Visit BigblueAgency
ໄຊບູລີ ກຽມແກ້ໄຂປະກົດການຫຍໍ້ທໍ້ຢູ່ບັນດາບ້ານຊາຍແດນ

ໄຊບູລີ ກຽມແກ້ໄຂປະກົດການຫຍໍ້ທໍ້ຢູ່ບັນດາບ້ານຊາຍແດນ

ອໍານາດການປົກຄອງ ເມືອງໄຊບູລີ ແຂວງສະຫວັນນະເຂດ ກຽມແກ້ໄຂປະກົດການຫຍໍ້ທໍ້ຕ່າງໆຢູ່ບັນດາບ້ານ ຊາຍແດນທີ່ຕິດກັບປະເທດໄທ ໂດຍມີ 8 ບ້ານ ແລະ ມີຄວາມຍາວຫຼາຍກວ່າ 20 ກິໂລແມັດ ໂດຍການຄັດເລືອກເອົາຄະນະບ້ານຊຸດໃໝ່ທີ່ມີຄວາມຮູ້ຄວາມສາມາດໃນການບໍລິຫານ-ຄຸ້ມຄອງທີ່ຖືກຈຸດ, ມີຄວາມໂປ່ງໃສ ແລະ ສອດຄອງກັບແນວທາງນະໂຍບາຍຂອງພັກ ແລະ ລັດຖະບານ ເວົ້າສະເພາະກໍ່ຄືແນວທາງຂອງຄະນະນໍາຂັ້ນເມືອງໄຊບູລີ. ປະກົດການຫຍໍ້ທໍ້ທີ່ພົບເຫັນຢູ່ບັນດາບ້ານຊາຍດັ່ງກ່າວຢູ່ເມືອງໄຊບູລີ ປະກອບມີການລັກລອບຂົນສິນຄ້າທີ່ຜິດກົດໝາຍ, ຍານພາຫະນະ ແລະ ອື່ນໆ.  

ບ້ານທ່າຄໍ້ ທີ່ຂຶ້ນກັບກຸ່ມທີ 2 ກຸ່ມບ້ານປາກເຊບັ້ງໄຟ ຂອງເມືອງໄຊບູລີ ແຂວງສະຫວັນນະເຂດ ແມ່ນບ້ານທໍາອິດທີ່ມີການລິເລີ່ມ ປັບປຸງກົງຈັກຂອງບ້ານ ໂດຍໄດ້ມີການຄັດເລືອກເອົາຄະນະບໍລິຫານບ້ານຊຸດໃໝ່ ຊຶ່ງໄດ້ມີການບ່ອນບັດເລືອກຕັ້ງເມື່ອມໍ່ໆມານີ້ ໂດຍເຂົ້າຮ່ວມເປັນປະທານ ຂອງທ່ານ ອ່ອນລໍາພັນ ບົວສີແກ້ວ ກໍາມະການພັກແຂວງ ເລຂາພັກເມືອງ ເຈົ້າເມືອງໄຊບູລີ.

ພາຍຫຼັງການເລືອກຕັ້ງ ຜົນປະກົດວ່າ, ທ່ານ ພັຕ ບຸນເຫຼີມ ໄອມະນີ ໄດ້ຖືກຄັດເລືອກ ເປັນນາຍບ້ານໆທ່າຄໍ້ທັງເປັນເລຂາໜ່ວຍພັກບ້ານ, ທ່ານ ຄຳປານ ເປັນຮອງເລຂາໜ່ວຍພັກ ແລະ ເປັນກວດກາໜ່ວຍພັກ, ພ້ອມນີ້ຍັງມີຄະນະອີກ 2 ທ່ານ ປະກອບມີ ທ່ານ ສະເຫຼີມສັກ ແລະ ທ່ານ ແວວ ລັດຕະນະມະນີ ເປັນຮອງນາຍບ້ານ.

ເນື່ອງໃນໂອກາດນີ້ ທ່ານ ອ່ອນລຳພັນ ບົວສີແກ້ວ ເຈົ້າເມືອງໄຊບູລີ ຮຽກຮ້ອງໃຫ້ອຳນາດການປົກຄອງບ້ານຊຸດໃໝ່ຈົ່ງໄດ້ເອົາໃຈໃສ່ ແກ້ໄຂບັນຫາໃຫ້ຖືກຈຸດ, ເນັ້ນໜັກໃຫ້ສືບຕໍ່ເປັນເຈົ້າການເຕົ້າໂຮມຄວາມສາມັກຄີພາຍໃນ, ສຶກສາອົບຮົມແນວຄິດ-ການເມືອງໃຫ້ແກ່ພໍ່ແມ່ປະຊາຊົນພາຍໃນບ້ານຊ່ວຍເປັນຫູເປັນຕາໃນການເຝົ້າລະວັງການລັກລອບນຳເຂົ້າສິນຄ້າທີ່ຜິດກົດໝາຍຕາມຊາຍແດນ, ການລັກລອບເຂົ້າເມືອງທີີີ່ຜິດກົດໝາຍທັງນີ້, ກໍ່ເພື່ອເປັນການເຝົ້າລະວັງການແຜ່ລະບາດຂອງພະຍາດໂຄວິດ-19.

Related Articles

Leave a Reply