Vientiane Times Lao
ໂຄງການປັບປຸງສະໜາມບິນຫ້ວຍຊາຍ ຖືກໂຈະໃນໄລຍະລະດູຝົນ

ໂຄງການປັບປຸງສະໜາມບິນຫ້ວຍຊາຍ ຖືກໂຈະໃນໄລຍະລະດູຝົນ

ໂຄງການປັບປຸງ ຍົກລະດັບສະໜາມບິນ ຫ້ວຍຊາຍ ແຂວງບໍ່ແກ້ວ ໄດ້ຖືກໂຈະ ນັບແຕ່ເດືອນສິງຫາ 2020 ແລະ ຍັງຈະສບຕໍ່ໂຈະການກໍ່ສ້າງ ຈົນກ່ວາສະພາບອາກາດຈະປົກກະຕິ, ຊຶ່ງໂຄງການດັ່ງກ່າວໄດ້ເລີ່ມແຕ່ເດືອນ ກັນຍາ 2018, ມາຮອດເດືອນ ກໍລະກົດ 2020 ຜ່ານມານີ້ ການກໍ່ສ້າງໄດ້ມີຄວາມຄືບໜ້າແລ້ວ ເກືອບ 60%, ຄາດວ່າຈະໃຫ້ສໍາເລັດໃນກາງປີ 2021.
ທ່ານ ຈອມ ໄຊສອນຄໍາ, ຫົວໜ້າ ພະແນກໂຍທາທິການ ແລະຂົນສົ່ງ ແຂວງບໍ່ແກ້ວ ໄດ້ໃຫ້ສຳພາດ ກັບນັກຂ່າວ ໜັງສືພິມວຽງຈັນທາຍ ວ່າ: ໂຄງການດັ່ງກ່າວ ແມ່ນການກໍ່ສ້າງ ແລະ ປັບປຸງສະໜາມບິນເກົ່າທີ່ຮັບໃຊ້ການບໍລິການຢູ່ໃນປະຈຸບັນ ໃຫ້ມີຄວາມປອດໄພຂື້ນຕື່ມໃນການນໍາເອົາເຮືອບິນຂຶ້ນ-ລົງສະໜາມບິນ, ຊຶ່ງຈະສາມາດຮອງຮັບເຮືອບິນຂະໜາດ 70-100 ບ່ອນນັ່ງ ເຊັ່ນ: ATR 72, MA-60 ຫຼື ທຽບເທົ່າ, ມູນຄ່າການກໍ່ສ້າງ 149 ຕື້ກວ່າກີບ ໂດຍການສະໜັບສະໜູນ ຈາກລັດຖະບານ.
ໂຄງການນີ້ ແມ່ນຂະຫຍາຍເສັ້ນທາງແລ່ນ ຈາກ 19 ຫາ 36 ແມັດ (ລວງກວ້າງ) ແລະ 1.450 ເຖິງ 1.660 ແມັດ(ລວງຍາວ). ພ້ອມນັ້ນ ຍັງໄດ້ກໍ່ສ້າງຮົ້ວອ້ອມສະໜາມບິນ, ສ້ອມແປງຫົນທາງ ແລະ ລະບົບລະບາຍນ້ຳ, ສ້ອມແປງອາຄານຜູ້ໂດຍສານ, ບ່ອນຈອດເຮືອບິນ, ບ່ອນຈອດລົດໂດຍສານ ແລະ ວຽກງານອື່ນໆ.
ສໍາລັບ ຈຸດປະສົງໂຄງການນີ້ ເພື່ອຊຸກຍູ້ສົ່ງເສີມການພັດທະນາເສດຖະກິດ-ສັງຄົມ ແລະ ການທ່ອງທ່ຽວ ແຂວງບໍ່ແກ້ວ, ໂດຍສະເພາະແມ່ນວຽກງານການຂົນສົ່ງທາງອາກາດ ເພື່ອຜັນຂະຫຍາຍແຜນພັດທະນາເສດຖະກິດ-ສັງຄົມ ຂອງລັດຖະບານແຫ່ງ ສປປ ລາວ.

ຂ່າວ: ວຽງຈັນທາຍ

ຮູບ: ປະກອບ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ