບາສີສູ່ຂັວນ, ການສົງພະຕ່າງໆ).

ໃນນັ້ນ ກິດຈະກໍາທີ່ບໍ່ອະນຸຍາດໃຫ້ດຳເນີນໃນຊ່ວງໄລຍະປີໃໝ່ ມີ: ການສະແດງສິລະປະດົນຕີ ຢູ່ຕາມວັດວາອາຮາມ,ສະຖານທີ່ສາທາລະນະຕ່າງໆ ລວມທັງຢູ່ຕາມຫາດ ແຄມນໍ້າ, ການຫົດນໍ້າກັນດ້ວຍນ້ຳເປື້ອນ, ນໍ້າສີ ຫຼື ນໍາໃຊ້ພາຫະນະ, ອຸປະກອນອື່ນໆ ເພື່ອຫົດນ້ຳຄົນອື່ນ ຢູ່ຕາມຖະໜົນຫົນທາງ ແລະ ສະຖານທີ່ຕ່າງໆ ລວມທັງບໍ່ໃຫ້ຈັດງານສະແດງດົນຕີຄອນເສີດ, ງານປະກວດນາງສັງຂານ ,ແຫ່ນາງສັງຂານ, ການຈັດງານຕະຫຼາດນັດ (ຍົກເວັ້ນຢູ່ຕາມສະຖານທີ່ ທີ່ລັດໄດ້ກໍານົດໄວ້).

ຂໍ້ມູນ: ວັດທະນາ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ