Visit BigblueAgency
ໂຮງຮຽນປະຖົມສົມບູນນາເລົາ ເມືອງໂພນໂຮງ ໄດ້ຮັບອາຄານຮຽນຫຼັງໃໝ່

ໂຮງຮຽນປະຖົມສົມບູນນາເລົາ ເມືອງໂພນໂຮງ ໄດ້ຮັບອາຄານຮຽນຫຼັງໃໝ່

ອີງຕາມແຫຼງຂ່າວໜັງສືພິມ ສຶກສາ-ກິລາ ໃຫ້ຮູ້ວ່າ: ໃນວັນທີ 23 ພຶດສະພາ 2023 ຜ່ານມານີ້, ທີ່ໂຮງຮຽນ ປະຖົມສົມບູນນາເລົາ ເມືອງໂພນໂຮງ ແຂວງວຽງຈັນ ໄດ້ຈັດພິທີມອບ-ຮັບ ອາຄານຮຽນຫຼັງໃໝ່, ຊຶ່ງເປັນອາ ຄານຮຽນຊັ້ນດຽວ, ມີ 7 ຫ້ອງຮຽນ, ເປັນອາຄານກໍ່ສ້າງ ໝັ້ນຄົງຖາວອນ, ມີລະບົບໄຟຟ້າ ແລະ ຫ້ອງນໍ້າຄົບ ຊຸດ ໂດຍໄດ້ຮັບການຊ່ວຍເຫຼືອຈາກອົງການສາມັກຄີຊາວ ອົບພະຍົບ ແລະ ຜູ້ດ້ອຍໂອກາດ (CSA) ຈາກປະເທດ ຍີ່ປຸ່ນ ລວມມູນຄ່າ 116.858,87ໂດລາ ສະຫະລັດ.                                                                                                                                                                                                   

ພິທີມອບ-ຮັບ ອາຄານໂຮງຮຽນປະຖົມສົມບູນນາເລົາ ເມືອງໂພນໂຮງ ແຂວງວຽງຈັນ, ໂດຍໃຫ້ກຽດຕາງໜ້າ ມອບຂອງທ່ານ ຊູຊຸກິ ທາກາຊິ ຕາງໜ້າອົງການສາມັກຄີ ຊາວອົບພະຍົບ ປະເທດຍີ່ປຸ່ນ ແລະ ໃຫ້ກຽດຕາງໜ້າ ຮັບໂດຍ ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ມີທ່ານ ສົມປະສົງ ສຸວົງຄຳຈັນ ເຈົ້າເມືອງໂພນໂຮງ,  ທ່ານ ນາງ ຄຳປະເສີດ ກິດຕິຍະວົງ ຫົວໜ້າກົມສາມັນ ກະຊວງສຶກສາທິການ ແລະ ກິລາ, ທ່ານ ພູວັນ ວົງສຸທິ ຫົວໜ້າກົມຮ່ວມມືກັບຕ່າງປະເທດ ກະຊວງສຶກສາ ທິການ ແລະ ກິລາ, ທ່ານ ອ໊ອດ ແສງພິມ ຫົວໜ້າ ພະແນກສຶກສາທິການ ແລະ ກິລາ ແຂວງວຽງຈັນ, ທ່ານ ວັນໄຊ ພົມມະຈັກ ຫົວໜ້າຫ້ອງການສຶກສາທິການ ແລະ ກິລາ ເມືອງໂພນໂຮງ, ທ່ານ ຈັນພູວຽງຈິດ ເພັງສະຫວ່າງ ປະທານບໍລິສັດອິນທອນ ກໍ່ສ້າງ, ພ້ອມດ້ວຍຄະນະ ພັດທະນາການສຶກສາຂັ້ນບ້ານ, ນາຍບ້ານ, ປະທານກຸ່ມ ໂຮງຮຽນ ແລະ ຜູ້ອໍານວຍການໂຮງຮຽນປະຖົມ ພາຍໃນກຸ່ມ ຕະຫຼອດຮອດຄູອາຈານ, ພໍ່ແມ່ນັກຮຽນ ແລະ ນ້ອງນັກຮຽນເຂົ້າຮ່ວມເປັນສັກຂີພິຍານ.

ໃນພິທີ, ທ່ານ ຈັນພູວຽງຈິດ ເພັງສະຫວ່າງ ປະທານ ບໍລິສັດ ອິນທອນກໍ່ສ້າງ ໄດ້ລາຍງານປະຫວັດການກໍ່ສ້າງ ຜ່ານມາໃຫ້ຊາບວ່າ: ອາຄານຮຽນຫຼັງໃໝ່ຂອງໂຮງຮຽນ ດັ່ງກ່າວ, ແມ່ນໄດ້ຮັບການຊ່ວຍເຫຼືອຈາກ ອົງການ ສາມັກຄີຊາວອົບພະຍົບ ແລະ ຜູ້ດ້ອຍໂອກາດ (CSA) ຈາກປະເທດຍີ່ປຸ່ນ, ໄດ້ເລີ່ມຕົ້ນລົງມືກໍ່ສ້າງແຕ່ ເດືອນ ມິຖຸນາ 2022 ເປັນຕົ້ນມາ ຈົນຮອດວັນທີ 15 ພຶດສະພາ 2023 ຈຶ່ງສໍາເລັດ, ໂຄງການກໍ່ສ້າງດັ່ງກ່າວລວມມີ ອາຄານຮຽນ ແລະ ຫ້ອງນໍ້າ, ເປັນອາຄານຮຽນຊັ້ນດຽວ ມີຂະໜາດ 8×49 ແມັດ, ມີ 7 ຫ້ອງຮຽນ, ເປັນອາຄານກໍ່ສ້າງໝັ້ນຄົງຖາວອນ ມີລະບົບໄຟຟ້າ, ຫ້ອງນໍ້າ ຂະໜາດ 4×8,40 ແມັດ ລວມມີ 7 ຫ້ອງ, ລວມມູນຄ່າໂຄງການກໍ່ສ້າງທັງໝົດ ຈໍານວນ 116.858,87 ໂດລາສະຫະລັດ.

ນອກຈາກນັ້ນ, ການກໍ່ສ້າງອາຄານຮຽນຫຼັງດັ່ງກ່າວນີ້ ຍັງໄດ້ຮັບທຶນຮອນຈາກຊຸມຊົນບ້ານນາເລົາ, ບ້ານຫຼັກ 52 ແລະ ບ້ານໂພນຄຳໃຕ້ ທີ່ໄດ້ປະກອບສ່ວນໃນການ ຖົມດິນປຸກສ້າງ, ໂຕະ-ຕັ່ງຂອງຄູ-ນັກຮຽນ ແລະ ຕູ້ເອກະ ສານ ລວມມູນຄ່າທັງໝົດ 90.500.000 ກີບ.

Related Articles

Leave a Reply