ທີມງານລະບົບປະສາດຂອງໂຮງໝໍມິດຕະພາບໄດ້ຈັດກິດຈະກໍາສະເຫຼີມສະຫຼອງວັນພະຍາດເສັ້ນເລືອດສະໝອງສາກົນຄັ້ງທີ 8 ເມື່ຶອມໍ່ໆມານີ້ທີ່ ໂຮງໝໍມິດຕະພາບໂດຍການເປັນປະທ່ານທ່ານ ດຣ ສອນໄຊ ລາດສະວົງ ຜູ້ອຳນວຍການໂຮງໝໍມິດຕະພາບ.
ກິດຈະກໍານີ້ເປັນການເຄື່ອນໄຫວສ້າງຂະບວນການສະເຫຼີມສະຫຼອງວັນພະຍາດເສັ້ນເລືອດສະໝອງສາກົນ (World Stroke Day) ເຊີ່ງແຕ່ລະປີຢູ່ທົ່ວໂລກຈະມີການຈັດງານສະເຫຼີມສະຫຼອງວັນດັ່ງກ່າວ.
ພາຍໃນງານຄັ້ງນີ້ໄດ້ໃຫ້ຄວາມຮູ້ພື້ນຖານກ່ຽວກັບພະຍາດເສັ້ນເລືອດສະໝອງໂດຍ ດຣ ໃສສະຫວາດ ແກ້ວສົດໃສ ຫົວໜ້າພະແນກລະບົບປະສາດ ຊ່ຽວຊານພະຍາດເສັ້ນເລືອດສະໝອງ ແລະ ຍັງໄດ້ເປີດໂອກາດໃຫ້ບັນດາທ່ານທີ່ເຂົ້າຮ່ວມໄດ້ຊັກຖາມໂອ້ລົມເຖີງບັນຫາທີ່ສົງໃສ ຫຼື ບໍ່ເຂົ້າໃຈກ່ຽວກັບພະຍາດນີ້ດ້ວຍ.
ຈຸດປະສົງເພື່ອເປັນການເຜີຍແຜ່ຂໍ້ມູນໃຫ້ຄວາມຮູ້ແກ່ຄົນທົ່ວໄປໃນສັງຄົມ ເຖິງຄວາມຮ້າຍແຮງ ແລະ ຜົນກະທົບຂອງພະຍາດເສັ້ນເລືອດສະໝອງ, ຮູ້ຈັກປັດໃຈສ່ຽງ, ຮູ້ຈັກອາການພື້ນຖານຂອງພະຍາດ-ວິທີປະຕິບັດເພື່ອປ້ອງກັນພະຍາດ ແລະ ຮັບການປິ່ນປົວທີ່ຖືກຕ້ອງ-ທັນເວລາເພື່ອບໍ່ໃຫ້ເປັນອຳມະພຶກ-ອຳມະພາດ ຫຼື ຮ້າຍແຮງເຖິງແກ່ຊີວິດ ແລະ ເພື່ອເປັນການຫຼຸດຈຳນວນຄົນເຈັບທີ່ເພີ້ມຂຶ້ນໃນແຕ່ລະປີຢ່າງຕໍ່ເນື່ອງ.
ແຫຼ່ງຂໍ້ມູນຂ່າວ: ສູນຂ່າວສານການແພດ
