Visit BigblueAgency
ໄລຍະ 5 ເດືອນຜ່ານມາແຂວງອັດຕະປື ມີຜູ້ເສຍຊິວິດ 20 ຄົນ ຍ້ອນອຸບັດເຫດຕາມທ້ອງຖະໜົນ

ໄລຍະ 5 ເດືອນຜ່ານມາແຂວງອັດຕະປື ມີຜູ້ເສຍຊິວິດ 20 ຄົນ ຍ້ອນອຸບັດເຫດຕາມທ້ອງຖະໜົນ

ໃນໄລຍະ 5 ເດືອນ ຕົ້ນປີ 2024 ຜ່ານມານີ້, ແຂວງອັດຕະປື ມີຜູ້ເສຍຊີວິດເຖິງ 20 ຄົນ, ຜູ້ບາດເຈັບ 249 ຄົນ ແລະ ພາຫະນະເປ່ເພ 294 ຄັນ ຈາກອຸບັດເຫດຕາມທ້ອງຖະໜົນເກີດຂຶ້ນທັງໝົດ 176 ຄັ້ງ, ຖ້າທຽບໃສ່ໄລຍະດຽວກັນຂອງປີຜ່ານມາຈຳນວນຜູ້ເສຍຊີວິດເພີ່ມຂື້ນ 7 ຄົນ ແລະ ມູນຄ່າເສຍຫາຍຈາກການເກີດອຸບັດເຫດທັງໝົດເກືອບ 2 ຕື້ກີບ.

ອຸບັດເຫດແຕ່ລະຄັ້ງ ຢູ່ແຂວງອັດຕະປື ເກີດຈາກຫຼາຍປັດໄຈ ເປັນຕົ້ນ ຍ້ອນຜູ້ຂັບຂີ່ຈໍານວນໜຶ່ງຍັງບໍ່ທັນເປັນເຈົ້າການໃນການປະຕິບັດລະບຽບການສັນຈອນຢ່າງເຂັ້ມງວດ, ໂດຍສະເພາະ ຂັບ​ຂີ່​ໄວ​ເກີນ​ກຳ­ນົດ, ບໍ່​ໃຫ້​ກຽດ​ກັບ​ຜູ້​ໃຊ້​ເສັ້ນ­ທາງ​ຮ່ວມ​ກັນ ແຊງ​ຊ້າຍ-ຂວາ​ ບໍ່​ຮັບ­ປະ­ກັນ, ຂັບ​ຂີ່​ລົດເປັນພຶງເປັນແພ ແລະ ອື່ນໆ, ຮ້າຍແຮງກ່ວານັ້ນ ຜູ້ຂັບຂີ່ຍັງດື່ມສິ່ງມຶນເມົາ ​ຂັບຂີ່ລົດໄວ ເປັນສາເຫດຂອງການເກີດອຸ­ບັດ­ເຫດຕາມທ້ອງຖະໜົນ.

ທ່ານ ຮ້ອຍເອກ ສົມໃຈ ນາມປະກາສິດ ຫົວໜ້າກອງສືບສວນ-ສອບສວນຄະດີອຸບັດເຫດກອງບັນຊາການປ້ອງກັນຄວາມສະຫງົບ ແຂວງອັດຕະປື ໄດ້ລາຍງານເມື່ອບໍ່ດົນມານີ້ ວ່າ: ສະພາບອຸບັດເຫດຕາມທ້ອງຖະໜົນໃນຂອບເຂດທົ່ວແຂວງອັດຕະປື ແມ່ນມີລັກສະນະເພີ່ມຂື້ນ ເຖິງແມ່ນວ່າເຈົ້າໜ້າທີ່ຕໍາຫຼວດ ຈະໃຊ້ມາດຕະການຕ່າງໆ ເພື່ອຫຼຸດຜ່ອນການເກີດອຸບັດເຫດແລ້ວກໍ່ຕາມ. ສ່ວນໃຫຍ່ ອຸບັດເຫດແມ່ນເກີດຂຶ້ນ ຢູ່ໃນກຸ່ມພະນັກງານ-ລັດຖະກອນ, ກໍາມະກອນ ແລະ ນັກຮຽນ-ນັກສຶກສາ ຊຶ່ງເກີດຂຶ້ນຫຼາຍກວ່າໝູ່ແມ່ນຢູ່ເມືອງ ສາມັກຄີໄຊ ເກີດຂື້ນທັງໝົດ 72 ຄັ້ງ, ເສຍຊີວິດ 5 ຄົນ, ຮອງລົງມາແມ່ນເມືອງ ໄຊເສດຖາ ເກີດຂຶ້ນ 36 ຄັ້ງ ເສຍຊີວິດ 7 ຄົນ, ເມືອງ ຊານໄຊ ເກີດຂຶ້ນ 23 ຄັ້ງ ເສຍຊີວິດ 3 ຄົນ, ເມືອງ ພູວົງ ເກີດຂຶ້ນ 25 ຄັ້ງ ເສຍຊີວິດ 3 ຄົນ ແລະ ເມືອງ ສະໜາມໄຊ ເກີດຂຶ້ນ 20 ຄັ້ງ ເສຍຊີວິດ 2 ຄົນ.

ຕໍ່ສະພາບອຸບັດເຫດດັ່ງກ່າວ, ເຈົ້າໜ້າທີ່ ຂໍຮຽກຮ້ອງເຖິງນັກຂັບຂີ່ຜູ້ໃຊ້ລົດໃຊ້ຖະໜົນໃນຂອບເຂດທົ່ວແຂວງອັດຕະປື ໃຫ້ເອົາໃຈໃສ່ປະຕິບັດກົດລະບຽບການສັນຈອນຢ່າງເຂັ້ມງວດ, ຖ້າດື່ມສິ່ງມຶນເມົາແລ້ວຫ້າມຂັບຂີ່ພາຫະນະ, ເວລາຂັບຂີ້ຕ້ອງໃຫ້ກຽດເຊີ່ງກັນແລະກັນ, ໝັ່ນກວດເຊັກສະພາບເຕັກນິກລົດຂອງຕົນໃຫ້ຢູ່ໃນສະພາບພ້ອມໃຊ້ງານ,ທັງນີ້ກໍ່ເພື່ອລີກລ້ຽງການສູນເສຍທາງດ້ານຊີວິດ ແລະ ຊັບສິນຈາກການເກີດອຸບັດເຫດບົນທ້ອງຖະໜົນ.

ຂ່າວຈາກ: ວັດທະນາ

Related Articles

Leave a Reply