ອໍານາດການປົກຄອງ ແຂວງໄຊຍະບູລີ ຮັບຮອງວັດສີບຸນເຮືອງ ບ້ານໃຫຍ່ ເມືອງໄຊຍະບູລີ ເປັນມໍຣະດົກທາງດ້ານວັດທະ ນະທຳລະດັບທ້ອງຖິ່ນຂັ້ນແຂວງ ຊຶ່ງພິທີປະກາດ ໄດ້ຈັດຂຶ້ນໃນວັນທີ 31 ຕຸລາ 2024 ໂດຍການເຂົ້າຮ່ວມຂອງ ທ່ານ ດວງຕາ ໄຊວຸດ ຮອງເລຂາພັກແຂວງ, ທ່ານ ທອງລິດ ຫຼວງໂຄດ ຮອງຫົວໜ້າກົມມໍຣະດົກ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ພ້ອມດ້ວຍພໍ່ແມ່ປະຊາຊົນບັນດາເຜົ່າເຂົ້າຮ່ວມ.
ທ່ານ ນາງ ພິລາວັນ ອົງແກ້ວ ຮອງເຈົ້າ ເມືອງໄຊຍະບູລີ ແຂວງໄຊຍະບູລີ ຂຶ້ນຜ່ານບົດລາຍງານການສ້າງວັດສີບຸນເຮືອງ ບ້ານໃຫຍ່ ເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ ຊຶ່ງທ່ານໄດ້ກ່າວວ່າ: ໂດຍປະຕິບັດຕາມກົດ ໝາຍວ່າດ້ວຍມໍຣະດົກແຫ່ງຊາດ (ສະບັບປັບປຸງ) ເລກທີ 38/ສພຊ, ລົງວັນທີ 16 ພະຈິກ 2021 ແຜນງານຍຸດທະສາດຂອງກົມມໍຣະດົກ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ 2020-2025 ແລະ ແຜນພັດທະນາວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງໄຊຍະບູລີ ວາງອອກ.
ຜ່ານການຈັດຕັ້ງປະຕິບັດ ໃນແຕ່ລະໄລຍະເຫັນວ່າບ້ານແມ່ນໄດ້ມີຄວາມເອົາໃຈໃສ່ຢ່າງຕັ້ງໜ້າໃນການບູລະນະປົກປັກຮັກສາວັດ ຖຸພັນຕ່າງໆຢູ່ພາຍໃນວັດໄດ້ເປັນຢ່າງດີ ຊຶ່ງການກະກຽມຄວາມພ້ອມດ້ານຕ່າງໆຂອງວັດໃນການກະກຽມປະກາດເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ ຮັບຮອງເອົາວັດສີບຸນເຮືອງ ບ້ານໃຫຍ່ ເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງຕາມຂັ້ນຕອນ.ໃນໂອກາດດັ່ງກ່າວ ຍັງໄດ້ມອບໃບຢັ້ງຢືນການຮັບຮອງວັດສີບຸນເຮືອງເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ, ເປັນກຽດມອບໂດຍທ່ານ ດວງຕາ ໄຊວຸດ ຮອງເລຂາພັກແຂວງໄຊຍະບູລີ ແລະ ຮັບໂດຍທ່ານ ເສນ ພັນລັກ ວ່າການເຈົ້າເມືອງໄຊຍະບູລີ.
