Vientiane Times Lao
ແຂວງ ຫູໜານ ຊ່ວຍເຫຼືອອຸປະກອນການແພດໃຫ້ແຂວງອຸດົມໄຊ

ແຂວງ ຫູໜານ ຊ່ວຍເຫຼືອອຸປະກອນການແພດໃຫ້ແຂວງອຸດົມໄຊ

ອົງການປົກຄອງປະຊາຊົນແຂວງ ຫູໜານ ແຫ່ງ ສປຈີນ ຊ່ວຍເຫຼືຶອອຸປະກອນການແພດ, ມູນຄ່າ 469.300 ຢວນ ຫຼື ປະມານ 660 ລ້ານກີບ ໃຫ້ອົງການປົກຄອງແຂວງອຸດົມໄຊ ເພື່ອນຳໃຊ້ເຂົ້າໃນການປ້ອງກັນ, ຄວບຄຸມ ແລະ ສະກັດກັ້ນພະຍາດໂຄວິດ-19, ຊຶ່ງເຄື່ອງຊ່ວຍເຫຼືອດັ່ງກ່າວປະກອບມີ ຜ້າອັດປາກ, ເຄື່ອງວັດແທອຸນຫະພູມ ແລະ ເຄື່ອງມືການແພດອີກຫຼາຍປະເພດທີ່ຈໍາເປັນ ເພື່ອສະກັດກັ້ນພະຍາດດັ່ງກ່າວ.

ພິທີມອບ-ຮັບເຄື່ອງດັ່ງກ່າວ ຈັດຂຶ້ນໃນວັນທີ 20 ພະຈິກ 2020 ນີ້, ລະຫວ່າງ ຕາງໜ້າອົງການປົກຄອງແຂວງຫູໜານ ມອບໂດຍ ຮອງຫົວໜ້າກົງສຸນໃຫ່ຍ ສປຈີນ ປະຈຳແຂວງຫຼວງພະບາງ, ທ່ານ ນາງ ຫວາງໂລ້ ແລະ ຕາງໜ້າອົງການປົກຄອງແຂວງ ອຸດົມໄຊ ຮັບໂດຍ ຮອງເຈົ້າແຂວງ, ຫົວໜ້າຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂການລະບາດໂຄວິດ- 19ຂັ້ນແຂວງ, ທ່ານ ສົມຈິດ ປັນຍາສັກ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ປະຈຸບັນ, ສປປ ລາວ ມີລາຍງານຜູ້ຕິດເຊື້ອໂຄວິດ-19 ພຽງແຕ່ 25 ຄົນເທົ່ານັ້ນ, ໃນນັ້ນ 23 ຄົນ ໄດ້ປິ່ນປົວຫາຍດີ ກັບບ້ານແລ້ວ (ຍັງມີພຽງສອງຄົນທີ່ຍັງນອນຢູ່ໂຮງໝໍເພື່ອຕິດຕາມອາການ), ໂດຍສະເພາະ ສປປ ລາວ ຍັງບໍ່ມີຜູ້ເສຍຊີວິດຈາກພະຍາດດັ່ງກ່າວ ແຕ່ເຖິງຢ່າງໃດກໍ່ຕາມ, ລັດຖະບານລາວ ກໍບໍ່ໄດ້ນິ້ງນອນໃຈ ແລະ ເຫັນວ່າ ສປປ ລາວ ຍັງມີຄວາມສ່ຽງສູງທີ່ອາດຈະມີການລະບາດຂຶ້ນອີກຮອບໃໝ່ ເນື່ອງຈາກວ່າ ຫຼາຍປະເທດຍັງມີການລະບາດ.

ຂ່າວ: ຂ ອຸດົມໄຊ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ