ແຫຼ່ງທ່ອງທ່ຽວບຶງໜອງເທົາ ແລະ ຖໍ້າປາເຊືອມ ຕັ້ງຢູ່ບ້ານນາຂ້າງເມືອງທ່າແຂກ ແຂວງຄຳມ່ວນຈະເປີດບໍລິການໃນເດືອນເມສາ 2025 ນີ້ ໂດຍບໍລິສັດ ເພັດມະນີ ເຄພີຊີ ຈໍາກັດຜູ້ດຽວເປັນຜູ້ສໍາປະທານແຫຼ່ງທ່ອງທ່ຽວດັ່ງກ່າວ.
ທ່ານ ເຂັມເພັດ ແກ້ວເພຍຈັນ ປະທານບໍລິສັດ ເພັດມະນີ ເຄພີຊີ ຈໍາກັດຜູ້ດຽວ ໄດ້ລາຍງານໃຫ້ຮູ້ວ່າ: ແຫຼ່ງທ່ອງທ່ຽວດັ່ງກ່າວເປັນແຫຼ່ງທ່ອງທ່ຽວທີ່ອຸດົມສົມບູນໄປດ້ວຍທຳມະຊາດ ທີ່ສວຍງາມ, ມີສັດນໍ້າ, ສັດປ່າຫຼາຍຊະນິດ, ມີເນື້ອທີ່ເຂດພັດທະນາ 9,89 ເຮັກຕາ ແລະ ເນື້ອທີ່ເຂດອະນຸລັກ 404 ເຮັກຕາ. ໃນນັ້ນ ປະກອບມີການປຸກສ້າງສະຖານທີ່ຮອງຮັບ ແລະ ສູນບໍລິການ, ສູນຂໍ້ມູນດ້ານການທ່ອງທ່ຽວ, ຕິດຕັ້ງອຸປະກອນ, ສິ່ງອໍານວຍຄວາມສະດວກໃນການທ່ອງທ່ຽວ, ກິດຈະກຳຂີ່ເຮືອ, ຍ່າງປ່າ, ຈຸດຊົມທິວທັດ, ຍ່າງຂົວທ່ຽວຊົມພາຍໃນຖໍ້າ ທີ່ມີຫີນງອກ ຫີນຍ້ອຍ ທີ່ສວຍງາມ ແລະ ມີກິດຈະກໍາອື່ນໆອີກຫຼາກຫຼາຍ ໂດຍໄດ້ລົງທຶນທັງໝົດ 3 ລ້ານໂດລາສະຫະລັດ ຊື່ງແມ່ນການລົງທຶນພາຍໃນ 100% ແລະ ມີໄລຍະການສໍາປະທານ 50 ປີ.
ທ່ານ ເຂັມເພັດ ລານງານຕື່ມວ່າ: ປັດຈຸບັນແມ່ນກໍາລັງເລັ່ງປັບປຸງສະຖານທີ່ຈອດລົດ, ກໍ່ສ້າງຫ້ອງນໍ້າ, ກໍ່ສ້າງເສັ້ນທາງຍົກສູງຂຶ້ນຈາກລະດັບນໍ້າເຂົ້າຫາແຫຼ່ງທ່ອງທ່ຽວ, ຮ້ານອາຫານ, ຈຸດບໍລິການ ແລະ ຂົວຍ່າງທ່ຽວຊົມພາຍໃນຖໍ້າ.
ທີ່ມາ: ມີເດຍລາວ
