Vientiane Times Lao
ແຜ່ນດິນໄຫວກະທົບເມືອງຫົງສາ ໄຊຍະບູລີ ໜັກໜ່ວງ

ແຜ່ນດິນໄຫວກະທົບເມືອງຫົງສາ ໄຊຍະບູລີ ໜັກໜ່ວງ

ແຂວງໄຊຍະບູລີໄດ້ລາຍງານວ່າພາຍຫຼັງທີ່ເກີດແຜ່ນດິນໄຫວໃນຕອນເຊົ້າທີ່ຜ່ານມາ ວັນທີ 21 ພະຈິກ 2019 ໄດ້ລາຍງານວ່າ ເຫດການດັ່ງກ່າວເຮັດໃຫ້ບ້ານເຮືອນເປເພໜັກສົມຄວນຢູ່ຫຼາຍເຂດໃນເມືອງຫົງສາ ທີ່ມີຊາຍແດນ ຕິດກັບ ແຂວງ ນ່ານ ຂອງ ປະເທດໄທ.

ທ່ານນາງບຸນພັກ ອິນທະປັນຍາ ຮອງເຈົ້າແຂວງ ແຂວງໄຊຍະບູລີໄດ້ໃຫ້ສຳພາດຕໍ່ທີມງານວຽງຈັນທາຍວ່າ: ແຜ່ນດິນໄຫວດັ່ງກ່າວໄດ້ສ້າງຄວາມເສຍຫາຍ ແລະ ຮູ້ສືກໄດ້ຄວາມສັ່ນສະເທືອນ ຢູ່ທຸກໆເມືອງ ຂອງແຂວງໄຊຍະບູລີ ແຕ່ ຢູ່ເມືອງຫົງສາຈະໄດ້ຮັບຜົນກະທົບໜັກກວ່າເມືອງອື່ນໆ ມີເຮືອນຫຼາຍຫຼັງພັງ ແລະ ເປເພ ແຕ່ຍັງບໍ່ທັນມີລາຍງານ ຜູ້ບາດເຈັບຫຼື ເສຍຊີວິດ. ປະຈຸບັນທາງຫ້ອງວ່າການແຂວງກຳລັງສົ່ງພະນັກງານລົງຕິດຕາມ ແລະ ເກັບກຳຂໍ້ມູນຕົວຈິງຢ່າງລະອຽດ.  

ເວລາປະມານ 4 ໂມງເຊົ້າຂອງມື້ນີ້ ໄດ້ເກີດເຫດແຜ່ນດິນໄຫວທີ່ຄາດວ່າຈະມີຈຸດສູນກາງຢູ່ແຂວງໄຊຍະບູລີ ພາກເໝືອຂອງປະເທດລາວ ແລະ ມີການສັ່ນສະເທືອນມາອີກໃນເວລາປະມານ 7 ໂມງ ເຊິ່ງມີຄວາມຮູ້ສຶກໄດ້ຮອດ ນະຄອນຫຼວງວຽງຈັນ.

ທ່ານ ເດດມະນີ ເຫງົ້າສະຫວັດ ປະຊາຊົນ ປ້ານສີເມືອງ, ເມືອງ ໄຊຍະບູລີ ແຂວງໄຊຍະບູລີ ໄດ້ໃຫ້ສຳພາດກັບໜັງສືພິມວຽງຈັນທາຍ ວ່າ : ເວລາທີ່ເກີດເຫດ ແມ່ນກຳລັງນອນຢູ່, ຄວາມແຮງສັ່ນສະເທືອນຂອງແຜ່ນດິນໄຫວ ໄດ້ປຸກພວກເຮົາຂຶ້ນມາໃນເວລາປະມານ 4 ໂມງ 5 ນາທີ, ໂຊກດີ ເຮືອນຂ້າພະເຈົ້າບໍ່ໄດ້ມີຄວາມເສຍຫາຍຫຍັງຫຼາຍ.

ທ່ານ ເດດມະນີ ໄດ້ອະທິບາຍຕື່ມອີກວ່າ : “ຄືມີລົດຕອກເສົາເຂັມ ແລະ ລົດໂລຢຽບທາງກຳລັງເຮັດວຽກກໍ່ສ້າງຢູ່ຂ້າງບ້ານ, ສັ່ນສະເທືອນໄປໝົດ, ຈົນລູກຊາຍຖາມວ່າ ແມ່ນໃຜມາຕອກເສົາເຂັມຢູ່ແຖວນີ້. ພໍຕື່ນຂື້ນມາ ແລະ ຄິດເບິ່ງດີໆກໍ່ນຶກເຖິງແຜ່ນດິນໄຫວ,” 

ໃນຕອນເຊົ້າມື້ນີ້, ສື່ມວນຊົນປະເທດເພຶ່ອນບ້ານໄດ້ລາຍງານເຫດການແຜ່ນດິນໄຫວໃນຄັ້ງນີ້ໃນມຸມທີ່ແຕກຕ່າງກັນ ໂດຍສະເພາະແມ່ນໂຕເລກການສັ່ນສະເທືອນຂອງເຫດການໃນຄັ້ງນີ້, ແຕ່ກົມອຸຕຸນິຍົມວິທະຍາຂອງໄທ ໄດ້ລາຍງານຜ່ານເວບໄຊທາງການ http://www.earthquake.tmd.go.th/home.php ວ່າ ແຜ່ນດິນໄຫວດັ່ງກ່າວໄດ້ມີຈຸດສູນກາງຢູ່ທີ່ ແຂວງໄຊຍະບູລີ, ປະເທດລາວ ໃນເວລາ 4 ໂມງ 3 ນາທີ ມີຄວາມແຮງຂະໜາດ 5.9 ແລະ ຂະໜາດ 6.4 ເວລາ 6 ໂມງ 50 ນາທີ.

ປະຈຸບັນຍັງບໍ່ໄດ້ມີລາຍງານຄວາມເສຍຫາຍໃນເຫດການຄັ້ງນີ້, ສວ່ນການລາຍງານຢ່າງເປັນທາງການກ່ຽວກັບໂຕເລກຂະໜາດຂອງແຜ່ນດິນໄຫວ, ຄວາມເສຍຫາຍ ແລະ ຈຸດສູນກາງຂອງເຫດການດັ່ງກ່າວ ແມ່ນຈະໄດ້ລາຍງານຕາມພາຍຫຼັງ.

ຂ່າວ: ວຽງຈັນທາຍ

ພາບ: ໂຄງການໄຟຟ້າຫົງສາ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ