Vientiane Times Lao
ແຮງງານລາວຈາກໄທ 13 ຄົນ ລັກລອບຂ້າມແມ່ນໍ້າຂອງເຂົ້າເມືອງສັງທອງ

ແຮງງານລາວຈາກໄທ 13 ຄົນ ລັກລອບຂ້າມແມ່ນໍ້າຂອງເຂົ້າເມືອງສັງທອງ

ທ່ານ ພັທ ສີວິໄລ ພູມນະໄຊ ຫົວໜ້າກອງບັນຊາການ ປກສ ເມືອງສັງທອງ ນະຄອນຫຼວງວຽງຈັນ ແຈ້ງໃຫ້ຮູ້ເມື່ອວັນທີ 6 ມັງກອນ 2021 ທີ່ຜ່ານມາວ່າ: ພາຍຫຼັງທີ່ມີການແຜ່ລະບາດຂອງພະຍາດໂຄວິດ-19 ຮອບໃໝ່ຢູ່ປະເທດໄທ, ອໍານາດການປົກຄອງເມືອງສັງທອງໄດ້ແຕ່ງຕັ້ງຄະນະສະເພາະກິດຕ້ານ, ສະກັດກັ້ນ ແລະ ປ້ອງກັນພະຍາດໂຄວິດ-19 ເພື່ອປ້ອງກັນເວນຍາມຕາມແຄມຝັ່ງແມ່ນໍ້າຂອງເພື່ອປ້ອງກັນ ແຮງງານລາວທີ່ໄປເຮັດວຽກຢູ່ປະເທດໄທ ອາດລັກຂ້າມມາ ຊຶ່ງອາດຈະນໍາພະຍາດດັ່ງກ່າວມາແຜ່ເຊື້ອຢູ່ລາວ. ເມື່ອບໍ່ດົນມານີ້ໄດ້ກວດພົບແຮງງານລາວຈໍານວນ 13 ຄົນ (ຍິງ 8 ຄົນ) ທີ່ໄປເຮັດວຽກຢູ່ປະເທດໄທ ໄດ້ລັກລອບຂ້າມແມ່ນໍ້າຂອງເຂົ້າມາເມືອງສັງທອງ ແລະ ໄດ້ນໍາຕົວທັງໝົດໄປກັກຕົວຢູ່ສູນກັກກັນຫຼັກ 27 ເປັນທີ່ຮຽບຮ້ອຍແລ້ວ.

ທ່ານ ພັທ ສີວິໄລໄດ້ກ່າວຕື່ມວ່າ: ເມືອງສັງທອງອາດຈະເປັນເມືອງທີ່ອາດຈະມີການລັກລອບເຂົ້າມາປະເທດລາວ ຍ້ອນມີແມ່ນໍ້າຂອງທີ່ແຄບ ໂດຍສະເພາະໃນລະດູແລ້ງຢູ່ບາງບ່ອນແມ່ນສາມາດຍ່າງຂ້າມໄດ້ເລີຍ. ສະເພາະເມືອງສັງທອງມີ 35 ບ້ານໃນນີ້ມີ 13 ບ້ານທີ່ຕັ້ງຢູ່ລຽບຕາມແມ່ນໍ້າຂອງ ແຕ່ເຖິງຢ່າງໃດກໍ່ຕາມ ເຊື່ອວ່າຄະນະສະເພາະກິດຈະສາມາດປ້ອງກັນການລັກລອບຂອງແຮງງານລາວຈາກໄທມາລາວໄດ້ເພາະມີມາດຕະການເວນຍາມຕະຫຼອດ 24 ຊົ່ວໂມງ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ