ອໍານາດການປົກຄອງແຂວງໄຊຍະບູລີ ຈະຈັດງານມະຫະກຳບຸນຊ້າງ ປະຈໍາປີ 2025 ໃນລະຫວ່າງວັນທີ 18-24 ກຸມພາ 2025, ຊຶ່ງຈະຈັດຫຼາຍກິດຈະກໍາຕິດພັນກັບຊ້າງ ແລະ ວິຖີການດຳລົງຊີວິດຂອງປະຊາຊົນລາວບັນດາເຜົ່າ ທີ່ຕິດພັນກັບຊ້າງມາແຕ່ອະດີດຕະການ ຢູ່ກັບປະຊາຊົນລາວບັນດາເຜົ່າ ໂດຍສະເພາະປະຊາຊົນຊາວແຂວງໄຊຍະບູລີ ພ້ອມນັ້ນ ກໍເປັນການໂຄສະນາດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າມາທ່ອງທ່ຽວ ສປປ ລາວ ກໍຄືແຂວງໄຊຍະບູລີ ໃຫ້ຫຼາຍຂຶ້ນ.
ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ປະທານຈັດງານມະຫະກໍາບຸນຊ້າງ ປະຈໍາປີ 2025 ໄດ້ຖະແຫຼງຂ່າວຕໍ່ສື່ມວນຊົນ ແຂວງໄຊຍະບູລີ ໃນວັນທີ 27 ພະຈິກ 2024 ວ່າ: ງານມະຫະກຳບຸນຊ້າງ ປະຈໍາປີ 2025 ຈະຈັດໂດຍການຮ່ວມມືລະຫວ່າງອົງການປົກຄອງແຂວງ ແລະ ສະມາຄົມນັກທຸລະກິດໜຸ່ມແຂວງໄຊຍະບູລີ ຮ່ວມກັນຈັດງານມະຫະກໍາບຸນຊ້າງ ເປັນປີທີສອງ ຖືວ່າເປັນຄັ້ງທີ 18, ຈະມີຊ້າງເຂົ້າຮ່ວມ 50 ໂຕ ຊຶ່ງຈະມີກິດຈະກຳຕ່າງໆປະກອບ ເຊັ່ນ:
ໃນວັນທີ 18 ກຸມພາ 2025 ຕອນເຊົ້າ ຈະມີການແຂ່ງຂັນແລ່ນມິນິມາລາທອນ, ເຮັດພິທີຄອບເລົ່າ, ບໍລິການຂີ່ຊ້າງທົ່ວໄປ, ຕອນຄໍ່າຊົມການສະແດງສິລະປະວັນນະຄະດີ. ວັນທີ 19-20 ກຸມພາ 2025 ເປັນການຝຶກຊ້ອມໃຫຍ່ຂະບວນແຫ່ຂອງຊ້າງ, ກ້ອນກໍາລັງຂອງ 8 ເຜົ່າ, ກ້ອນກໍາລັງຂອງແຕ່ລະເມືອງ ແລະ ກ້ອນສະແດງຕ່າງໆ ໃນພິທີເປີດງານ. ໃນຕອນແລງຂອງວັນທີ 19 ກຸມພາ 2025 ຈະມີພິທີເປີດຕະຫຼາດນັດວາງສະແດງສິນຄ້າທັງພາຍໃນ ແລະ ຕ່າງປະເທດ. ວັນທີ 20 ກຸມພາ 2025 ຝຶກຊ້ອມການສະແດງຊ້າງຄໍາຮູ້, ຕອນຄໍ່າ ປະກວດນາງສາວທິດາບຸນຊ້າງ.
ໃນຕອນເຊົ້າຂອງວັນທີ 21 ກຸມພາ 2025 ເປັນມື້ ຕັກບາດອຸທິດສ່ວນກຸສົນໃຫ້ຊ້າງ ແລະ ຄວນຊ້າງ, ກວດກາຄວາມພ້ອມຮອບດ້ານໃຫ້ແກ່ການເປີດງານຢ່າງເປັນທາງການ. ໃນວັນທີ 22 ກຸມພາ 2025 ເປັນມື້ເປີດງານມະຫະກໍາບຸນຊ້າງ ປະຈໍາປີ 2025 ຢ່າງເປັນທາງການ ແລະ ຊົມການສະແດງການບິນ (ພາລາມໍເຕີ), ການຂີ່ບານລູນຊົມຕົວເມືອງ, ຜາຂີ້ໝິ້ນ, ຜາຊ້າງ ແລະ ເຂື່ອນໄຟຟ້ານໍ້າຂອງໄຊຍະບູລີ. ວັນທີ 23 ກຸມພາ 2025 ບໍລິການຂີ່ຊ້າງຊົມເມືອງ, ທ່ຽວຊົມການສະແດງຂອງຊ້າງ ແລະ ບັນດາກິດຈະກໍາຕ່າງໆໃນງານບຸນ ແລະ ການຂີ່ບານລູນຊົມທິວທັດທໍາມະຊາດພາຍໃນແຂວງ, ໃນຕອນຄໍ່າຈະມີການສະແດງຄອນເສີດ. ວັນທີ 24 ກຸມພາ 2025 ແມ່ນພິທີປິດງານມະຫະກໍາບຸນຊ້າງ ແລະ ມອບລາງວັນຕ່າງໆໃຫ້ຊ້າງ ແລະ ກ້ອນຂະບວນແຫ່ຂອງແຕ່ລະເມືອງ.
ສໍາລັບ ງານມະຫະກໍາບຸນຊ້າງຈັດຂຶ້ນໃນແຕ່ລະປີ ກໍເພື່ອເປັນການອະນຸລັກຮັກສາຊ້າງບໍ່ໃຫ້ສູນພັນ, ທັງເປັນການສືບຕໍ່ປົກປັກຮັກສາວັດທະນະທໍາ, ຮີດຄອງປະເພນີອັນດີງາມ ແລະ ວິຖີການ ດໍາລົງ ຊີວິດຂອງປະຊາຊົນລາວບັນດາເຜົ່າ, ໂດຍສະເພາະ ແມ່ນປະຊາຊົນບັນດາເຜົ່າພາຍໃນແຂວງໄຊຍະບູລີ ທີ່ມີມາແຕ່ດົນນານໃຫ້ຍືນຍົງຄົງຕົວຕະຫຼອດໄປ.
ແຫຼ່ງຂ່າວ: ສື່ມວນຊົນ ແຂວງໄຊຍະບູລີ
