ອົງການໄອຍະການປະຊາຊົນແຂວງ ຈຳປາສັກ ສປປ ລາວ ແລະ ອົງການໄອຍະການປະຊາຊົນແຂວງ ເທື່ອທຽນເຫວ້ ສສ ຫວຽດນາມ ໄດ້ເຊັນບົດບັນທຶກຄວາມເຂົ້າໃຈ (MOU) ກ່ຽວກັບການເພີ່ມທະວີສາຍພົວພັນການຮ່ວມມືໃນການຕ້ານ ແລະ ສະກັດກັ້ນອາຊະຍາກໍາ ລະຫວ່າງສອງແຂວງ, ຊຶ່ງພິທີເຊັນບົດບັນທຶກດັ່ງກ່າວ ໄດ້ຈັດຂຶ້ນໃນວັນທີ 7 ເມສາ 2022 ຜ່ານມານີ້ ທີ່ແຂວງ ຈຳປາສັກ ລະຫວ່າງ ທ່ານ ຄຳມ່ວນ ພິລາພອນເດດ, ຫົວໜ້າອົງການ ໄອຍະການປະຊາຊົນແຂວງ ຈຳປາສັກ ແລະ ທ່ານ ຫງວຽນ ແທັງ ຮ້າຍ, ຫົວໜ້າອົງການໄອຍະການປະຊາຊົນແຂວງ ເທື່ອທຽນເຫວ້.
ການເຊັນບົດບັນທຶກລະຫວ່າງສອງຝ່າຍ ຄັ້ງນີ້ ກໍເພື່ອສືບຕໍ່ຈັດຕັ້ງປະຕິບັດແລກປ່ຽນບົດຮຽນ ແລະ ວຽກງານໄອຍະການ ລະຫວ່າງສອງແຂວງ, ສືບຕໍ່ປະສານສົມທົບຈັດຕັ້ງປະຕິບັດຢ່າງມີປະສິດທິຜົນ ບັນດາຄວາມຮຽກຮ້ອງຕ້ອງການຊ່ວຍເຫຼືອທາງດ້ານກົດໝາຍເຊິ່ງກັນແລະ ກັນໃນເລື່ອງທາງແພ່ງ ແລະ ທາງອາຍາ ພາຍໃຕ້ຂໍ້ກໍານົດຂອງສອງປະເທດ ລາວ ແລະຫວຽດນາມ, ໃນນັ້ນ ອົງການໄອຍະການ ປະຊາຊົນແຂວງເທື່ອທຽນເຫວ້ ກຽມພ້ອມໃຫ້ການຊ່ວຍເຫຼືອດ້ານການກໍ່ສ້າງພະນັກງານ, ສະມາຊິກອົງການໄອຍະການປະຊາຊົນແຂວງຈຳປາສັກ ຢູ່ໃນຂົງເຂດຕົວຈິງ ຖ້າມີຄວາມຮຽກຮ້ອງຕ້ອງການ ແລະ ຝ່າຍອົງການໄອຍະການປະຊາຊົນແຂວງເທື່ອທຽນເຫວ້ ກໍ່ຕອບສະໜອງໃຫ້ໄດ້.
ນອກຈາກນັ້ນ, ທັງສອງຝ່າຍ ຍັງໄດ້ຕົກລົງເຫັນດີເປັນເອກະພາບເປັນເຈົ້າພາບຈັດກອງປະຊຸມສະຫຼັບກັນ 1 ປີ ຕໍ່ຄັ້ງ ຊຶ່ງຈະເລີ່ມແຕ່ປີ 2023 ເປັນຕົ້ນໄປ, ໂດຍອົງການໄອຍະການປະຊາຊົນແຂວງເທື່ອທຽນເຫວ້ ຈະເປັນເຈົ້າພາບຄັ້ງທໍາອິດຈັດກອງປະຊຸມ ກ່ຽວກັບວຽກງານໄອຍະການ ລະຫວ່າງແຂວງ ຈຳປາສັກ ແລະ ແຂວງ ເທື່ອທຽນເຫວ້.
ຂໍ້ມູນຂ່າວ: ແຂວງ ຈຳປາສັກ
