Visit BigblueAgency
ໄຊຍະບູລີ ເປີດແຫຼ່ງທ່ອງທ່ຽວ ສູນອະນຸລັກຊ້າງ ແລະ ຂະຫຍາຍພັນຊ້າງອາຊີ ພູແຂນ

ໄຊຍະບູລີ ເປີດແຫຼ່ງທ່ອງທ່ຽວ ສູນອະນຸລັກຊ້າງ ແລະ ຂະຫຍາຍພັນຊ້າງອາຊີ ພູແຂນ

ອໍານາດການປົກຄອງ ແຂວງໄຊຍະບູລີ ເປີດບໍລິການແຫຼ່ງທ່ອງທ່ຽວ ສູນອະນຸລັກຊ້າງ ແລະ ຂະຫຍາຍພັນຊ້າງ ພູແຂນ ບ້ານນາຕໍໃຫຍ່ ເມືອງໄຊຍະບູລີ ແຂວງໄຊຍະບູລີ, ຈັດຂຶ້ນໃນວັນທີ 11 ເມສາ 2024 ຜ່ານມານີ້ ໂດຍການເຂົ້າຮ່ວມຂອງທ່ານ ພົງສະຫວັນ ສິດທະວົງ ເຈົ້າແຂວງໆໄຊຍະບູລີ, ທ່ານ ຫວາງ ໂຣມິງ ອໍານວຍການບໍລິສັດ ລົງທຶນພັດທະນາການທ່ອງທ່ຽວ ເຊໂນ-ລາວ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ບຸນດ່ວນ ໄຊດວງຕາ ທີ່ປຶກສາ ບໍລິສັດ ລົງທຶນພັດທະນາການທ່ອງທ່ຽວ ເຊໂນ-ລາວ ໄດ້ລາຍງານວ່າ: ສູນອະນຸລັກຊ້າງແຫ່ງນີ້ ມີເນື້ອທີ່ 137,8 ເຮັກຕາ ຊຶ່ງໄດ້ລົງທຶນໃນເບື້ອງຕົ້ນ 17 ລ້ານໂດລາສະຫະລັດ ໂດຍແບ່ງເປັນ 2 ໄລຍະ ຄື: ໄລຍະທີ 1 ໄດ້ກໍ່ສ້າງປະຕູໂຂງເຂົ້າຫາສູນອະນຸລັກຊ້າງ, ປູທາງເບຕົງພາຍໃນສູນ, ສ້າງຮ້ານຂາຍເຄື່ອງຂອງທີ່ລະນຶກ, ສ້າງເຮືອນຂຶ້ນຂີ່ຊ້າງ 2 ຫຼັງ, ກໍ່ສ້າງບ່ອນນັ່ງຊົມຊ້າງອາບນ້ຳ, ໂຮງໝໍຊ້າງ, ຄອກຊ້າງ 25 ຄອກ, ຫໍພັກຄວານຊ້າງ 2 ຫຼັງ ແລະ ອື່ນໆ, ຊຶ່ງປະຈຸບັນ ມີຊ້າງເຂົ້າມາອະນຸລັກ ຈໍານວນ 12 ເຊືອກ (ໂຕ) ໃນນັ້ນ ມີຊ້າງເພດຜູ້ 3 ເຊືອກ ແລະ ເພດແມ່ 9 ເຊືອກ.

ສຳລັບ ໄລຍະທີ 2, ທາງບໍລິສັດ ຈະໄດ້ສືບຕໍ່ພັດທະນາສູນອະນຸລັກຊ້າງແຫ່ງນີ້ ໃຫ້ມີຫຼາກຫຼາຍກິດຈະກຳເພີ່ມຂຶ້ນຕື່ມ ເປັນຕົ້ນ ສ້າງໂຮງແຮມ, ໂຮມສະເຕ ເພື່ອໃຫ້ນັກທ່ອງທ່ຽວໄດ້ພັກເຊົາ, ສ້າງທ່າເຮືອນ້ອຍແຄມນໍ້າຮຸ່ງ, ຄົ້ນຄວ້າຂຶ້ນແຜນຊື້ເຮືອສຳລານ 70 ບ່ອນນັ່ງ ເຂົ້າມາບໍລິການລ່ອງແຕ່ຫຼວງພະບາງ ມາຫາໜ້າເຂື່ອນໄຟຟ້ານ້ຳຂອງເຂດບ້ານທ່າເດື່ອ ເມືອງໄຊຍະບູລີ, ສືບຕໍ່ສ້າງເຮືອນຂີ່ຊ້າງເພີ່ມອີກໜຶ່ງຫຼັງ ຢູ່ຈຸດແຄມນ້ຳຮຸ່ງເບື້ອງໃຕ້, ແລະ ສືບຕໍ່ນຳເອົາຊ້າງເຂົ້າມາເພີ່ມຢູ່ສູນອະນຸລັກຊ້າງ ເພື່ອບໍລິການນັກທ່ອງທ່ຽວໃຫ້ມີຄວາມພຽງພໍ ແລະ ອື່ນໆ ອີກ.

ແຫຼ່ງຂ່າວ: ສື່ມວນຊົນ ແຂວງໄຊຍະບູລີ

Related Articles

Leave a Reply