ສະພາການຄ້າແລະອຸດສາຫະກຳແຫ່ງຊາດລາວ ແລະ ສະມາຄົມຮ້ານອາຫານ ແລະ ໂຮງແຮມໄດ້ໃຫ້ສໍາພາດຕໍ່ນັກຂ່າວໜັງສືພິມວຽງຈັນທາຍໃນວັນພະຫັດນີ້ວ່າ: ໂຄງການລາວທ່ຽວລາວ ຈະຊ່ວຍສົ່ງເສີມ ແລະ ຊຸກຍູ້ການທ່ອງທ່ຽວພາຍໃນໃຫ້ຄຶກຄື້ນກວ່າເກົ່າ, ໂດຍຈະໄດ້ມີພິທີເປີດຢ່າງເປັນທາງການໃນຕົ້ນເດືອນກໍລະກົດນີ້. ໂຄງການດັ່ງກ່າວນີ້ເປັນໂຄງການສົ່ງເສີມການທ່ຽວຢູ່ພາຍໃນປະເທດ ເພື່ອຊັກຊວນ ແລະ ດຶງດູດຄົນລາວທີ່ມັກໄປທ່ຽວຕ່າງປະເທດ ໃຫ້ສົນໃຈມາທ່ຽວຊົມວັດທະນະທໍາຮີດຄອງປະເພນີອັນດີງາມທີ່ເປັນເອກະລັກຂອງຊົນຊາດລາວ ແລະ ທ່ຽວຊົມທັດສະນີຍະພາບອັນສວຍສົດງົດງາມຢູ່ຕາມແຫຼ່ງທ່ອງທ່ຽວຢູ່ພາຍໃນປະເທດໃຫ້ຫຼາຍຂຶ້ນ.
ທ່ານອິນທີ ເດືອນສະຫວັນ ຄະນະບໍລິຫານງານສະພາການຄ້າ ແລະ ອຸດສາຫະກຳແຫ່ງຊາດລາວ ທັງເປັນປະທານ ‘‘ໂຄງການ ລາວທ່ຽວລາວຈະຊ່ວຍສົ່ງເສີມ ແລະ ຊຸກຍູ້ການທ່ອງທ່ຽວພາຍໃນໃຫ້ຄຶກຄື້ນກວ່າ ເກົ່າ’’ ໄດ້ກ່າວວ່າ: ປະຈຸບັນສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ຮ່ວມກັບສະມາຄົມຮ້ານອາຫານ ແລະ ໂຮງແຮມກຳລັງກະ ກຽມທີ່ຈະເປີດໂຄງການໃນເດືອນໜ້າ ແລະ ດຽວນີ້ ກໍາລັງຮວບຮວມຂໍ້ມູນຂ່າວສານຂອງແຫຼ່ງທ່ອງທ່ຽວ, ໂຮງແຮມ ແລະ ຮ້ານອາຫານຕ່າງໆທີ່ຈະເຂົ້າຮ່ວມ ໂຄງການ ແລະ ຈະໄດ້ເຜີຍແຜ່ຢູ່ໃນເວັບໄຊ ແລະ ເຟສບຸກ ຂອງໂຄງການ ເພື່ອອຳນວຍຄວາມສະດວກໃຫ້ແກ່ສັງຄົມ ແລະ ຜູ້ທີ່ສົນໃຈ ເຂົ້າເຖິງຂໍ້ມູນຕ່າງໆໄດ້ຢ່າງສະດວກສະບາຍແລະວ່ອງໄວ.
ທ່ານ ອິນທີ ໄດ້ກ່າວຕື່ມວ່າ: ຈຸດປະສົງຂອງໂຄງການນີ້ແມ່ນເພື່ອສົ່ງເສີມ ແລະ ຊຸກຍູ້ການທ່ອງທ່ຽວພາຍໃນໃຫ້ຄຶກຄື້ນກວ່າເກົ່າໂດຍສະເພາະໃນໄລຍະການແຜ່ລະບາດຂອງພະຍາດໂຄວິດ-19 ທີ່ຍັງສືບຕໍ່ໃນ ປະເທດອ້ອມຂ້າງ ແລະ ປະເທດອື່ນໆໃນໂລກ.
ຂ່າວ-ພາບ: ວິສິດ
